Marvel Studios-ի «Վրիժառուներ. Դատաստանի օր» (Avengers: Doomsday) ֆիլմը Վրաստանի կինոթատրոններում կցուցադրվի 2026 թվականի դեկտեմբերի 17-ից՝ չնայած Հայաստանի և ԱՊՀ մի շարք երկրների համար հայտարարված հունվարի 7-ի պրեմիերային։ Վրացական Cavea կինոթատրոնների ցանցն արդեն սկսել է տոմսերի վաճառքը՝ նախատեսելով ցուցադրություններ ինչպես անգլերեն, այնպես էլ վրացերեն կրկնօրինակմամբ։ «ԿինոՊրեսի» դիտարկմամբ՝ առաջին հինգ օրերի սեանսների տոմսերի մեծ մասն արդեն վաճառված է։
Նոյեմբերի 5-ին «ԿինոՊրեսը» հաղորդել էր, որ Cavea-ի կայքում պահպանվում է դեկտեմբերի 17-ի ամսաթիվը՝ չնայած տարածաշրջանային պրեմիերայի հետաձգմանը։ Այն ժամանակ դեռ պարզ չէր՝ Վրաստանը կպահպանի նախնական ժամանակացույցը, թե կինոթատրոնների ցանցը պարզապես չի թարմացրել իր խաղացանկը։ Այժմ վաճառքի մեկնարկն ու հրապարակված սեանսները հաստատում են, որ վրացական կինովարձույթը պատրաստվում է դեկտեմբերյան պրեմիերային։
Հատկանշական է, որ տարածաշրջանային դիստրիբյուտոր ASCAR Cinema-ն Վրաստանը նույնպես նշում է իր գործունեության աշխարհագրության մեջ։ Մինչդեռ Հայաստանում և ԱՊՀ մի շարք երկրներում ֆիլմի թողարկումը նշանակված է հունվարի 7-ին՝ համաշխարհային պրեմիերայից 20 օր անց։
Վրաստանի օրինակը նոր հարցեր է առաջացնում տարածաշրջանային դիստրիբյուցիայի վերաբերյալ։ Եթե ֆիլմը կարող է դեկտեմբերին ցուցադրվել վրացերեն կրկնօրինակմամբ, ապա արդյո՞ք մյուս շուկաներում հետաձգումը պայմանավորված է ռուսերեն լեզվական տարբերակի տարածման ռազմավարությամբ կամ Ռուսաստանի կինոշուկայի տնտեսական շահերով։
Նախորդ հրապարակման մեջ «ԿինոՊրեսն» անդրադարձել էր Ռուսաստանի ստվերային կինովարձույթի հնարավոր ազդեցությանը պրեմիերայի տեղափոխման վրա։ Վրաստանում դեկտեմբերյան ցուցադրությունների մեկնարկի հաստատումն ուժեղացնում է տարածաշրջանային որոշման տնտեսական հիմնավորվածության վերաբերյալ հարցերը, թեև հետաձգման իրական պատճառները դիստրիբյուտորը դեռ չի պարզաբանել։
