Առաջին ընթերցմամբ քննարկվել է ՀՀ ԱԺ պատգամավորներ Աննա Կոստանյանի, Մխիթար Հայրապետյանի, Վահագն Թևոսյանի, Արթուր Մանուկյանի և Արման Եղոյանի հեղինակած «Կինեմատոգրաֆիայի մասին» օրենքի նախագիծը՝ կից օրենսդրական փաթեթով:
Համահեղինակ Աննա Կոստանյանի խոսքով՝ նախագծերի առկայությունը պայմանավորված է կինեմատոգրաֆայի ոլորտի համապարփակ կարգավորման և միասնական իրավական հիմքերի սահմանման անհրաժեշտությամբ: Ըստ հեղինակների՝ անհրաժեշտ է կանոնակարգել ֆիլմարտադրության, ֆիլմերի վարձույթի, ցուցադրման, կինոփառատոներում ու կինոշուկաներում մասնակցության պետական ֆինանսավորման, օտարերկրյա ներդրումների համար բարենպաստ պայմանների ստեղծան նպատակով հավաստագրերի տրամադրման, հեղինակային ու հարակից իրավունքների պաշտպանության, ֆիլմերի վիճակագրական հաշվառման ու պահպանության նպատակով վարձույթի վկայականների տրամադրման, տարիքային սահմանափակման մասին դիտողներին տեղեկացնելու նպատակով ֆիլմերի դասակարգման, ՀՀ կառավարության, մշակույթի ոլորտում կառավարության լիազորած պետական կառավարման մարմնի, կինեմատոգրաֆիայի ազգային մարմնի և կինեմատոգրաֆիայի ոլորտի տեղական և միջազգային կազմակերպությունների միջև համագործակցության հետ կապված հարաբերությունները:
Ըստ զեկուցողի՝ «Կինեմատոգրաֆիայի մասին» օրենքի նախագծի ընդունումը, որով նաև հարկային արտոնություններ են տրվելու կինոյի ոլորտին, նպաստելու է կինոարտադրության զարգացմանն ու ներդրումների ներգրավմանը:
ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի դրական եզրակացությունը ներկայացրել է Արթուր Մանուկյանը՝ նշելով կինոարվեստի առանձնահատուկ դերակատարությունը մարդկանց կյանքում:
ՀՀ ԿԳՄՍ նախարարի տեղակալ Արայիկ Խզմալյանը ներկայացրել է Կառավարության կարծիքը՝ տեղեկացնելով, որ Կառավարությունն ունի որոշ առարկություններ և առաջարկներ, որոնց թվում է նաև կինոոլորտին հարկային արտոնությունների տրամադրման նպատակահարմարությունը: Ըստ նրա՝ անհասկանալի է, թե ինչու պետք է առանձնահատուկ մոտեցում ցուցաբերվի կինոյի ոլորտին:
Կառավարության որոշման հետ կարող եք ծանոթանալ այստեղ:
