Չորս տարի անց Տորոնտոյի միջազգային փառատոնում մեծ աղմուկ հանած Հայոց ցեղասպանության մասին «Խոստումը» ֆիլմը նոր հաղթանակներ է գրանցում: Օգոստոսի 1-ին հայտնի դարձավ, որ Netflix սթրիմինգային ծառայությունը կավելացնի կինոնկարը իր ֆիլմադարանում:
ԿինոՊրեսի հարցման արդյունքում Նեթֆլիքսը հայտնեց, որ ֆիլմը իր ամերիկյան օգտատերերին հասանելի կդարձնի օգոստոսի 4-ից (այսօր): Ինչպես նշում են ընկերությունում, 2019 թվականի նոյեմբերից «Խոստումը» հասանելի է դարձել Բրազիլիայում, Մեքսիկայում, Արգենտինայում (+ Լատինական Ամերիկայի որոշ երկրներում), Մեծ Բրիտանիայում, Իռլանդիայում եւ Կենտրոնական եւ Արեւելյան Եվրոպայում (Ռումինիա, Չեխիա, Հունգարիա, Սլովակիա և այլ.): Կախված երկրից, ֆիլմը հասանելի է անգլերեն, իսպաներեն, բրազիլական պորտուգալերեն, ռումիներեն: ԱՊՀ-ում ֆիլմը հասանելի է ռուսերեն լեզվով ԿինոՊոիսկ HD: Հայերեն ձայնային ճանապարհի հասանելիության վերաբերյալ մեր հարցին պատասխան չենք ստացել:
Ֆիլմի իրադարձությունները ծավալվում են Օսմանյան կայսրության վերջին օրերին: Ֆիլմը ներկայացնում է սիրային եռանկյունի Կոստանդնուպոլիս բժշկություն ուսումնասիրելու համար մեկնած հայ դեղագործ Միքայելի, Փարիզում սովորած հայ նկարչուհի Աննայի և ամերիկացի ֆոտոլրագրող Քրիսի միջև:
Ֆիլմը նկարահանվել է ամերիկահայ բարերար Քըրք Քըրքորյանի նախաձեռնությամբ: «Խոստումը» ֆիլմի համաշխարհային պրեմիերան տեղի է ունեցել 2016 թվականի սեպտեմբերի 11-ին՝ Տորոնտոյի միջազգային կինոփառատոնում: Հայաստանում ֆիլմի պրեմիերան տեղի է ունեցել 2017 թվականի ապրիլի 27-ին: Ֆիլմը ցուցադրվել է հայերեն, ռուսերեն և անգլերեն լեզուներով:
