«ՌեԱնիմանիա» անիմացիոն ֆիլմերի և պատկերապատման արվեստի միջազգային կինոփառատոնը՝ միանալով «Անեսի» (ANNECY) խոշորագույն միջազգային անիմացիոն կինոփառատոնի և Saqanima Georgian Animators Association-ի կազմակերպած 6-րդ անիմացիոն ֆիլմերի նախագծերի զարգացման և փիչինգի աշխատարանին, բացառիկ հնարավորություն է ընձեռնում Հայաստանի անիմացիոն ֆիլմարտադրողներին ներկայացնել իրենց նախագիծը՝ անիմացիոն ֆիլմերի նախագծերի զարգացման և փիչինգի աշխատարանի շրջանակում։ Աշխատարանը կիրականացվի առցանց ձևաչափով։
Անիմացիոն ֆիլմարտադրողները կներկայացնեն «ՌեԱնիմանիա»-ի դատին իրենց նախագծերը, և ուսումնասիրության արդյունքում «Անեսի» փառատոնի փորձագետների կողմից կընտրվի 6 անիմացիոն կինոնախագիծ։ «Անեսի» փառատոնի կողմից ընտրված պրոդյուսերը կժամանի Վրաստան և սեպտեմբերի 28-ից հոկտեմբերի 2-ը կվարի 5-օրյա թրեյնինգ ֆիլմարտադրողների համար։ Դասընթացները կվերաբերեն նախագծերի սցենարական, արտադրական աշխատանքներին, մարքեթինգին, բյուջեի կազմմանը և այլ մասնագիտական գիտելիքների ձեռք բերմանը:
Աշխատարանի արդյունքում ընտրված 1 լավագույն նախագիծը «Անեսի»-ի փորձագետների կողմից կընտրվի մասնակցելու «Անեսի» փառատոնի կինոշուկային, որը տեղի կունենա 2021 թվականի հունիսին։ «Անեսի» փառատոնի կողմից լավագույն նախագծի հեղինակը կստանա անվճար հավատարմագրման հնարավորություն, իսկ «ՌեԱնիմանիա»-ն կփորձի գտնել աջակիցներ, որպեսզի հաղթող մասնակիցը կարողանա մեկնել «Անեսի»:
Անհրաժեշտ փաստաթղթերի մասին տեղեկատվությունը ներկայացված է «ՌեԱնիմանիա» փառատոնի պաշտոնական կայքում։ Ծրագրին մասնակցելու վերջնաժամկետը սեպտեմբերի 14-ն է։
Ծրագրին կարող են դիմել տարբեր ձևաչափերի (կարճամետրաժ/լայնամետրաժ) անիմացիոն ֆիլմերի նախագծեր: Յուրաքանչյուր հեղինակ կարող է ներկայացնել միայն 1 նախագիծ: Ներկայացվող նախագիծը չպետք է լինի ուսումնական ծրագրի մաս կամ չի կարող նախապես գնված լինել հեռուստատեսության կողմից:
Հայտերը հնարավոր է ուղարկել applications@reanimania.com էլեկտրոնային հասցեով: Նշենք նաև, որ սա «ՌեԱնիմանիա» անիմացիոն ֆիլմերի և պատկերապատման արվեստի միջազգային կինոփառատոնի և «Անեսի» (ANNECY) խոշորագույն միջազգային անիմացիոն կինոփառատոնի առաջին նմանատիպ համագործակցությունը չէ։ 2018 թվականին Անեսին և «ՌեԱնիմանիան» Հայաստանում իրականացրել են Animation du Monde ծրագիրը: Փառատոնի շրջանակներում Հայաստան ժամանեցին Անեսիի փորձագետները՝ 5-օրյա վարպետաց դասընթացներ անցկացնելու 10 լավագույն նախագծերի և իրենց հեղինակների հետ:
