Հայաստանի ազգային կինոակադեմիան հայտարարել է ֆիլմերի ընդունելություն՝ 99-րդ «Օսկար» մրցանակի «Միջազգային լիամետրաժ ֆիլմ» անվանակարգում Հայաստանի պաշտոնական հայտը ընտրելու համար։
Դիմումներն ընդունվում են հունիսի 4-ից մինչև օգոստոսի 14-ը ներառյալ։ Դիմելու համար կինոարտադրողները պետք է լրացնեն պաշտոնական հայտադիմումը և անհրաժեշտ նյութերն ուղարկեն info@armfilmacademy.am հասցեին։
Կինոակադեմիան դիմողներին հորդորում է նախապես ծանոթանալ Ամերիկյան կինոակադեմիայի 99-րդ մրցանակաբաշխության կանոններին, մասնավորապես՝ «Միջազգային լիամետրաժ ֆիլմ» անվանակարգին վերաբերող հատուկ կանոններին։
Ըստ կանոնների՝ միջազգային ֆիլմ է համարվում ԱՄՆ-ից և նրա տարածքներից դուրս արտադրված 40 րոպեից ավելի տևողությամբ լիամետրաժ կինոնկարը, որի երկխոսությունների հիմնական մասը՝ ավելի քան 50 տոկոսը, անգլերեն չէ։ Անիմացիոն և վավերագրական լիամետրաժ ֆիլմերը նույնպես կարող են ներկայացվել այս անվանակարգում։
Կինոակադեմիայի հաղորդագրության համաձայն՝ այս տարի որակավորման չափանիշներում փոփոխություններ կան, ուստի դիմողները պետք է հատուկ ուշադրություն դարձնեն ներկայացման և իրավասության պայմաններին։ Հայաստանի կողմից ընտրված ֆիլմի անունը նախատեսվում է հայտարարել սեպտեմբերի 1–7-ը։
Նախորդ տարվա քննարկումների և Հայաստանի ազգային կինոակադեմիայի գործունեության թափանցիկության վերաբերյալ հարցերի ֆոնին այս տարվա հայտարարության մեջ Կինոակադեմիան որոշ չափով բացել է նաև Հայաստանի թեկնածուի ընտրության մեխանիզմը։ «ԿինոՊրես»-ը նախկինում հարցում էր ուղարկել Կինոակադեմիա՝ խնդրելով պարզաբանել կառույցի գործունեության, անդամակցության, որոշումների ընդունման և ընտրության ընթացակարգերի հետ կապված մի շարք հարցեր, սակայն հրապարակման պահի դրությամբ պատասխան չէր ստացվել։
Այս անգամ Կինոակադեմիան նշում է, որ ընտրության գործընթացը կազմակերպվում է Ամերիկյան կինոակադեմիայի պաշտոնական կանոններին համապատասխան։ Ընտրող հանձնաժողովը ձևավորվում է Հայաստանի ազգային կինոակադեմիայի անդամների կողմից՝ ընդհանուր ժողովում, բաց քվեարկությամբ։
Հայտ ներկայացրած և չափանիշներին համապատասխանող բոլոր ֆիլմերը դիտում են Կինոակադեմիայի քվեարկող անդամները։ Վերջնական որոշումը կայացվում է գաղտնի քվեարկությամբ․ ամենաշատ ձայներ ստացած ֆիլմը ընտրվում է որպես Հայաստանի պաշտոնական ներկայացում «Միջազգային լիամետրաժ ֆիլմ» անվանակարգում։
Քվեարկության արդյունքները հաստատում է ընտրող հանձնաժողովը։ Ոչ միանշանակ արդյունքների, ձայների հավասարության կամ այլ բացառիկ իրավիճակների դեպքում հանձնաժողովը կարող է անցկացնել լրացուցիչ քվեարկություն կամ կիրառել կանոններով նախատեսված այլ ընթացակարգեր՝ վերջնական որոշում կայացնելու համար։
Լրացուցիչ տեղեկությունների համար կարելի է կապվել Կինոակադեմիայի հետ՝ +374 10 587971 և +374 91 289294 հեռախոսահամարներով։
Վերջին երեք տարիներին Հայաստանը «Օսկար»-ի «Միջազգային լիամետրաժ ֆիլմ» անվանակարգում ներկայացրել է Թամարա Ստեփանյանի «Իմ հայկական ուրվականները» վավերագրական ֆիլմը՝ 98-րդ մրցանակաբաշխության համար, Էդգար Բաղդասարյանի «Յաշան և Լեոնիդ Բրեժնևը» ֆիլմը՝ 97-րդ մրցանակաբաշխության համար, և Մայքլ Գուրջյանի «Ամերիկացի» ֆիլմը՝ 96-րդ մրցանակաբաշխության համար։ «Ամերիկացին» դարձել էր առաջին հայկական հայտը, որը հայտնվել է «Օսկար»-ի միջազգային լիամետրաժ ֆիլմերի կարճ ցուցակում։
