Հայտնի են GAIFF Pro hամարտադրության շուկայի հաղթողները: Երևանի «Ոսկե ծիրան» միջազգային կինոփառատոնի GAIFF Pro կրթական-արտադրական հարթակն այս տարի ևս տեղի ունեցավ փառատոնի շրջանակում։ GAIFF Pro-ի համարտադրության շուկան այս տարի ներառում էր 17 ընտրված նախագծեր՝ 12-ը զարգացման փուլում և 5-ը՝ աշխատանքային մոնտաժային փուլում։ Աշխատանքները ներկայացված էին ավելի քան 10 երկրից՝ Հայաստան, Իրան, Վրաստան, Բրազիլիա, Արգենտինա, Եգիպտոս և Սաուդյան Արաբիա։ Համարտադրողների թվում են նաև Ֆրանսիան, Գերմանիան, Լիտվան, Կանադան և ԱՄՆ-ն։
Համարտադրության շուկայի գրան պրի մրցանակի արժանացավ միանգամից երկու նախագիծ՝ Օվսաննա Գևորգյանի «Երևանյան հիվանդությունը» (Հայաստան) և Սալեհ Քաշեֆիի «Վոլֆգանգը» (Ֆրանսիա, Իրան, Շվեյցարիա)։ Ժյուրիի հատուկ հիշատակման արժանացավ Լիլիթ Մովսիսյանի «UXXR: Արդյո՞ք կա սեքս ԽՍՀՄ-ից հետո» (Հայաստան) նախագիծը։ Հետարտադրության հատուկ հիշատակման արժանացավ Ամիր Էլ-Շենավիի «Ամերիկյան երազանք. Կապիտան Կաբոնգայի վերադարձը» (Եգիպտոս, Սաուդյան Արաբիա) նախագիծը։ Զարգացման շուկայի հատուկ հիշատակման արժանացան Սոֆիա Սահակյանի և Լուիզա Կալագյանի «Սուրճի մրուրի մեջ» (Բրազիլիա, Արգենտինա, Հայաստան) և Սոնա Խաչատրյանի «Գործընթաց» (Հայաստան) նախագծերը։
Short Cuts Nest–ի երրորդ թողարկումը՝ նվիրված հայկական կարճամետրաժ ֆիլմերի զարգացմանը, նպատակ ուներ խթան հանդիսանալ տեղական կարճամետրաժ կինոյի որակի բարելավման համար և նպաստել նոր հեղինակների ի հայտ գալուն։ Վեց ընտրված թիմերը մասնակցեցին անհատական աշխատարանների և կներկայացնեն իրենց նախագծերը Կինոկետ ընկերության կողմից սահմանված տեխնիկական սարքավորումների մրցանակի համար։
Լավագույն կարճամետրաժ նախագիծ ճանաչվեց Վահան Գրիգորյանի «Պատուհանը» (Հայաստան)։ Հատուկ հիշատակման արժանացավ Ալեքսիս Պազումյանի «Արան հեռանում է» (Հայաստան, Ֆրանսիա) նախագիծը։
Այս տարվա GAIFF Pro-ի ընտրությունը խիստ մրցակցային էր։ Ընտրական գործընթացն իրականացվել էր անկախ ընթերցողների՝ միջազգային առաջատար մասնագետների կողմից։
TorinoFilmLab-ի ComedyLab-ի գիտական ղեկավար, Cannes Makers-ի ստեղծագործական խորհրդատու, Venice Biennale College-ի վիզուալ խորհրդատու, Talents Sarajevo-ի փորձագետ Ալեք Ֆոն Բարգենը, FESTIVAL SCOPE PRO-ի և FESTIVAL SCOPE-ի համահիմնադիր, Sarajevo Film Festival-ի ծրագրավորող Ալեսանդրո Ռայան, ֆիլմերի քաղաքականության հարցերով խորհրդատու, Եվրիմաժում Հունաստանի ներկայացուցիչ Էլենի Ճանդրինուն 2025 թվականի արտադրական հարթակի հատուկ հյուրերն ու ժյուրիի անդամներն էին։
