2026 թվականից «Ռոլան» մանկապատանեկան ֆիլմերի միջազգային փառատոնը վերանվանվել է «Մանու Ֆեստ» մանկապատանեկան ֆիլմերի միջազգային փառատոնի։ Փառատոնի կազմակերպիչը նույնպես հանդես է գալիս նոր անվամբ․ Հայաստանի «Ռոլան Բիկով» հիմնադրամը վերանվանվել է «Մանու Ֆոնդ»։
Հիմնադրամը գործում է Երևանում 2001 թվականից։ Նրա հիմնական նպատակն է մշակութային, կրթական, մարդու իրավունքների և սոցիալական ծրագրերի իրականացումը՝ ուղղված երեխաների և երիտասարդների ազգային ու համամարդկային արժեքների ձևավորմանը և բազմակողմանի զարգացմանը։
«Մանու Ֆեստ» 22-րդ մանկապատանեկան ֆիլմերի միջազգային փառատոնը տեղի կունենա 2026 թվականի նոյեմբերի 3-ից 7-ը։ Կազմակերպիչների փոխանցմամբ՝ փառատոնը կշարունակի իր հիմնական առաքելությունը՝ ապահովել երեխաների և երիտասարդների հասանելիությունը կինոյին և մշակույթին, խթանել ստեղծագործական կրթությունը, զարգացնել միջմշակութային երկխոսությունն ու միջազգային համագործակցությունը։
Փառատոնի շրջանակում նախատեսվում են ֆիլմերի ցուցադրություններ, վարպետության դասեր, ստեղծագործական հանդիպումներ, պրեմիերաներ, կլոր սեղան-քննարկումներ, հատուկ ծրագրեր և միջազգային մշակութային նախաձեռնություններ։ Փառատոնը նպատակ ունի համախմբել երեխաներին, երիտասարդներին, կինոգործիչներին և արվեստագետներին աշխարհի տարբեր երկրներից։
Կազմակերպիչները նշում են, որ «Մանու Ֆեստ»-ը կարևորում է հասարակության տարբեր շերտերից երեխաների և երիտասարդների ներգրավումը, այդ թվում՝ մանկատների սաների, սոցիալապես անապահով ընտանիքների երեխաների և սահմանափակ կարողություններով երեխաների մասնակցությունը։ Փառատոնը նրանց համար դիտարկվում է որպես միջավայր, որտեղ նրանք կարող են ճանաչել աշխարհը, սովորել, ստեղծագործել և շփվել ինչպես իրենց հասակակիցների, այնպես էլ պրոֆեսիոնալ արվեստագետների հետ։
Ակնկալվում է, որ փառատոնին կմասնակցի շուրջ 15 հազար մարդ Երևանից և Հայաստանի մարզերից։
Փառատոնի մրցութային անվանակարգերի թվում են՝ «Գրան Պրի», «Լավագույն լիամետրաժ խաղարկային ֆիլմ», «Լավագույն կարճամետրաժ խաղարկային ֆիլմ», «Լավագույն լիամետրաժ անիմացիոն ֆիլմ», «Լավագույն կարճամետրաժ անիմացիոն ֆիլմ», «Լավագույն ֆրանսիական ֆիլմ», «Լավագույն Վիշեգրադի ֆիլմ», «Ես իրավունքներ ունեմ» և «Հանդիսատեսի համակրանք»։
Փառատոնը պահպանում է իր ձևաչափային առանձնահատկությունը․ մրցութային ծրագրի ժյուրին կազմված է լինելու բացառապես երեխաներից և պատանիներից՝ ապահովելով նրանց ակտիվ մասնակցությունն ու ինքնուրույն գնահատումը։
Կազմակերպիչների տեղեկացմամբ՝ «Մանու Ֆեստ» փառատոնն իրականացվում է բացառապես բարեգործական հիմունքներով։
