Ապրիլի 16-ը Հայաստանում պաշտոնապես նշվում է որպես Հայ կինոյի օր: Օրվա շրջանակում ԿԳՄՍ նախարար Ժաննա Անդրեասյանը Հայաստանի կինոգործիչների միությունում հանդիպել է կինոոլորտի ներկայացուցիչների հետ: Հանդիպմանը ներկա են եղել ԿԳՄՍ նախարարի տեղակալ Դանիել Դանիելյանը, Հայաստանի կինոգործիչների միության նախագահ, «Ոսկե ծիրան» միջազգային կինոփառատոնի հիմնադիր Հարություն Խաչատրյանը և Հայաստանի կինոյի հիմնադրամի տնօրեն Դավիթ Բանուչյանը:
Ժաննա Անդրեասյանը շնորհավորել է կինոգործիչներին Հայ կինոյի օրվա կապակցությամբ և շնորհակալություն հայտնել համատեղ իրականացրած ծավալուն աշխատանքի համար, որի արդյունքում կինոոլորտում արձանագրվել են մեծ ձեռքբերումներ և հաջողություններ։
Հանդիպման ընթացքում նախարարը կինոգործիչների հետ քննարկել է ոլորտին առնչվող մի շարք հարցեր, անդրադարձել օրենսդրական բարեփոխումների լավարկմանը և առաջարկել՝ պարբերական համդիպումների ձևաչափով համատեղ քննարկել գույքագրված հարցերն ու առաջարկությունները:
Նա նշել է, որ պետությունն ամուր կանգնած է կինոյի ոլորտի կողքին՝ ընդգծելով, որ պետական աջակցության ծրագրերն այս տարի նշանակալի աճել են. ոլորտին ուղղվել են 1 միլիարդից ավելի հատկացումներ: Խոսելով կինոոլորտի հաջողությունների մասին՝ Ժաննա Անդրեասյանն ընդգծել է բազմաթիվ հեղինակավոր կինոփառատոներում հայ կինոգործիչների գրանցած հաջողությունները: Այդ համատեքստում նա անդրադարձել է Երևանի «Ոսկե ծիրան» միջազգային կինոփառատոնին, որը 2026 թվականին ընդգրկվել է Կինոպրոդյուսերների ասոցիացիաների համաշխարհային ֆեդերացիայի (FIAPF) կողմից որակավորված 49 կինոփառատոների ցանկում:
