48-րդ Մոսկվայի միջազգային կինոփառատոնի շրջանակում, որը տեղի է ունենում ապրիլի 16-ից 23-ը, կկայանա Ալեքսանդր Սոկուրովի նոր՝ «Ռեժիսորի նոթատետրը» ֆիլմի ռուսաստանյան պրեմիերան։ Ֆիլմը ընդգրկված է «Հատուկ ցուցադրություններ» ծրագրում։
Ցուցադրությունը կկայանա ապրիլի 19-ին, «ԿԱՐՈ 11 Հոկտեմբեր» կինոթատրոնի 2-րդ դահլիճում։ Ֆիլմը հանդիսատեսին անձամբ կներկայացնի Ալեքսանդր Սոկուրովը։
«Ռեժիսորի նոթատետրը» հինգժամանոց աշխատանք է, որը ստեղծվել է ռեժիսորի օրագրային գրառումների հիման վրա, որոնք նա վարել է իր ողջ գիտակցական կյանքի ընթացքում։ Ֆիլմը ձևավորվել է որպես ժամանակի լայնածավալ տարեգրություն, որտեղ անձնականը միահյուսվում է պատմականի հետ, իսկ անհատական հիշողությունը դառնում է երկրի ճակատագրի և դարաշրջանի ընկալման միջոց։
Ֆիլմի համաշխարհային պրեմիերան կայացել է 2025 թվականին՝ Վենետիկի կինոփառատոնում։
Խոսելով իր նոր աշխատանքի մասին՝ Սոկուրովը նշում է, որ սա ոչ հրապարակախոսություն է, ոչ էլ քաղաքական հայտարարություն, այլ ժամանակի գեղարվեստական իմաստավորման փորձ։ Ռեժիսորի խոսքով՝ ֆիլմը պատմում է այն ժամանակի զգացողության մասին, որում ապրել են ինքը և իր ժամանակակիցները՝ անդրադառնալով Լենինգրադի կյանքին, աշխատավոր մարդկանց, գործարաններին, գյուղացիներին, մշակույթին, գիտությանը, տեխնիկային և այն պատմական գործընթացներին, որոնք ձևավորել են մեծ երկրի առօրյան։
Սոկուրովի խոսքով՝ ֆիլմում կարևոր տեղ են զբաղեցնում երաժշտությունը և պատմական փաստաթղթերը, որոնք վերաբերում են ոչ միայն Լենինգրադի կյանքին, այլև աշխարհում տեղի ունեցած իրադարձություններին։ Հեղինակի մտահղացմամբ՝ այս աշխատանքը կարող է կարևոր լինել նաև արտասահմանյան հանդիսատեսի համար, քանի որ այնտեղ կարելի է գտնել սեփական պատմության այնպիսի դրվագներ, որոնք վաղուց մոռացվել են կամ երբևէ ուշադրության չեն արժանացել։
Ֆիլմից կադրերն ու թրեյլերը հասանելի են կազմակերպիչների տրամադրած հղմամբ։
