Հայաստանի կրթության, գիտության, մշակույթի և սպորտի նախարարությունում մարտի 13-ին կայացել է Հայաստանի կինոյի հիմնադրամի հոգաբարձուների խորհրդի նիստը։ Նախարարության տարածած հաղորդագրության համաձայն՝ նիստն անցկացվել է առցանց ձևաչափով, այն վարել է ԿԳՄՍ նախարար, խորհրդի նախագահ Ժաննա Անդրեասյանը։
Նիստին մասնակցել են հոգաբարձուների խորհրդի անդամներ Սառա Նալբանդյանը՝ կինոքննադատ, մշակութաբան, դրամատուրգ, սցենարիստ, արվեստագիտության թեկնածու և Երևանի թատրոնի և կինոյի պետական ինստիտուտի ռեկտոր, ինչպես նաև առցանց ձևաչափով միացել են Աննա Երզնկյանը՝ կինոգետ, ՀՀ արվեստի վաստակավոր գործիչ, պրոֆեսոր և Հայաստանի կինոգործիչների միության քարտուղար, Ռուզաննա Յուզբաշյանը՝ կինոգետ, և Աշոտ Ադամյանը՝ կինոյի և թատրոնի դերասան, բեմադրիչ։
Օրակարգում ընդգրկված են եղել հիմնադրամի 2025 թվականի գործունեությանը վերաբերող մի շարք հարցեր, այդ թվում՝ տարեկան բովանդակային հաշվետվության հաստատումը, ինչպես նաև կազմակերպչական բնույթի այլ հարցեր։ Նիստին մասնակցել են հիմնադրամի ղեկավարությունը և հոգաբարձուների խորհրդի անդամները։
Հիմնադրամի տնօրեն Դավիթ Բանուչյանը ներկայացրել է 2025 թվականի աշխատանքների հիմնական ուղղությունները՝ նշելով, որ անցած տարին եղել է ոլորտի համար անցումային շրջան՝ Հայաստանի ազգային կինոկենտրոնի վերակազմակերպումից հետո։ Նրա խոսքով՝ այդ փուլը պահանջել է ոչ միայն կառուցվածքային փոփոխություններ, այլև նոր գործիքների և մեխանիզմների ներդրում։
Ներկայացված հաշվետվության համաձայն՝ 2025 թվականին ընդունվել և գործարկվել են «Կինեմատոգրաֆիայի մասին» օրենքից բխող մի շարք կարևոր կարգավորումներ։ Մասնավորապես, ստեղծվել է ազգային կինոռեեստրը, ներդրվել է վարձույթի վկայականների տրամադրման կարգը, ինչպես նաև գործարկվել է ներդրումների մասնակի վերադարձի՝ Cash Rebate համակարգը, որը միտված է տեղական և միջազգային արտադրությունների ներգրավմանը։
Դավիթ Բանուչյանը նաև հայտնել է, որ նախորդ տարվա վերջին կինեմատոգրաֆիստների մասնակցությամբ մշակվել է նոր կանոնակարգ, որը ներկայացվել է ԿԳՄՍ նախարարության հաստատմանը։ Ըստ նրա՝ 2026 թվականին ազգային ֆիլմերի աջակցության մրցույթը նախատեսվում է անցկացնել արդեն այդ նոր կանոնակարգով։
Նիստի ընթացքում օրակարգային հարցերի վերաբերյալ զեկույցով հանդես է եկել նաև հիմնադրամի աշխատակազմի ղեկավար Արտակ Պողոսյանը։ Քննարկումից և հարցուպատասխանից հետո հոգաբարձուների խորհուրդը հաստատել է ներկայացված հաշվետվություններն ու զեկույցները։
Նախարարության հաղորդագրության մեջ նաև ընդգծվում է կինոհամայնքի, մասնագիտական կառույցների և կինոգործիչների հետ համագործակցության կարևորությունը։ Առանձին շեշտադրվել է նաև կինոկրթության ուղղությունը, ինչպես նաև մարզերի երիտասարդների ներգրավվածությամբ իրականացվող ծրագրերի նշանակությունը։
Միևնույն ժամանակ, նախարարության հրապարակած հաղորդագրությունը չի պարունակում հիմնադրամի աշխատանքի արդյունքների մանրամասն քանակական տվյալներ՝ ներառյալ ֆինանսավորման ծավալները, աջակցված նախագծերի թիվը կամ առանձին ծրագրերի ցուցանիշները։
