Ֆիլմարտադրողների ասոցիացիաների միջազգային ֆեդերացիաի (FIAPF) հավատարմագրման համակարգի խոշոր բարեփոխման արդյունքում «Ոսկե ծիրան» Երևանի միջազգային կինոփառատոնը առաջին անգամ ընդգրկվել է կազմակերպության հավատարմագրված փառատոների ցանկում, մինչդեռ 17 փառատոն ստացել են պաշտոնական «A-list» դասակարգում։
Ինչպես հայտնում է ScreenDaily-ն, Ֆիլմարտադրողների ասոցիացիաների միջազգային ֆեդերացիան (FIAPF) 2007 թվականից ի վեր իրականացրել է իր հավատարմագրման համակարգի ամենախոշոր վերափոխումը՝ ձևավորելով հավատարմագրված փառատոների մեկ միասնական ցանկ և վերադարձնելով պաշտոնական «A» դասակարգումը։
Նոր համակարգով «A-list» կարգավիճակ են ստացել 17 բարձր ազդեցություն ունեցող փառատոններ, այդ թվում՝ Կաննը, Բեռլինը, Վենետիկը, Լոկառնոն, Սան Սեբաստիանը, ինչպես նաև առաջին անգամ՝ Տորոնտոն, Անեսին, Կլերմոն-Ֆերանը և Բուսանը։
Այս համատեքստում կարևոր է տարբերակել, որ «Ոսկե ծիրանը» ներառվել է հենց FIAPF-ի հավատարմագրված փառատոների ընդհանուր ցանկում, սակայն չի դասվել «A-list» փառատոների շարքին։ Այն վեց նոր ընդգրկված փառատոններից մեկն է, ինչը արտացոլում է FIAPF-ի նոր մոտեցումը՝ ուղղված ավելի բազմազան և աշխարհագրորեն հավասարակշռված փառատոնային քարտեզի ձևավորմանը։
Հայաստանի համար սա կարևոր միջազգային ճանաչում է, քանի որ «Ոսկե ծիրանի» ընդգրկումը կարող է բարձրացնել հայկական կինոփառատոնային միջավայրի տեսանելիությունը, ամրապնդել միջազգային ինստիտուցիոնալ վստահությունը և ընդլայնել Երևանի դերը որպես տարածաշրջանային կինոհարթակ։
