Ուզբեկստանի մայրաքաղաք Տաշքենդում հոկտեմբերի 23–24-ը կանցկացվի Golden Globes Silk Road Tribute Gala-ն՝ «Ոսկե գլոբուս»-ի առաջին հատուկ միջոցառումը՝ նվիրված Կենտրոնական Ասիայի և Կովկասի կինոյի ու հեռուստատեսության ներկայացուցիչներին։
Միջոցառման նախապատրաստական աշխատանքների վերաբերյալ մանրամասներ է հրապարակել Ուզբեկստանի մշակույթի նախարարությունը։ Սեպտեմբերի 22-ին նախարար Օզոդբեկ Նազարբեկովը հանդիպել է LETO Production ընկերության ներկայացուցիչներ Դարյա Բոգդանովայի և Վիկտորիա Նովիսկայայի հետ։ Հանդիպման ընթացքում քննարկվել են Տաշքենդում նախատեսվող միջոցառման կազմակերպման և անցկացման հարցերը։
Ըստ Ուզբեկստանի մշակույթի նախարարության՝ միջոցառումը նախատեսված է Կենտրոնական Ասիայի և Կովկասի կինոյի ու հեռուստատեսության ոլորտում ստեղծագործական ձեռքբերումները միջազգային հարթակում ներկայացնելու, տարածաշրջանի երկրների միջև մասնագիտական կապերն ընդլայնելու և նոր համագործակցային նախագծերի համար հնարավորություններ ստեղծելու նպատակով։
Նախարարությունը միջոցառման կազմակերպմանը կմասնակցի որպես աջակցող կողմ, իսկ հիմնական կազմակերպչական գործընթացները կիրականացնեն միջազգային կազմակերպիչները։ Քննարկվում է նաև Ուզբեկստանի Կինեմատոգրաֆիայի գործակալությանը կազմակերպչական հարցերով պատասխանատու պետական մարմին նշանակելու հնարավորությունը։
Golden Globes-ը Silk Road Tribute Gala-ի ստեղծման մասին հայտարարել էր հունիսի 23-ին։ Միջոցառումն իրականացվում է Vivid Strategies-ի կողմից՝ Golden Globes-ի և տեղական գործընկեր LETO Productions-ի հետ համագործակցությամբ։ Ստեղծագործական զարգացման և մասնակիցների հետ աշխատանքի ուղղությամբ նախագծին ներգրավված է նաև Օրլանդո Ջոնը։
Golden Globes-ի նախագահ Հելեն Հոնը հայտարարել էր, որ Կենտրոնական Ասիան և Կովկասը հարուստ ստեղծագործական ավանդույթներ և նոր ձայներ ունեցող տարածաշրջաններ են, իսկ նախաձեռնության նպատակներից է այդ ստեղծագործողներին միջազգային հարթակում ներկայացնելը։
Golden Globes Silk Road Tribute Gala-ի ամբողջական ծրագիրը և այն կինոյի ու հեռուստատեսության գործիչների անունները, որոնք կարժանանան հատուկ գնահատանքի, առայժմ չեն հրապարակվել։ Golden Globes-ը հայտնել է, որ այդ մանրամասները կներկայացվեն ավելի ուշ։
