Connect with us

Կինոիրադարձություններ

Վենետիկ 2019. փակման արարողությունները եւ հաղթողները

Հրապարակվել է

Սեպտեմբերի 7-ին, Իտալիայում տեղի է ունեցել Վենետիկի 76-րդ կինոփառատոնի փակման արարողությունը: Հիմնական մրցույթին մասնակցել է 21 նկար: Նրանցից լավագույններն ընտրել է միջազգային ժյուրին՝ արգենտինացի ռեժիսոր, սցենարիստ, պրոդյուսեր Լուկրեսիա Մարտելի գլխավորությամբ: Նրա հետ միասին ֆիլմերը գնահատել են՝ Փիրս Հենդլինգը, պատմաբան եւ կինոքննադատ (Կանադա), Մերի Հերոնը, ռեժիսոր (Կանադա), Սթեյսի Մարտինը, դերասանուհի (Մեծ Բրիտանիա), Ռոդրիգո Պրիետոն, օպերատոր (Մեքսիկա), Սինյա Ցուկամոտոն, ռեժիսոր (Ճապոնիա) եւ Պաոլո Վիրջինը, ռեժիսոր (Իտալիա):

Փառատոնի գլխավոր մրցանակը՝ Ոսկե առյուծը լավագույն ֆիլմի համար, ստացել է ռեժիսոր Թոդ Ֆիլիպսը, որը նկարահանել է «Ջոկեր» ֆիլմը: Ժյուրիի Գրան պրին բաժին է հասել Ռոման Պոլանսկու «Ես մեղադրում եմ» նկարը: Լավագույն ռեժիսոր է ճանաչվել Ռոյ Անդերսոնը, որը նկարահանել է «Անսահմանության մասին» ֆիլմը:

Լավագույն դերասանական խաղի համար ժյուրին պարգեւատրել է Արիան Ասկարիդին («Gloria Mundi», ռեժիսոր Ռոբեր Գեդիգյան) եւ Լուկե Մարինելլիին («Martin Eden», ռեժիսոր Պիետրո Մարչելլո): Մարչելո Մաստրոյանի մրցանակը Լավագույն երիտասարդ դերասանին կամ դերասանուհուն հանձնել են Թոբի Ուոլլեսին՝ Շենոն Մըրֆիի «Babyteeth» ֆիլմում դերի համար:

Ձեր ուշադրությանն ենք ներկայացնում Վենետիկի 76-րդ կինոփառատոնի փակման արարողության ամենավառ պահերը:

Միացեք մեր Telegram ալիքին և առաջինը ստացեք մեր նորությունները
Շարունակել ընթերցումը
Գովազդ
Մեկնաբանություններ

Կինոիրադարձություններ

Չինացիները չեն մասնակցի CinemaCon-ում

Համաժողովը դեռ չի նախատեսվում չեղյալ հայտարարել կամ հետաձգել:

Հրապարակվել է

Բոլոր չինացի մասնակիցները հրաժարվել են Լաս Վեգասում CinemaCon այցելությունից, հաղորդում է THR-ը: Պատճառը կորոնավիրուսի հետագա տարածման աճող ռիսկերն են: Դրա հետ մեկտեղ միջազգային կինոշուկան նախատեսվում է անցկացնել պլանավորված ամսաթվերի ընթացքում:

Հաշվի առնելով, որ այս շաբաթ կորոնովիրուսի օջախները բռնկվել են Իտալիայում եւ Հարավային Կորեայում, աճում է հավանականությունը, որ Հոնկոնգյան Filmart-ից հետո այլ միջազգային կինոշուկաներ եւս կչեղարկվեն: Այնուամենայնիվ, CinemaCon-ի տնօրինությունը երեկ հատուկ հայտարարություն է տարածել, որ կինոշուկան ոչ միայն տեղի կունենա, այլեւ կանցնի ամբողջ ծավալով, առանց ծրագրի կրճատումների: Հայտարարության մեջ ընդգծվել է, որ մասնակիցների անվտանգությունն ու արդյունավետ աշխատանքը մնում են գլխավոր առաջնահերթությունը կազմակերպիչների համար:

Տնօրինությունը նաեւ հավելել է, որ իրենք մշտական կապի մեջ են Հիվանդությունների վերահսկման կենտրոնի (CDC) եւ առողջապահության այլ մարմինների հետ եւ հետեւողականորեն հետեւում են նրանց առաջարկություններին:

Շարունակել ընթերցումը

Կինոիրադարձություններ

Հայկական կինոարդյունաբերության ոչ թափանցիկ գործելաոճը

Հրապարակվել է

Հաճախ ենք կարդում քաղաքական հոդվածներ, որտեղ կարևորվում է թափանցիկությունը: Նոր Կառավարությունը, նպատակ ունենալով բարձրացնել մարդկանց վստահությունը պետական մարմինների նկատմամբ, ինչպես նաև պետական պաշտոնյաների պատասխանատվության աստիճանը, նախաձեռնում է տարբեր միջոցառումներ, որոնք ուղղված են պետական մարմինների աշխատանքի թափանցիկության ապահովմանը:

Տարբեր ոլորտների թափանցիկության արդյունքները մենք տեսնում ենք հեռուստատեսությամբ, կարդում ենք լրահոսը: Կինոարդյունաբերությունը այն ոլորտների ցանկից է, որի նորությունները մնում են մարդկանց նեղ շրջանակում կամ ընդհանրապես չեն հրապարակվում:

ԿինոՊրեսը արդեն անդրադարձել է Հայաստանի Ազգային Կինոկենտրոնի Եվրոպական կինոշուկայում ներկայությանը, որը անցկացվում էր Բեռլինի միջազգային կինոշուկայի շրջանակում: Ինքը՝ Կինոկենտորնը բազմիցս լույս է սփռել իր կատարած աշխատանքի վրա, սակայն, եթե այլ երկրներում մենք նկատում ենք արդյունքների արագ հրապարակում, Հայաստանում ամեն ինչ հակառակ է աշխատում: Տեղեկությունը կամ չի հրապարակվում, կամ ակնարկ է կատարվում, կամ կիսատ է հրապարակվում:

Եվրոպական կինոշուկան անցկացվում է փետրվարի 20-27-ը: Հետևելով այլ երկրների մամուլին մենք տեղեկանում ենք, որ Ռուսաստանը արդեն տեղեկացրել է իր գոծունեության արդյունքների մասին: Մոսկովյան 16 ընկերություններ «Created in Moscow. Russian films for global audiences» շնորհանդեսի շրջանակում ներկայացրել են իրենց նախագծերը Եվրոպական կինոշուկայում: Մոսկվայի արտահանման կենտրոնի կողմից «Ռոսկինոյի» հետ համագործակցությամբ կազմակերպված միջոցառումն այցելել են ավելի քան 80 միջազգային գնորդներ եւ պրոդյուսերներ: Այս մասին տեղեկանում ենք «Ռոսկինոյի» կայքից:

Ինչ վերաբերում է Հայաստանին, ապա մենք գիտենք, որ տպագրվել է կատալոգ, որը պարունակում է տեղեկություն 2019-2020 թթ հայկական 50 ֆիլմերի մասին, և որ տաղավարում շատ հայեր են եղել, որոնք հանդիպել են Ուզբեկստանի և Վրաստանի ներկայացուցիչների հետ, այցելել են Film University Babelsberg համալսարան: Կինոկենտրոնի տեղեկատվության միակ աղբյուրը՝ իրենց ֆեյսբուքյան էջը կիսվում է Բեռլինում անցկացրած օրերի տպավորություններով, սակայն գործնական իրականությունը մնում է կադրց դուրս:

Հայկական կինոարդյունաբերույթան թափանցիկության մասին խոսելը դժվար է: Կինոկենտրոնի միջոցառումների մասին տեղեկանում ենք այն կադրերից, որոնք տեղադրվում են ֆեյսբուքյան էջում: Մեզ տեղեկացնում են բուն միջոցառման մասին, բայց ոչ արդյունքների մասին: Տարվա սկզբից Կինոկենտրոնը հասցրել է մասնակցել Ռոտերդամի կինոփառատոնին, Եվրոպական կինոշուկայում (Բեռլին), կազմակերպել «Կինոարտադրողների Համահայկական Ֆորում»: Բոլոր այս միջոցաժումները ավարտվել են արանց հաշվետվության և արդյունքների ներկայացման:

Հայաստանի Ազգային Կինոկենտրոնից ակնկալում ենք հաշվետվություն և տեղեկատվություն հայկական կինոնախագծերի վերաբերյալ:

Շարունակել ընթերցումը

Կինոիրադարձություններ

Գերմանիայի մայրաքաղաքում բացվել է Բեռլինի հոբելյանական միջազգային կինոփառատոնը

Հրապարակվել է

Փետրվարի 20-ին Գերմանիայի մայրաքաղաք Berlinale Palast-ում տեղի է ունեցել Բեռլինի միջազգային 70-րդ կինոփառատոնի բացման հանդիսավոր արարողությունը: Բացման ֆիլմ է դարձել կանադացի ռեժիսոր Ֆիլիպ Ֆալարդոյի «Սելինջերի իմ տարին» դրաման, որը ներկայացրել է ինքը՝ ռեժիսորը, ինչպես նաեւ գլխավոր դերերի կատարողները:

Երեկոն սառն էր, և կարմիր գորգի վրայով, դողալով, շրջում էին Սիգուրնի Ուիվերը, Մարգարետ Քուելին, Դուգլաս Բուտը, ինչպես նաև գլխավոր մրցույթի ժյուրիի անդամները՝ Բրիտանական թատրոնի և կինոյի դերասան Ջերեմի Այրոնսի գլխավորությամբ և շատ ուրիշներ:

Բեռլինում հոբելյանական ստուգատեսի բացումը մթագնվել է Գերմանիայի Խանաու քաղաքում տեղի ունեցած ահաբեկչական գործողության հետեւանքով: Արարողության սկզբում ներկաները մեկ րոպե լռությամբ հարգեցին զոհվածների հիշատակը: «Այս իրադարձությունը մեզ շատ մտահոգեց։ Ես ուզում էի այդքան շատ բան ասել Բեռլինալի մասին նրա հոբելյանի տարում, բայց ինձ համար դժվար է այլ բանի մասին մտածել, քան ողբերգության մասին», — հազիվ զսպելով արցունքները բեմից ասել է Բեռլինի գործադիր տնօրեն Մարիետա Ռիսենբեկը:

Արարողության վարող բուլղարացի եւ գերմանացի դերասան Սամուել Ֆինցին հանդես է եկել բուռն եւ քաղաքականապես ուղղված ելույթով, որը հիմնականում վերաբերել է ամբողջ աշխարհում միգրանտների աղետալի վիճակին: Բեմից հնչել են նաև խոսքեր բռնության և ռասիզմի դեմ։ Փառատոնի գեղարվեստական ղեկավար Կառլո Շատրիանը նշեց, որ կինոն պետք է մերձեցնի մարդկանց, և երբ հանդիսատեսը նստած է կինոթատրոններում, ջնջվում են նրանց միջև եղած բոլոր տարբերությունները: Իսկ Գերմանիայի մշակույթի նախարար Մոնիկա Գրյուտերսի ելույթին արարողության հյուրերը հոտնկայս ծափահարեցին մի քանի րոպե: «Մենք պետք է միավորվենք և դիմադրենք։ Մենք երբեք եւ ոչ մի դեպքում չենք ենթարկվի բռնության եւ խտրականության ցանկացած դրսեւորման եւ մտադիր չենք համագործակցել նման ուժերի հետ», — ասել է Գյուտերսը:

Չնայած մռայլ բացմանը՝ Բեռլինալեի երեկոն, այնուամենայնիվ, հաջողվել է ավարտել լավատեսական նոտայով. Ֆիլիպ Ֆալարդոն բեմի վրա ներկայացրել է իր ֆիլմը՝ շրջապատված բոլոր փայլուն դերասանական կազմով։

Շարունակել ընթերցումը
Գովազդ
Գովազդ

Հարցում

Հունվարի ո՞ր ֆիլմն եք սպասում:

View Results

Loading ... Loading ...

Թրենդային

Copyright © 2019-2020 ԿինոՊրես

Բոլոր իրավունքները պաշտպանված են ՀՀ օրենսդրությամբ:
Կայքի հրապարակումների մասնակի կամ ամբողջական օգտագործման ժամանակ հղումը կայքին պարտադիր է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: