«Ֆիլմարտադրողների Համահայկական Ֆեդերացիա» հասարակական կազմակերպությունը, որպես Հայաստանում կինոյի զարգացմանը խթանող, կինոյի պետական կառավարման համակարգի արդյունավետ գործունեությանը նպաստող, ֆիլմերին տրվող պետական աջակցության բաշխման ազնիվ, թափանցիկ և մրցակցային համակարգի ապահովմանը սատարող, հայազգի ֆիլմարտադրողներին միավորող և ֆիլմարտադրողների իրավունքները պաշտպանող կառույց, ողջունում է ՀՀ Կառավարության՝ «Հայաստանի ազգային կինոկենտրոն» ՊՈԱԿ-ը Հայաստանի կինոյի հիմնադրամի վերակազմավորելու և կանոնադրությունը հաստատելու մասին, 2024 թվականի մայիսի 2-ի Հ․ 618 — Ա որոշումը։
Ֆեդերացիան շնորհավորում է Դավիթ Բանուչյանին՝ Հիմնադրամի տնօրենի ժամանակավոր պաշտոնակատար նշանակվելու կապակցությամբ, հուսալով, որ պարոն Բանուչյանի գործունեությունը միտված կլինի կինոյի պետական կառավարման դաշտում քրոնիկ բնույթ կրող թերությունների՝ կառավարող կառույցի ուռճացված հաստիքակազմի և մասնագիտական ցածր որակավորման, կամայական կառավարման, պետության կողմից ֆինանսավորվող ֆիլմերի քանակի և արտադրական հնարավորությունների անհամաչափության, ոչ պատշաճ վերահսկողության, հաշվետվողականության բացակայության դեմ, և կնպաստի մեր կողմից բազմիցս հանրայնորեն բարձրաձայնված կնճիռների վերացմանը, կհանգեցնի կինոարտադրության դաշտում օրենքի գերակայության հաստատմանը, միջազգային արդյունավետ փորձի կիրառմանը, որոշումների կայացման գործում փորձագետների ներգրավվածությանը, փոխգործակցության, ազնիվ մրցունակության մթնոլորտի ապահովմանը և ՀՀ կառավարության որոշման մեջ նշված նպատակների իրագործմանը։
Ֆեդերացիան դրական է գնահատում Ֆեդերացիա – ՀՀ կրթության, գիտության, մշակույթի և սպորտի նախարարություն շփումների պարբերականությունն ու համագործակցության ընթացքը, ինչի արդյունքում Ֆեդերցիան ՀՀ ԿԳՄՍ նախարարությանն է փոխանցել կինոյի կառավարման բարեփոխումների իր առաջարկ – փաթեթը, որի ամբողջական քննարկումը ակնկալում ենք ունենալ առաջիկայում՝ նախարարության հարկի ներքո։
ՖԱՀՖ խորհուրդ
Սաթիկ Ստեփանյան | Խորհրդի Քարտուղար
Մերի Ադամյան | Խորհրդի անդամ
Արամ Մանուկյան| Խորհրդի անդամ
Կարեն Ծատուրյան| Խորհրդի անդամ
Հովհաննես Գալստյան | Խորհրդի նախագահ
