Տաջիկստանում գործարկվել է ազգային առցանց կինոհարթակ՝ tojikfilm.tv, որը մշակվել է պետական «Տաջիկֆիլմ» հաստատության կողմից՝ միջազգային թվային ստանդարտներին համապատասխան։ Հարթակը նախատեսված է ապահովելու բարձր որակով ֆիլմերի ցուցադրում և հասանելիություն ինչպես երկրի ներսում, այնպես էլ աշխարհի տարբեր երկրներում։
Նոր հարթակի միջոցով օգտատերերը կարող են դիտել տաջիկական արտադրության ֆիլմեր՝ առանց աշխարհագրական սահմանափակումների։ Կատալոգում ընդգրկված են ավելի քան 200 գեղարվեստական և վավերագրական ֆիլմեր՝ ներառյալ դասական ժառանգությունը և անկախության շրջանի ժամանակակից կինոնկարներ։ «Տաջիկֆիլմ»-ի տվյալներով՝ հավաքածուն շարունակաբար կհամալրվի նոր ֆիլմերով։
Հարթակի գործարկման մասին դեռևս փետրվարին՝ Նովրուզի օրերին ընդառաջ կազմակերպված մամուլի ասուլիսում հայտարարել էր «Տաջիկֆիլմ»-ի տնօրեն Մահմադսաիդ Շոխիյոնը։ Նշվել է, որ Տաջիկստանի Հանրապետության կառավարությանն առընթեր Հակամենաշնորհային ծառայության հետ համաձայնեցմամբ հարթակի ամսական բաժանորդագրության արժեքը սահմանվել է 10 սոմոնի (մոտ 1 դոլարի)։ Այդ գումարի դիմաց օգտատերերը ստանում են ամբողջական հասանելիություն հարթակում ներկայացված բոլոր ազգային ֆիլմերին։
Նախաձեռնության հիմնական նպատակն է տաջիկական կինոյի տարածումն ու հանրահռչակումը՝ այն դարձնելով հասանելի միջազգային լսարանի համար։ Հարթակը հասանելի է նաև բջջային հավելվածների միջոցով՝ App Store և Google Play խանութներում։
