Connect with us

Կինոիրադարձություններ

«Ոսկե Ծիրանը» բացահայտել է հատուկ հյուրի անունը

Հրապարակվել է

Հունիսի 12-ին «Անի պլազա» հյուրանոցում կայացավ «Ոսկե ծիրան» Երեւանի 16-րդ միջազգային կինոփառատոնի մամուլի ասուլիսը։ Ասուլիսի բանախոսներն էին` Երեւանի «Ոսկե ծիրան» միջազգային կինոփառատոնի հիմնադիր նախագահ Հարություն Խաչատրյանը, «ՎիվաՍել-ՄՏՍ»-ի գլխավոր տնօրեն Ռալֆ Յիրիկյանը, ՀՀ կրթության, գիտության, մշակույթի եւ սպորտի նախարարի տեղակալ Արայիկ Խզմալյանը:

Ամռանը հայաստանյան մշակութային կյանքը կակտիվանա սպասված եւ նշանավոր իրադարձությամբ. հուլիսի 7-ին կմեկնարկի 16-րդ «Ոսկե ծիրանը»: Հայաստանում սիրված ու նաեւ երկրի սահմաններից դուրս լայն ճանաչում գտած այս բացառիկ կինոփառատոնի մեկնարկն այսօր ազդարարել են «Ոսկե ծիրան»միջազգային կինոփառատոնը, ՀՀ կրթության, գիտության, մշակույթի եւ սպորտի նախարարությունն ու կինոփառատոնի գլխավոր գործընկեր ՎիվաՍել-ՄՏՍ-ը:

Համատեղ մամուլի ասուլիսի ընթացքում միջոցառման կազմակերպիչները լրագրողներին ներկայացրել են կինոփառատոնի՝ այս տարվա պաշտոնական պաստառը, ինչպես նաեւ անդրադարձել են սպասվող միջոցառումներին:

«Այս տարի փառատոնը որոշակի փոփոխություններ է կրել, քանի որ փոխվել է փառատոնի ղեկավար կազմը: Փառատոնի կազմը համալրել են երիտասարդներ,ովքեր մեծ պատասխանատվությամբ են պատրաստվում 16-րդ «Ոսկե ծիրանին» եւ անում են ամեն ինչ՝ այն իսկապես կինոտոն դարձնելու համար: Փոփոխություններ են եղել նաեւ գերատեսչությունների համատեքստում. տեղի է ունեցել նախարարությունների միավորում, եւ այսուհետեւ մենք համագործակցելու ենք ՀՀ կրթության, գիտության, մշակույթի եւ սպորտի նախարարության հետ: Չի փոխվել մեր գլխավոր գործընկերը՝ ՎիվաՍել-ՄՏՍ-ը: Ընկերությունն արվեստի՝ մասնավորապես՝ կինոյի եւ «Ոսկե ծիրանի» նվիրյալներից է, ինչի համար մենք շատ ուրախ ենք եւ շատ շնորհակալ մեր փառատոնի լավագույն բարեկամին»,- իր խոսքում ընդգծել է Երեւանի «Ոսկե ծիրան» միջազգային կինոփառատոնի հիմնադիր նախագահ Հարություն Խաչատրյանը:

«ՎիվաՍել-ՄՏՍ-ը մեծ կարեւորություն է տալիս մշակութային կյանքի, մասնավորապես՝ ազգային կինեմատոգրաֆի, ակտիվացմանն ու զարգացմանը Հայաստանում: Տարիներ շարունակ «Ոսկե ծիրան» կինոփառատոնի շրջանակում մեր ընկերությունը կանգնած է կինոգործիչների կողքին: Կինոարվեստի զարգացման կարևոր խթան լինելու հետ մեկտեղ, կինոփառատոնը հսկայական աշխատանք է տանում աշխարհի քարտեզի վրա Հայաստանը որպես հարուստ մշակույթ ունեցող երկիր ճանաչելի դարձնելու գործում»,- նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

ՀՀ կրթության, գիտության, մշակույթի եւ սպորտի նախարարի տեղակալ Արա Խզմալյանն առանձնահատուկ շեշտեց, որ «Ոսկե ծիրան»-ն այն նախագծերից է, որը բարձրացնում է երկրի վարկանիշը աշխարհում: «Մեզ համար փառատոնն ունի ռազմավարական նշանակություն, որովհետեւ այս ձեւաչափի փառատոնները մասնագիտական լավ խողովակներ են՝ երկիրը եւ նրա մշակութային ժառանգությունը ներկայացնելու աշխարհին»,- նշել է Արա Խզմալյանը:

Ասուլիսի ընթացքում բանախոսները տեղեկացրել են, որ այս տարվա լիամետրաժ մրցույթի ժյուրին կնախագահի ճանաչված կինոռեժիսոր Ալեքսանդր Մինդաձեն, իսկ փառատոնի հատուկ հյուրն է մեքսիկացի հանրահայտ կինոռեժիսոր, միջազգային մրցույթների դափնեկիր Կառլոս Ռեյգադասը:

Միջազգային կինոփառատոնն աշխարհի տարբեր երկրներից ստացել է մասնակցության ավելի քան 740 հայտ, ինչպես նաեւ ընտրվել են մի շարք կինոնկարներ աշխարհի հեղինակավոր կինոփառատոններից՝ Կաննից, Բեռլինից, Ռոտերդամից: Փառատոնն ունենալու է միջազգային լիամետրաժ (խաղարկային եւ վավերագրական), ինչպես նաեւ կարճամետրաժ ֆիլմերի տարածաշրջանային մրցույթներ, իսկ արտամրցութային ծրագիրը ներառելու է «Տարածաշրջանային համայնապատկեր» մրցույթը: Մնացած ծրագրերը ոչ մրցութային են. դրանք են՝ «Երեւանյան պրեմիերաներ», «Հետահայաց ցուցադրություններ», «Հարգանքի տուրք»:

«Ոսկե ծիրանն» այս տարի ունի նաեւ նոր տարբերանշան, որն արտահայտում է փառատոնի նոր կազմի ինքնատիպ մոտեցումը 16-րդ տարին անցկացվող իրադարձությանը: Այն մինիմալիստական է, ներկայացնում է հայերեն «Ծ» տառը: Այդ տառի միջոցով լոգոյի հեղինակը փորձել է ստանալ փառատոնի խորհրդանիշ համարվող ծիրանը:

Կինոիրադարձություններ

Կաննի փառատոնը չեղյալ է հայտարարվել կորոնավիրուսի պատճառով

Հրապարակվել է

Կաննի միջազգային կինոփառատոնը կորոնավիրուսի պատճառով չի անցկացվի 2020 թվականին: Այս մասին հայտնում են փառատոնի կազմակերպիչները:

Կազմակերպիչները հունիսի սկզբին ցանկանում են ներկայացնել այն ֆիլմերի ցանկը, որոնք պետք է հայտնվեին ստուգատեսում: Ցուցակը կկոչվի «Կանն-2020»: Ֆիլմերն աշնանը կցուցադրվեն Տորոնտոյի, Սան Սեբաստիանի, Անգուլեմի, Վենետիկի, Նյու Յորքի, Դովիլի, Պուսանի եւ Լիոնի կինոփառատոններում:

Variety պարբերականը հավելելում է, որ Վենետիկի կինոփառատոնն այս տարի անցկացնելու մասին որոշումը կկայացվի մայիսի վերջին:

Կաննի 74-րդ կինոփառատոնին ֆիլմերի ընտրությանը կարող են մասնակցել այն ֆիլմերը, որոնք մտել են նախորդ ստուգատեսի ծրագիրը, սակայն հետաձգվել են 2021 թվականին:

Ավելի վաղ հաղորդվում էր, որ Կաննի կինոփառատոնը չի կայանա մայիսին Ֆրանսիայում կորոնավիրուսի տարածման պատճառով:

