Connect with us

Կինոիրադարձություններ

Հայկական ֆիլմերը՝ Կանն 2020-ում

Մեկ ֆիլմ ընդգրկվել է պաշտոնական ցուցակում, իսկ մյուս նկարները մասնակցում են կինոշուկայում:

Հրապարակվել է

2020 թվականին՝ COVID-19 համաճարակի պատճառով իրար հետևից չեղարկվեցին և հետաձգվեցին համաշխարհային հայտնի կինոփառատոներ, կինոֆորումներ և բազում այլ կինոստուգատեսներ։

Այդուհանդերձ, հենց այս շրջանում, հայկական կինոն արձանագրեց կարևոր իրադարձություն․ Կաննի միջազգային 73-րդ փառատոնի կողմից ընտրված ֆիլմերի պաշտոնական ցուցակում՝ The First Features (առաջին խաղարկային լիամետրաժ ֆիլմ) անվանակարգում, հետխորհրդային շրջանում առաջին անգամ ընդգրկվեց ռեժիսոր Նորա Մարտիրոսյանի համատեղ արտադրության (Ֆրանսիա, Հայաստան, Բելգիա) «Երբ որ քամին հանդարտվի» կինոնկարը, որը ներկայացվել էր Հայաստանի անունից։ Կինոռեժիսոր Ջիվան Ավետիսյանի «Դրախտի դարպասը» (Gate to Heaven) ֆիլմը՝ ֆրանսիական վաճառքի գործակալ «MPM Premium»-ի միջոցով, Կաննի վիրտուալ կինոշուկայում՝ հունիսին առաջին անգամ, կներկայացվի գնորդներին և փառատոնի ծրագրավորողներին։ Կաննում մասնակցելու է նաև հայկական Parallels Film Production ընկերությունը իր «Մետամորֆոզ 2020», «Տատիկիս վարսերը» և «Թողություն» նախագծերով:

Նորա Մարտիրոսյանի «Երբ որ քամին հանդարտվի» կինոնկարը պատմում է Ալենի՝ ազգությամբ ֆրանսիացի օդանավակայանների աուդիտորի մասին, որը ժամանում է Արցախի Հանրապետության բոլորովին նոր կառուցված օդանավակայան: Ինքնահռչակված, թշնամի պետություններով շրջապատված և ոչ հաստատուն սահմաններ ունեցող այս երկիրը փորձում է ոտքի կանգնել անկախության համար մղված պատերազմից հետո: Ալենը պետք է ուսումնասիրի, թե արդյոք վերացբացվելու համար այս օդանավակայանը համապատասխանում է միջազգային նորմերին: Օդանավակայանի աշխատակիցների հետ հարցազրույցների ընթացքում Ալենը հետզհետե հայտնաբերում է մի երկիր, որը որոշ քարտեզների վրա նույնիսկ նշված չէ, բայց որը իրականում գոյություն ունի իր բնակիչներով, իր կառավարությամբ, իր համակարգերով, իր մշակութային դաշտով:

«2019 թ․-ին Բեռլինի միջազգային կինոփառատոնի կինոշուկայում իմ և իմ թիմակիցների կողմից իրականացված տարբեր հանդիպումների արդյունքում մենք կարողացել ենք համագործակցություն ձևավորել ֆրանսիական MPM Premium ընկերության հետ՝ որպես վաճառքի գործակալ։ Այս համագործակցության արդյունքում «Դրախտի դարպասը» ֆիլմը, Կաննի վիրտուալ կինոշուկայում (հունիս, 2020) առաջին անգամ կներկայացվի գնորդներին և փառատոնի ծրագրավորողներին» — նշել է Ջիվան Ավետիսյանը

«MPM Premium»-ը Կաննի վիրտուալ կինոշուկայում իրականացնելու է «Դրախտի դարպասներ» ֆիլմի երկու ցուցադրություն՝ հունիսի 22-ին և 23-ին։

Նախորդ տարիների օրինակով, այս տարի էլ Կաննի կինոշուկայում ներկա են լինելու կինոարտադրողներ, դիստրիբյուտորներ՝ ամբողջ աշխարհից, միայն թե՝ օնլայն տարբերակով։ Եվ, հետևաբար, ֆիլմերի ցուցադրություններն էլ կազմակերպվելու են առցանց: Կինոնկարի համաշխարհային վաճառքի գործակալ «MPM Premium»-ը, աշխատելու է ֆիլմի առաջխաղացման աշխատանքների ուղղությամբ։

