ՀՀ կրթության, գիտության, մշակույթի և սպորտի նախարար Ժաննա Անդրեասյանի գլխավորած պատվիրակությունը հուլիսի 21-ին եռօրյա այցով մեկնել է Հունաստանի Հանրապետություն՝ Աթենք։ Պատվիրակության կազմում էր նաև Հայաստանի կինոյի հիմնադրամի տնօրեն Դավիթ Բանուչյանը։
Հուլիսի 22-ին Հայաստանի կինոյի հիմնադրամը և Հունաստանի կինոյի, տեսալսողական տեխնոլոգիաների և ստեղծարարության կենտրոնը ստորագրել են փոխըմբռնման հուշագիր, որը հիմք է հանդիսանում կինոյի և տեսալսողական մեդիայի ոլորտում միջազգային մշակութային համագործակցության ամրապնդման համար։
Հայաստանի կինոյի հիմնադրամի տնօրեն Դավիթ Բանուչյանը և Հունաստանի կինոյի, տեսալսողական տեխնոլոգիաների և ստեղծագործության կենտրոնի գործադիր տնօրեն Լեոնիդաս Խրիստոպուլոսը, առաջնորդվելով կինոմշակույթի և տեսալսողական գործունեության ոլորտում համագործակցությունը խորացնելու, ինչպես նաև երկու երկրների միջև համատեղ կինոարտադրությունը խթանելու ու ամրապնդելու փոխադարձ շահագրգռվածությամբ, ստորագրել են համագործակցության հուշագիր, որը նախատեսում է՝
կինո և տեսալսողական գործունեության խթանում, մշակութային կապերի ամրապնդում, ինչպես նաև երկու երկրների միջև համատեղ ֆիլմերի արտադրության խրախուսում.
հնարավորություն՝ Հունաստանում կազմակերպելու Հայաստանի կինոյի հիմնադրամի ցուցադրական ծրագիր, և հնարավորություն՝ Հայաստանում ներկայացնելու Հունաստանի կինոյի, տեսալսողական տեխնոլոգիաների և ստեղծագործական կենտրոնի «Ստեղծարար Հունաստան» ցուցադրական ծրագիրը.
կինոարտադրության ոլորտում երկկողմ համագործակցության բարելավմանն ու հետագա զարգացմանը միտված կրթական և թրեյնինգային ծրագրերի, վարպետության դասերի և թեմատիկ քննարկումների իրականացում.
երկու երկրներում համագործակցության ծրագրերի խթանում.
երկու երկրների կինոմասնագետների միջև կապերի հաստատում.
պարբերական խորհրդատվությունների, տեղեկատվության, փորձի և նոու-հաուի փոխանակման կազմակերպում.
համագործակցության ծրագրի իրականացման հետ կապված կազմակերպչական և տեխնիկական ասպեկտների համատեղ համակարգում:
Փոխըմբռնման հուշագրի ստորագրումը կայացել է ՀՀ կրթության, գիտության, մշակույթի և սպորտի նախարար Ժաննա Անդրեասյանի և Հունաստանի մշակույթի նախարար Լինա Մենդոնիի աշխատանքային հանդիպման շրջանակում՝ վերջինիս Աթենք կատարած պաշտոնական այցի ընթացքում։
Պատվիրակությունն այցելել է Բենակի թանգարան, Ստավրոս Նիարխոս հիմնադրամ, Ակրոպոլիսի թանգարան և Աթենքի հնագիտական թանգարան,
Այս համագործակցությունն ընդգրկված է Հայաստանի և Հունաստանի միջև ստորագրված չորս համաձայնագրերի ավելի լայն շրջանակում:
