Netflix առցանց սթրիմինգային հարթակը դեկտեմբերին հայտարարել է, որ Ստամբուլում գրասենյակ կբացի 2021 թվականի երկրորդ կեսին: Այս մասին տեղեկացնում է Yeni Şafak կայքը:
Թուրքիայի մշակույթի և զբոսաշրջության նախարար Մեհմեթ Նուրի Էրսոյը ողջունել է այդ քայլը, քանի որ կինոարդյունաբերությունն ու հեռուստատեսությունը դարձել են առաջընթացի և մշակութային դիվանագիտության, ինչպես նաև երկրում տնտեսական ներդրման առանցքային գործիք:
«Այն փաստը, որ թուրքական սերիալներն ու ֆիլմերը կարելի է դիտել 190 երկրներում, կնպաստի երկրի կինոտուրիզմի զարգացմանը», – ասել է Էրսոյը:
Netflix-ի համահիմնադիր և գլխավոր գործադիր տնօրեն Ռիդ Հասթինգսը նշել է, որ այս որոշումը հստակ ցույց է տալիս ընկերության հավատարմությունը Թուրքիային: Այս քայլը կնպաստի Netflix-ի թուրքական արտադրությանը, որից կօգտվեն ամբողջ աշխարհում, ընդգծել է Հասթինգսը:
«Թուրքիան մեզ համար շատ արժեքավոր է իր հարուստ մշակույթով և պատմություն պատմելու խորապես արմատավորված ավանդույթով։ Դրա համար էլ մենք հպարտությամբ գրասենյակ ենք բացում հրաշալի քաղաք Ստամբուլում», – ասել է նա։
«Թուրքական հետաքրքիր պատմությունները պատմելու մեր հուզմունքը տալիս է ուժ մեր ապագա ներդրումների համար», – ասել է Փելին Դիսթասը, Netflix-ի համար թուրքական բնօրինակ բովանդակության գծով տնօրենը:
Netflix-ի օրիգինալ եւ լիցենզավորված թուրքական արտադրանքները դիտում են հիմնականում ԱՄՆ-ում, Արգենտինայում, Ավստրալիայում, Մեծ Բրիտանիայում, Բրազիլիայում, Ֆրանսիայում, Հնդկաստանում, Իսպանիայում, Իտալիայում, Կանադայում, Կոլումբիայում, Մեքսիկայում, Լեհաստանում, Սաուդյան Արաբիայում և Չիլիյում:
Վերջին տարիներին թուրքական հեռուստասերիալները դիտարկվում են որպես «փափուկ ուժի» թուրքական դիվանագիտության մաս, ընդ որում սերիալները մեծ ժողովրդականություն են վայելում ամբողջ աշխարհում:
Թուրքիայում արդեն գործում են The Walt Disney Company և Warner Bros. հոլիվուդյան ստուդիաների ստորաբաժանումները:
Հիշեցնենք, որ հոկտեմբերին Netflix-ը սկսել է համագործակցել Ռուսաստանի հետ, սակայն որոշակի նրբություններով: Ընկերությունը գրասենյակ չի բացել: Ծառայության ռուսաստանյան գործընկեր է դարձել «Ազգային մեդիա խումբ» ընկերությունը, որը Ռուսաստանի խոշորագույն մեդիահոլդինգներից մեկն է:
Ստորագրված համաձայնագրի պայմանները ներառում էին ծառայության ինտերֆեյսի ռուսերեն տեղայնացումը, ռուբլիով սակագնային ցանցի մշակումը և կրկնօրինակված և ենթագրերով բովանդակության ծավալների ավելացումը:
