ՀՀ կրթության, գիտության, մշակույթի և սպորտի նախարարության տվյալներով՝ Հայաստանի կինոյի հիմնադրամը 2026 թվականի նոյեմբերին նախատեսում է Երևանում անցկացնել «Հայ կինոյի զարգացման համաժողով 2026»-ը։ Միջոցառման անցկացման համար պետական բյուջեից նախատեսված է 9 մլն 12 հազար դրամ՝ ներառյալ ԱԱՀ-ն։
Համաժողովը նախատեսվում է անցկացնել նոյեմբերի 1-15-ն ընկած ժամանակահատվածում Երևանում։ Փաստաթղթում կոնկրետ օրեր առայժմ չեն նշվում։
Նշվում է, որ ժամանակակից կինոարտադրությունում ֆիլմի հաջողությունը պայմանավորված է ոչ միայն ստեղծագործական և գեղարվեստական որակներով, այլև արդյունավետ կինոարտադրությամբ, ֆինանսավորման և համարտադրության հնարավորություններով, միջազգային շուկայում դիրքավորմամբ, տարածման ռազմավարությամբ, փառատոնային և մասնագիտական հարթակներում ներկայությամբ ու միջազգային գործընկերային ցանցերում ներգրավվածությամբ։
Համաժողովի շրջանակում նախատեսվում է մեկ հարթակում համախմբել պետական և ոլորտային կառույցների, կինոարտադրող ընկերությունների, կինոմասնագետների, միջազգային գործընկերների, սփյուռքի ներկայացուցիչների և ներդրողների։ Քննարկումների առանցքում պետք է լինեն կինոարտադրությունը, ֆինանսավորումը, համարտադրությունը, ենթակառուցվածքները, տարածումը և փառատոնային քաղաքականությունը։ Նպատակներից են ոլորտի ռազմավարական ուղղությունների հստակեցումը, միջազգային համագործակցության ընդլայնումը և հայկական կինոյի տեսանելիության բարձրացումը միջազգային շուկաներում։
Ծրագրով համաժողովը դիտարկվում է ոչ թե որպես մեկանգամյա միջոցառում, այլ որպես ավելի լայն գործընթացի մաս։ Այն պետք է նաև նախապատրաստական փուլ դառնա 2027 թվականի գարնանը նախատեսվող սփյուռքի և մշակույթի ներդրողների գագաթնաժողովի համար և մասնագիտական ու ռազմավարական հիմք ստեղծի հետագա ներդրումային քննարկումների, գործընկերությունների և ոլորտի զարգացման ծրագրերի համար։
Համաժողովի արդյունքներով նախատեսվում է մշակել ճանապարհային քարտեզ և ռազմավարական առաջարկությունների փաթեթ, որոնք հետագայում պետք է ներկայացվեն շահագրգիռ կողմերին, ոլորտային կազմակերպություններին և պետական կառույցներին։
Միջոցառման շրջանակներում նախատեսվում է անցկացնել առնվազն յոթ պանելային քննարկում։ Մասնակիցների նախատեսվող թիվը շուրջ 50 է, իսկ արտերկրից հրավիրված խոսնակներինը՝ 15։ Նախատեսված են նաև մեկ գործնական աշխատարան, առնվազն հինգ հեռուստատեսային հրապարակում, երեք գործընկեր կազմակերպության ներգրավում և որպես արդյունք՝ մեկ առաջարկությունների փաթեթ կամ ճանապարհային քարտեզ։
Միջոցառման համար նախատեսված 9 մլն 12 հազար դրամից 3 մլն 750 հազար դրամը նախատեսված է 15 մասնակցի ավիատոմսերի համար։ Ծախսերի ընդհանուր գումարը առանց ԱԱՀ-ի կազմում է 7 մլն 510 հազար դրամ, ԱԱՀ-ն՝ 1 մլն 502 հազար դրամ, իսկ վերջնական գումարը՝ 9 մլն 12 հազար դրամ։
Փաստաթղթում համաժողովի կոնկրետ օրակարգը, առանձին քննարկումների թեմաները, հրավիրվող խոսնակների անունները և անցկացման հստակ օրերը չեն ներկայացվում։