«Դրախտի դարպասը» ֆիլմի հայաստանյան և արցախյան պրեմիերան կայացել է 2019 թ․-ի հոկտեմբերին:

Ֆիլմի մասին. Գերմանացի լրագրող Ռոբերտ Ստերնվալը (50 տարեկան) 2016թ․-ին վերադառնում է Արցախ՝ լուսաբանելու քսաներկու տարվա ընդմիջումից հետո վերսկսված պատերազմը։ Լրագրողական հետաքննության արդյունքում ծանոթանում է երիտասարդ օպերային երգչուհի Սոֆիա Մարտիի (35 տարեկան) հետ։ Ռոբերտի և Սոֆիայի հաճախակի հանդիպումները արթնացնում են փոխադարձ սիրո զգացմունքը, սակայն պարզվում է, որ Սոֆիան անհայտ կորած ֆոտոլրագրող Էդգար Մարտիրոսյանի աղջիկն է, ում 1992թ․ին՝ Թալիշի անկման օրը, Ռոբերտը թողել է գյուղում՝ գերեվարության մեջ, ապա՝ յուրացրել նրա՝ մարտի դաշտում արված լուսանկարները:

Ֆիլմի գլխավոր օպերատորը լիտվացի Ռիտիս Կուրկուլիսն է։ «Դրախտի դարպասը» ֆիլմում օպերային երգիչ Ժան Բեռնարի կերպարը մարմնավորում է լիտվացի հայտնի դերասան Լեո Պոբեդոնոսցևասը: «Դրախտի դարպասը» Հայաստանի, Լիտվայի, Գերմանիայի, Ֆրանսիայի, Բուլղարիայի, Չեխիայի, Իտալիայի և ԱՄՆ-ի հետ համատեղ արտադրություն է։

«Երբ որ քամին հանդարտվի» (43 մլն. դրամ) և «Դրախտի դարպասը» (20 մլն. դրամ) ֆիլմերը պետական ֆինանսական աջակցություն են ստացել Հայաստանի ազգային կինոկենտրոնի կողմից:

Parallels Film Production ընկերությունը Կաննում 2020 ներկայացնելու է միանգամից մի քանի նախագիծ: 2019 թվականին արտադրված և թողարկված «Թողություն» հեռուստասերիալը, որը հաջողությամբ հեռարձակվել է Հանրային հեռուստաընկերության եթերում:

44-ամյա խորեոգրաֆ, Օպերայի և բալետի թատրոնի գլխավոր բեմադրիչ Գաբրիելը իրականացնում է «Մետամորֆոզ» բալետային ներկայացումը՝ Ֆրանց Կաֆկայի վիպակի մոտիվներով։ Պրեմիերայից հինգ ամիս առաջ պարուհու հետ տարաձայնությունը վերածվում է ամբիցիաների բախման։ Գաբրիելը հեռացնում է նրան։ Վիրավորված պրիման Գաբրիելի դեմ է միավորում թատրոնի նորանշանակ տնօրենին, ներկայացման հովանավորին և Գաբրիելի կոլեգաներին՝ բեմադրիչի կյանքը վերածելով դժոխքի։ Սերիալը բաղկացած է 16 մասից:

«Թողություն»-ը Հայաստանի, Գերմանիայի և Բուլղարիայի համատեղ արտադրություն է: Կաննում կներկայացվի սերիալի լիամետրաժ տարբերակը՝ «Մետամորֆոզ 2020» (Metamorphosis 2020) ֆիլմը, որի հետարտադրական աշխատանքները ընթացքի մեջ են:

Pre-production փուլում գտնվող «Տատիկիս վարսերը» (My Grandma’s Locks) նախագիծը, որը նույնպես Հայաստանի, Գերմանիայի և Բուլղարիայի համատեղ արտադրություն է պատմում է 1900ականներին Հայաստանի գյուղերից մեկում տեղի ունեցած, մի ընտանիքի պատմությունը: Էպիկական դրամա, որի գործողությունները ձգվում են մոտ 3 տասնամյակ: Ֆիլմի հիմքում ռեժիսորի տատիկի հուշերն են:

Այս տարի EAVE-ի (European Audiovisual Entrepreneurs / Եվրոպական Տեսալսողական Ձեռնարկատերեր) հրավերով պրոդյուսեր և ռեժիսոր Հովհաննես Գալստյանը մասնակցելու է Producer’s Network հարթակում, որտեղ հիմնականում քննարկվելու են «Մետամարֆոզ 2020» (Metamorphosis 2020) ֆիլմի հետարտադրության, վաճառքի, փարատոնային ցուցադրությունների հարցերը: Բացի այդ պրոդյուսերը ծրագրել է տարբեր հանդիպումներ:

When East Meets West, CineMart և New Nordic Films Marché du Film-ի հետ համագործակցության արդյունքում Hoshkee Film ընկերության, ռեժիսոր և պրոդյուսեր Մերի Աղախանյանի «Իրենի Աշխարհը» (Irene’s World) կինոնկարը մասնակցում է Marché du Film-ի Co-Production Speed Meeting համատեղ արտադրության հարթակում:

«Ես մեկ ուրախություն… մեր «Իրենի Աշխարհը» պրոյեկտը մասնակցում է Կաննի օնլայն կինոշուկային, շնորհավորում եմ իմ պրոդյուսերներին, որոնց հետ հետաքրքիր ու կարևոր ճանապարհ ենք անցնում, օգտակար հանդիպումներ մեզ», — գրել է Մերի Աղախանյանը իր ֆեյսբուքյան էջում:

Marché du Film կինոշուկան առցանց կանցկացվի հունիսի 22-26-ը:

Կինոիրադարձություններ

«ԿինոԷքսպոն» և «ՍՊԲՄԿՖ»-ն հաստատել են անցկացման ավելի վաղ հայտարարված ժամկետները

Ֆորումները տեղի կունենան սեպտեմբերի 22-25-ը:

Հրապարակվել է

«Կինո Էքսպո» XXII միջազգային ցուցահանդեսը, ինչպես նաև «Կոնենտ Էքսպո» ցուցահանդեսը տեղի կունենան Սանկտ Պետերբուրգում 2020 թվականի սեպտեմբերի 23-25-ը «Էքսպոֆորում» համալիրում, ինչպես և պլանավորված էր: Այս մասին հայտնել է միջոցառման կազմակերպիչ Դմիտրի Կազուտոն: Սեպտեմբերի 22-ին մեկնարկում է Սանկտ Պետերբուրգի միջազգային կոնտենտ Ֆորումը: Այսպիսով, ֆորումի և ցուցահանդեսի սկզբում հայտարարված ժամկետները դեռևս չեն փոխվում: Պատվիրակների մասնակցության հայտերի ընդունումը նախատեսվում է սկսել օգոստոսի 1-ից:

Դրա հետ մեկտեղ կազմակերպիչները ճշտում են, որ համաժողովի անցկացումը նշված ժամկետներում կախված կլինի երկրի տարածաշրջանների մեծ մասում կինովարձույթի վերսկսման ժամկետներից: «Ռոսպոտրեբնադզորը» պաշտոնապես հաստատել է ցուցահանդեսային և կոնգրեսային միջոցառումների համաճարակաբանորեն անվտանգ անցկացման մեթոդական հանձնարարականները, որոնք մշակվել են առևտրաարդյունաբերական պալատի նախաձեռնությամբ՝ ցուցահանդեսների և Տոնավաճառների ռուսական միության և Ռուսաստանում կոնգրեսա-ցուցահանդեսային ծառայությունների շուկայի խոշորագույն ներկայացուցիչների հետ համատեղ: Մասնավորապես, դրանք պարունակում են սոցիալական հեռավորության նորմեր, աշխատողների մուտքը ձեռնարկություններ, անվտանգ կառուցապատումը և միջոցառումների անցկացումը, ինչպես նաև կոնգրեսների և ցուցահանդեսների տարածքում այցելուների գտնվելու կանոնները:

Սանկտ Պետերբուրգի միջազգային կոնտենտ ֆորումը ԱՊՀ եւ Բալթյան երկրներում միակ ամենամյա կոնտենտ-ինդուստրիայի միջազգային համաժողովն է, որը միավորում է կինոթատրոնային վարձույթը, հեռուստատեսությունը եւ թվային մեդիան: Համաժողովի մասնակիցները դառնում են կինոթատրոնային ցանցերի եւ կինոթատրոնների, մեդիահոլդինգների եւ հեռուստաալիքների, թվային մեդիայի օպերատորների (առցանց վիդեոսերվիսներ և այլն), բոլոր հարթակների համար բովանդակության արտադրող և դիստրիբյուտորների, մշակույթի և զանգվածային հաղորդակցությունների բնագավառում իշխանության մարմինների, ԶԼՄ-ների ներկայացուցիչներ:

Շարունակել ընթերցումը

Կինոիրադարձություններ

Marvel Studios և Warner Bros. բաց կթողնեն վիրտուալ Comic-Con-ը

Հրապարակվել է

Marvel Studios եւ Warner Bros կինոստուդիաները կանտեսեն Comic-Con 2020 փառատոնը, որը առաջին անգամ կանցկացվի առցանց: Այս մասին հայտնում է Comic Book պարբերականը՝ վկայակոչելով իր աղբյուրները:

Ամենայն հավանականությամբ, ստուդիաները գերադասում են իրենց նոր նախագծերը ներկայացնել սեփական միջոցառումների ժամանակ: Ընկերությունների պաշտոնական ներկայացուցիչները դեռ չեն մեկնաբանել այդ տեղեկությունը:

Հիշեցնենք, որ Comic-Con 2020 փառատոնը պետք է կայանար հուլիսի վերջին, սակայն դրա կազմակերպիչները որոշել են այն չանցկացնել կորոնավիրուսի տարածման առկա սպառնալիքի պատճառով:

Շարունակել ընթերցումը

Կինոիրադարձություններ

Վենետիկի կինոփառատոնը կկրճատի ծրագիրը կորոնավիրուսի պատճառով

Ստուգատեսը կընթանա հիբրիդային ձևաչափով՝ կենտրոնանալով օֆլայն ցուցադրությունների վրա:

Հրապարակվել է

Վենետիկի միջազգային կինոփառատոնը հաստատել է, որ պատրաստվում է նախանշված ցուցադրություններն ու միջոցառումները անցկացնել սեպտեմբերի 2-12-ը: Այս տարի ժյուրին կգլխավորի ավստրալացի դերասանուհի Քեյթ Բլանշետը:

Ընդ որում, կազմակերպիչները հայտարարում են, որ ստիպված կկրճատվի պաշտոնական ընտրության ֆիլմերի քանակը, ծրագրերի մի մասը կտեղափոխեն վիրտուալ տարածք կամ այլ հարթակներ: Մասնավորապես, «Վենետիկյան դասական» ծրագիրը, որի շրջանակներում սովորաբար տեղի է ունենում վերականգնված կինոժապավենի ցուցադրությունը, այս անգամ կանցկացվի Cineteca di Bologna կինոփառատոնի շրջանակներում օգոստոսի 25-31-ը Էմիլիան քաղաքում:

Փառատոնի գլխավոր մրցույթը, արտամրցութային ծրագիրը և «Հորիզոններ» ծրագիրը նախատեսվում են ավանդական ձևաչափով: Ցուցադրությունները տեղի կունենան կինոթատրոններում, որտեղ դրանք անցկացվել են նախորդ տարիներին: Իսկ ահա Վենեցիա Վիրտուալ իրականություն մրցութային ծրագիրը կանցնի առցանց: «Սկոֆինի» բաժինը (արտհաուս, փորձարարական և ժանրային կինո, սերիալներ) կչեղարկվի:

Կինոյի այն գործիչներին, ովքեր տեղաշարժման սահմանափակումների պատճառով չեն կարողանա անձամբ այցելել փառատոնը և նրա միջոցառումները, կատարվող իրադարձություններին կմիացնեն համացանցի միջոցով:

Շարունակել ընթերցումը

Միացեք մեզ

Գովազդ

ԿինոՊրես Telegram

Գովազդ

Հարցում

Թրենդային

Copyright © 2019-2020 ԿինոՊրես

Բոլոր իրավունքները պաշտպանված են ՀՀ օրենսդրությամբ:
Կայքի հրապարակումների մասնակի կամ ամբողջական օգտագործման ժամանակ հղումը կայքին պարտադիր է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: