2026 թվականի պետական բյուջեն առաջին ընթերցումից հետո փոխվեց։ «Կինեմատոգրաֆիայի ծրագիր» բաժնում հայտնվեց «Կինոքաղաքի ստեղծում» միջոցառումը։ Ինչպես «ԿինոՊրես»-ին տեղեկացրին Հայաստանի Հանրապետության կրթության, գիտության, մշակույթի և սպորտի նախարարությունից, «11007. Կինոքաղաքի ստեղծում» բյուջետային միջոցառման շրջանակում Արմավիրի մարզում Մեծամորում նախատեսվում է ստեղծել նկարահանման տաղավարներ։ Խոսքը 19-րդ դարի վերջի և 20-րդ դարի սկզբի միջավայրեր վերարտադրող տաղավարների մասին է։ Նշվում են Բեռլին, Փարիզ, Էջմիածին, Երևան, Կոստանդնուպոլիս և այլ քաղաքներ։ Մանրամասները խոստանում են հրապարակել նախարարության կայքում առաջիկայում։
Մինչ այս պաշտոնական ձևակերպումները, Մեծամորում աշխատանքներն արդեն սկսվել են։ «Մեծամոր կինոքաղաք» նախաձեռնության էջից տեղեկանում ենք, որ կառուցվում է փարիզյան շենքի տիպի տաղավար։ Այն նախատեսված է «Օրդեր ֆիլմ փրոդաքշն» ընկերության «Գարունը դռան ետևում» ֆիլմի համար։ Հայ ֆրանսիական համատեղ արտադրությունը պատմում է Կոմիտասի մասին և ներառում է Երևանի և Էջմիածնի 19-րդ դարի վերջի և 20-րդ դարի սկզբի տեսարաններ։
Հրապարակային հաղորդագրություններում Մեծամորի նախագիծը ներկայացվում է որպես Հայաստանի կինոարդյունաբերության զարգացման կարևոր փուլ։ Նշվում է, որ այստեղ պետք է գործեն կինոստուդիաներ, հետարտադրական ծառայություններ, հյուրանոցային ենթակառուցվածք։ Խոսվում է նաև միջազգային մակարդակի կենտրոն ձևավորելու նպատակի մասին։
Միևնույն ժամանակ հիշեցնենք, որ այս թեման կապվում է «Հայֆիլմ» կինոստուդիայի կառավարման փոփոխության նախաձեռնության հետ։ Կրթության, գիտության, մշակույթի և սպորտի նախարարությունը հունվարին հանրային քննարկման էր ներկայացրել նախագիծ, որով «Հայֆիլմ»-ի պետական բաժնետոմսերի կառավարումը պետք է փոխանցվի նախարարությանը։ Հիմնավորման մեջ նշվում էր, որ կինոարտադրությունը դիտարկվում է որպես ռազմավարական տնտեսական ճյուղ և որ անհրաժեշտ է ձևավորել համապարփակ համակարգ, իսկ կինոստուդիայի տարածքը դիտարկվում է որպես հիմնական գործիք՝ «կինոարտադրական քաղաքի» գաղափարի իրականացման համար:
Բյուջեով «Կինոքաղաքի ստեղծում» միջոցառման համար նախատեսվել է 360 մլն դրամ։ Սակայն մինչև այժմ հրապարակված չէ ամբողջական հայեցակարգը։ Չկան հրապարակային տվյալներ տարածքների իրավական կարգավիճակի, ներդրումային մոդելի կամ երկարաժամկետ կառավարման մասին։
Ստացված պատասխանը տալիս է ընդհանուր նկարագրություն, բայց ոչ ամբողջական պատկեր։ Քանի որ ծրագրերը արդեն ներառված են պետական բյուջեում և մասամբ իրականացվում են, հանրային հստակ տեղեկատվությունը կարևոր է։