Շարունակել ընթերցումը

Կինոիրադարձություններ

Կառլովի Վարիի կինոփառատոնը տեղափոխվել է հաջորդ տարի

Հրապարակվել է

Ապրիլի 28-ին Կառլովի Վարիի 55-րդ միջազգային կինոփառատոնի կազմակերպիչները հայտարարել են, որ կորոնավիրուսի համաճարակի հետ կապված ստուգատեսն այս տարի չի կայանա եւ տեղափոխվում է 2021 թվականի հուլիսի 2-10-ը: Ծրագրային ֆիլմերի մի մասը հնարավոր կլինի տեսնել կինոթատրոններում, ինչպես նաեւ Eastern Promises Industry Days ֆորումի շրջանակներում, որն այս տարի առցանց ձեւաչափով տեղի կունենա հուլիսի 6-ից 8-ը:

«Մենք խորապես հավատում ենք, որ մեծ կինոդահլիճներում ֆիլմերի դիտումն հանդիսատեսի շրջապատում անփոխարինելի փորձ է: Եվ քանի որ Կառլովի Վարիի կինոփառատոնը Չեխիայի Հանրապետությունում կարեւորագույն մշակութային իրադարձություններից մեկն է, մենք որոշեցինք, որ այլընտրանքային տարբերակի անցկացումը հակասում է փառատոնի գլխավոր առաքելությանը. միավորել հանդիսատեսին եւ կինեմատոգրաֆիստներին, որպեսզի միասին վայելեն կինեմատոգրաֆի ստեղծագործությունները», — ասում է ստուգատեսի նախագահ Իրժի Բարտոշկան:

Հաշվի առնելով կարանտինից կինոթատրոնների (սահմանափակ ռեժիմով) դուրս գալու երկրի կառավարության ծրագիրը, փառատոնի ծրագրից առանձին ֆիլմեր կարող են հանդիսատեսին հասանելի դառնալ հուլիսի 3-11-ը: Հատուկ նախագիծը ստացել է KVIFF at Your Cinema անվանումը:

Արեւելյան Promises Industry Days համաժողովում, որը կենտրոնացած է կինոարդյունաբերության մասնագետների վրա, որն այս տարի կտեղափոխվի վիրտուալ տարածք, կներկայացվեն նախագծեր կենտրոնական եւ Արեւելյան Եվրոպայի, Մերձավոր Արեւելքի եւ այլ երկրների զարգացման եւ արտադրության տարբեր փուլերում:

Կառլովի Վարիի միջազգային կինոփառատոնն այս տարի նույնպես միացել է Global Film Festival-ի առցանց ստուգատեսին, որը մեկ հարթակում կմիավորի աշխարհի 20 խոշորագույն կինոփառատոնների ծրագրերից լավագույնը:

Շարունակել ընթերցումը

Կինոիրադարձություններ

Համաճարակի պատճառով կինոթատրոնային վարձույթ չթողարկված ֆիլմերը կկարողանան մասնակցել Օսկարի և Ոսկե Գլոբուսի մրցավազքին

Հրապարակվել է

Գրեթե միաժամանակ կանոնների փոփոխությունների մասին հայտարարել են «Ոսկե Գլոբուս» եւ «Օսկար» երկու հեղինակավոր կինոմրցանակների կազմակերպիչները: Ապրիլի 29-ի երեկոյան Ամերիկյան կինոակադեմիան հայտնել է կորոնավիրուսի համաճարակի ժամանակ Օսկար մրցանակի համար ֆիլմերի ընտրության կանոնների ժամանակավոր բացառությունների մասին: Որոշում է կայացվել թույլատրել COVID-19 համաճարակի պատճառով միայն առցանց ցուցադրված եւ ԱՄՆ-ի կինոթատրոնային վարձույթում հայտնվել չկարողացած նկարները մրցութային ընտրություն անցնել: Ստեղծողները ֆիլմը դիտելու համար կինոակադեմիայի անդամներին պետք է տրամադրեն այն առցանց թողարկումից հետո 60 օրվա ընթացքում:

Կինոակադեմիայի մամուլի տեղեկագրում ընդգծվում է, որ փոփոխությունները ժամանակավոր են եւ կչեղարկվեն իրադրության նորմալացումից հետո: «Ակադեմիան վստահ է, որ ֆիլմը մեծ էկրանին դիտելը կինոյի մոգությունը հասկանալու լավագույն ճանապարհն է: Այդ վստահությունն անփոփոխ է և անսասան: Սակայն COVID-19-ի ողբերգական գլոբալ համաճարակի պատճառով առաջացած իրավիճակը պահանջում է այդ ժամանակավոր բացառությունները», — այսպես է մեկնաբանել ֆիլմերի ընտրության կանոնների փոփոխությունները կինոակադեմիայի նախագահ Դեւիդ Ռուբինը:

ԱՄՆ-ում կինոթատրոնների բացումից հետո բացառությունը կդադարի գործել, բայց կազմակերպիչները կընդլայնեն այն հաստիքների եւ հարթակների քանակը, որոնցում կինոցուցադրումը բավարար կլինի ընտրության որակավորման համար (նախկինում ֆիլմը պետք է ցուցադրվեր առնվազն յոթ օր Լոս Անջելեսի շրջանի կինոթատրոններում):

Կան նաեւ մի քանի փոփոխություններ, որոնք կապված չեն կորոնավիրուսի հետ: Այս տարվանից սկսած երկու անվանակարգ՝ «Լավագույն ձայնի մոնտաժ» (sound editing) և «Լավագույն հնչունավորում» (sound mixing) միավորվել են «Լավագույն ձայնը» անվանակարգում:

Բացի այդ, «Լավագույն երաժշտություն» անվանակարգին մասնակցելու համար ֆիլմն անհրաժեշտ է ունենալ օրիգինալ երաժշտության առնվազն 60%-ը, իսկ սիքվելներն ու ֆրանշիզաները՝ առնվազն 80%-ը:

Լավագույն միջազգային ֆիլմ անվանակարգում նախնական փուլում կարող են քվեարկել Կինոակադեմիայի բոլոր անդամները: Պատմության մեջ առաջին անգամ երկրների առաջադրված ֆիլմերը հասանելի կլինեն Կինոակադեմիայի հատուկ բացառիկ հարթակում: Ընդ որում, Կինոակադեմիայի անդամները պետք է ֆիլմերի որոշակի նվազագույն քանակություն դիտեն, որպեսզի նրանց ձայնը հաշվի առնվի:

Ներկայիս Օսկարի սեզոնը կլինի վերջինը, երբ նախկինում հայտնի DVD ցուցադրիչների տարածումը թույլատրվում էր: Հետագայում ֆիզիկական կրիչների, տպագիր տարբերակով սցենարների եւ կոշտ սկավառակների ցանկացած ուղարկում կարգելվի: Դիտումը կիրականացվի վերը նշված բացառիկ հարթակում կամ որպես այլընտրանքային տարբերակ՝ նյութական հղումներ տրամադրելու միջոցով:

Կան մի շարք տեխնիկական փոփոխություններ կանոնակարգի եւ ընտրության կարգում:

Արտասահմանյան մամուլի հոլիվուդյան ասոցիացիան հայտարարել է Լոս Անջելեսի կինոթատրոններում պարտադիր ցուցադրության պահանջի կասեցման մասին: Այսպիսով, «Ոսկե Գլոբուսին» կարող են հավակնել այն ֆիլմերը, որոնց համար Լոս Անջելեսում մարտի 15-ից մինչեւ կինոթատրոնների աշխատանքի վերսկսումը նախատեսված էին կինովարձույթային ցուցադրություններ: Նման նկարները կարող են թողարկվել միանգամից առցանց կամ հեռուստատեսությամբ եւ միեւնույն է կհամապատասխանեն մրցանակի պահանջներին: Ընդ որում, որոշումները կայացվելու են անհատական կարգով՝ յուրաքանչյուր կոնկրետ դեպքի համար:

Շարունակել ընթերցումը

Միացեք մեզ

Գովազդ
Գովազդ

Հարցում

Թրենդային

Copyright © 2019-2020 ԿինոՊրես

Բոլոր իրավունքները պաշտպանված են ՀՀ օրենսդրությամբ:
Կայքի հրապարակումների մասնակի կամ ամբողջական օգտագործման ժամանակ հղումը կայքին պարտադիր է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: