Փետրվարի 10-ին YouTube-ը հայտարարեց, որ այս գարնանը Հայաստանում կգործարկվի YouTube Partner Program-ը (YPP)՝ հնարավորություն տալով հայաստանցի ստեղծագործողներին պաշտոնապես դրամայնացնել իրենց բովանդակությունը։ Սա նշանակում է, որ տեղական հեղինակները կկարողանան միանալ հարթակի գլոբալ գործընկերային համակարգին՝ առանց այլ երկրների միջոցով գրանցվելու անհրաժեշտության։
YouTube-ը ընդգծում է, որ հարթակի հաջողությունը կախված է ստեղծագործողների հաջողությունից։ Ընկերության տվյալներով՝ վերջին չորս տարիներին ավելի քան 100 միլիարդ դոլար է վճարվել ստեղծագործողներին, արտիստներին և մեդիա ընկերություններին ամբողջ աշխարհում։ Հայաստանի ընդգրկումը ծրագրում ներկայացվում է որպես քայլ՝ աջակցելու տեղական ստեղծագործական տնտեսությանն ու բովանդակության միջազգային տեսանելիությանը։
Սակայն այս որոշումը ունի երկար նախապատմություն։ Դեռևս 2019 թվականին հայտարարվում էր, որ Հայաստանը փորձում է իրավական դաշտ տեղափոխել YouTube-ի և հայ օգտատերերի համագործակցությունը։ Այն ժամանակ խոսվում էր այն մասին, որ հայաստանյան ստեղծագործողները չեն կարողանում օգտվել ծրագրի վճարովի հնարավորություններից և ստիպված են գրանցվել այլ երկրներում՝ հիմնականում ԱՄՆ-ում կամ Ռուսաստանում։ Սա ոչ միայն ֆինանսական կորուստների էր հանգեցնում, այլև իրավական անորոշության․ օգտատերերը զրկված էին լիարժեք բողոքարկման և պաշտպանվածության մեխանիզմներից։
2023 թվականին թեման կրկին դարձավ հանրային քննարկման առարկա, երբ վարչապետ Նիկոլ Փաշինյանը ուղիղ եթերում անդրադարձավ դրամայնացման խնդրին և նշեց, որ Բարձր տեխնոլոգիական արդյունաբերության նախարարությունը խոստացել է համակարգը գործարկել 2024 թվականի առաջին կիսամյակից։ Այդ պահին հարցը հատկապես սրվել էր՝ հաշվի առնելով Ռուսաստանի նկատմամբ կիրառվող պատժամիջոցները, որոնց հետևանքով հայկական ալիքների զգալի լսարան այլևս չէր ապահովում եկամուտ։ Սակայն 2024 թվականի առաջին կիսամյակում համակարգը չի գործարկվել։
2024 թվականին արդեն նախարար Մխիթար Հայրապետյանը հանդիպել էր Google ընկերության ներկայացուցիչներին։ Քննարկումների շրջանակում անդրադարձ էր կատարվել Հայաստանում YouTube-ի դրամայնացման ակտիվացման խնդրին և Google-ի այլ ծառայությունների զարգացման հնարավորություններին։ 2025 թվականին ևս տեղի ունեցան նոր հանդիպումներ Google-ի պատվիրակության հետ, սակայն հրապարակային հաղորդագրություններում կոնկրետ ժամկետ չէր նշվում։
Այս համատեքստում YouTube-ի ներկայիս հայտարարությունը առաջին անգամ հնչում է որպես հստակ գործարկման ազդակ։ Դա կնշանակի ոչ միայն եկամտի օրինական և ուղիղ ստացման հնարավորություն, այլև Հայաստանի որպես տարածաշրջանի պաշտոնական ներկայացվածություն հարթակում, վիճակագրական տեսանելիություն և շուկայի թափանցիկություն։
