2025 թվականի փետրվարի 13-ի ՀՀ կառավարությունը ընդունեց «Եվրասիական Կինոակադեմիայի ստեղծման մասին 1997 թվականի մարտի 27-ի հիմնադիր պայմանագրի գործողության դադարման մասին» արձանագրության ստորագրման առաջարկությանը հավանություն տալու մասին Ն 128-Ա որոշումը:
Այս որոշման հիմք է ընդունվել «Միջազգային պայմանագրերի մասին» Հայաստանի Հանրապետության օրենքի 7-րդ հոդվածի 1-ին մասը:
Այս քայլը հիմնավորվում է հետևյալ կերպ՝
«Եվրասիական կինոակադեմիայի ստեղծման մասին» 1997 թվականի մարտի 27-ին ստորագրված հիմնադիր համաձայնագիրը ուժը կորցրած ճանաչելու մասին» արձանագրության (այսուհետ՝ Արձանագրություն) նպատակն է ճանաչել «Անկախ պետությունների համագործակցության մասնակից պետությունների մշակութային համագործակցության աջակցության հիմնադրամի ստեղծման մասին» 1997 թվականի մարտի 27-ի հիմնադիր համաձայնագիրը (այսուհետ՝ Համաձայնագիր) ուժը կորցրած:
Համաձայնագրի նպատակն էր զարգացնել ժամանակակից բազմազգ կինոմշակույթը, պահպանել ազգային կինեմատոգրաֆի ավանդույթները և ընդլայնել այն՝ նոր թափ հաղորդելով Անկախ պետությունների համագործակցության անդամ երկրներում մշակույթի ոլորտում համագործակցության և փոխգործակցության զարգացմանը:
Արձանագրության կնքման անհրաժեշտությունը պայմանավորված է Համաձայնագրի՝ արդիականությունը կորցրած լինելու հանգամանքով:
Արձանագրության կնքումը բխում է նաև ՀՀ կառավարության 2021 թվականի օգոստոսի 18-ի N 1363-Ա որոշմամբ հաստատված Հայաստանի Հանրապետության կառավարության ծրագրի «1.1 Արտաքին քաղաքականություն» բաժնի 15-րդ ենթակետից («Հայաստանը շարունակելու է ակտիվ մասնակցել ԱՊՀ շրջանակներում համագործակցությանը և կազմակերպությունում ընթացքող գործընթացներին:»):
Ելնելով վերոգրյալից՝ Հայաստանի Հանրապետության կրթության, գիտության, մշակույթի և սպորտի նախարարությունը նպատակահարմար է համարում Արձանագրության կնքումը:
Հիշեցնենք, որ ԱՊՀ-ի շրջանակում Եվրասիական կինոակադեմիան հիմնադրվել է 1997 թվականի մարտի 27-ին Ղազախստանի նախաձեռնությամբ: Փաստաթուղթը ստորագրել է նաև Հայաստանը, ի դեմս ՀՀ կառավարության աշխատակազմի ղեկավար-նախարար Գագիկ Շահբազյանի: Իհարկե մեծ հարցականի տակ է այս կառույցի իրական գոյությունը և 27 տարում կատարած աշխատանքը:
Կինոակադեմիայի կանոնադրության 2-րդ բաժնի 2-րդ կետի համաձայն՝ կազմակերպությունը պետք է նախապատրաստեր և հրատարակեր «ԱՊՀ մասնակից պետությունների ազգային կինեմատոգրաֆիաների զարգացման մասին» ամենամյա վերլուծական զեկույցը, մշակեր առաջարկություններ կինոարվեստի զարգացման վերաբերյալ, անցկացներ սեմինարներ, փառատոններ, վարպետության դասեր, շնորհեր Կինոակադեմիայի մրցանակները, հիմնադրեր դրամաշնորհներ և ստեղծեր հատուկ հիմնադրամներ ազգային կինեմատոգրաֆիաների զարգացման համար, տպագրեր կինեմատոգրաֆիայի հիմնախնդիրների վերաբերյալ տպագիր նյութեր:
2024 թվականի ռուսական Արգումենտի ի Ֆակտի լրատվականը տեղեկացրեց, որ 2025 թվականի հոկտեմբերին առաջին անգամ հանձնվող «Ադամանդե թիթեռ» Եվրասիական կինոմրացնակի մրցանակային ֆոնդը կազմում է 1 մլն. ԱՄՆ դոլար: Այս «թիթեռը» Նիկիտա Սերգեևիչը նկարում էր դեռևս 2022 թվականից:
