Ջիվան Ավետիսյանի «Դրախտի դարպասը» կինոնկարը ընդգրկվել է Մոսկվայի 42-րդ միջազգային կինոփառատոնում, որտեղ կկայանա ժապավենի համաշխարհային պրեմիերան: Այս մասին ռեժիսորը կիսվել է իր ֆեյսբուքյան էջում:
Ֆիլմի տեղական պրեմիերան կայացել է 2019 թվականի հոկտեմբերին, որտեղ ներկա էր նաև Հայաստանի վարչապետ Նիկոլ Փաշինյանը, իշխանության այլ ներկայացուցիչներ, կինոհանրությունն ու բազմաթիվ հյուրեր:
ՄՄԿՓ-ի ընտրող հանձնաժողովն իր առանձնահատուկ հետաքրքրությունն ու հիացմունքն է ցուցաբերել «Դրախտի դարպասը» ֆիլմին․ այն կցուցադրվի կինոփառատոնի պաշտոնական, արտամրցութային ծրագրում՝ հոկտեմբերի 4-ին։
Արցախյան թեմայով Ջիվան Ավետիսյանի ֆիլմը՝ ստեղծագործական և արտադրական միջազգային մեծ կազմով, մեծ ճանաչման դերասանական և պրոդյուսերական թիմով, միջազգային համագործակցության լուրջ գործակցությամբ արծարծում է համամարդկային խնդիրներ՝ միաժամանակ ներկայացնելով պատերազմի ու խաղաղության դեմքը:
Գերմանացի լրագրողը 2016-ին վերադառնալով Արցախ՝ լուսաբանելու քսաներկու տարվա ընդմիջումից հետո վերսկսված պատերազմը, հանդիպում է արցախցի երիտասարդ օպերային երգչուհուն և կարծես թե արթնանում են փոխադարձ սիրային զգացմունքներ, մանավանդ, որ հարթ չեն հերոսների անձնական կյանքերը, սակայն պարզվում է, որ երգչուհին անհայտ կորած արցախցի ֆոտոլրագրողի աղջիկն է, ում 1992-ին՝ Թալիշի անկման օրը, գերմանացի լրագրողը թողնում է գյուղում՝ գերության մեջ՝ յուրացնելով նրա մարտի դաշտում արված լուսանկարները:
Սեպտեմբերի 21-ին տեղի ունեցավ Մոսկվայի միջազգային 42-րդ կինոփառատոնի մամուլի ասուլիսը, որի ընթացքում կազմակերպիչները ներկայացրին ֆիլմերի ծրագիրը և ժյուրիի կազմը:
Հիշեցնենք, որ Մոսկվայի միջազգային կինոփառատոնը, որն ավելի վաղ պլանավորված էր ապրիլի 22-29-ը, տեղափոխվել է հոկտեմբերի սկիզբ: ՄՄԿՓ-ն կանցկացվի հոկտեմբերի 1-8-ը:
