ՀՀ կրթության, գիտության, մշակույթի և սպորտի նախարարությունը չի պարզաբանել, թե Հայաստանի կինոյի հիմնադրամն արդյոք պահպանել է 2026 թվականի կինոմրցույթների հայտերի ուսումնասիրման և փորձագիտական հանձնախմբերի կազմերը հրապարակելու ժամկետները։ «ԿինոՊրես»-ի հարցմանն ի պատասխան՝ գերատեսչությունը նշել է միայն, որ համապատասխան տեղեկություններն արդեն հրապարակված են՝ չանդրադառնալով դրանց հրապարակման ժամանակացույցին։
Լիամետրաժ և կարճամետրաժ նախագծերի 2026.1 ու 2026.2 մրցույթները հայտարարվել են օգոստոսի 3-ին, իսկ հայտերի ընդունումն ավարտվել է սեպտեմբերի 2-ին։ Կանոնակարգի 40-րդ կետով հայտերի ուսումնասիրման համար նախատեսված է 15 աշխատանքային օր։ Եթե չի կիրառվել կանոնակարգով թույլատրված ժամկետի կասեցումը, ուսումնասիրության այդ փուլը պետք է ավարտվեր սեպտեմբերի 24-ին։
Հոկտեմբերի 6-ին խմբագրությունը նախարարությունից հարցրել էր՝ ավարտվե՞լ է արդյոք փաստաթղթերի ուսումնասիրությունը, կայացվե՞լ են հայտերի ընդգրկման որոշումները, և ե՞րբ կհրապարակվեն ցանկերն ու փորձագիտական հանձնախմբերի կազմերը։
«Մրցույթում ընդգրկված հայտերի անվանացանկերն ու փորձագիտական հանձնախմբերի կազմերը սահմանված կարգով հրապարակվել են Ազգային մարմնի պաշտոնական կայքում»,— պատասխանել է նախարարությունը։
Սակայն հարցման ուղարկման օրը այդ տեղեկությունները հրապարակված չէին։ Հարցմանը պատասխանելու համար նախարարությունը 30 օր ժամանակ վերցրեց, և այդ ընթացքում արդեն հրապարակվեցին մրցույթի առաջին արդյունքները: Հիմնադրամը ցանկերն ու հանձնախմբերի կազմերը հրապարակել է հոկտեմբերի 28-ին։ Նախարարությունը չի նշել, թե երբ է աշխատանքային խումբն ավարտել հայտերի ուսումնասիրությունը, երբ է ընդունել ընդգրկման որոշումները և արդյոք կիրառվել են ժամկետի կասեցումները։
Կանոնակարգի համաձայն՝ ընտրված հայտերի ցանկերը և հանձնախմբերի կազմերը հրապարակվում են աշխատանքային խմբի որոշումից հետո մեկ աշխատանքային օրվա ընթացքում։
«ԿինոՊրես»-ը նախարարությունից նաև հարցրել էր՝ իրականացվե՞լ է մրցույթների համապատասխանության ուսումնասիրություն կամ վերահսկողություն։ Պատասխանում գերատեսչությունը չի հայտնել՝ նման ստուգում արդեն եղե՞լ է, թե՞ ոչ՝ նշելով միայն, որ վերջնական արդյունքների մասին ամբողջական տեղեկություն հնարավոր կլինի ներկայացնել մրցույթների ավարտից հետո։
Հոկտեմբերի 30-ին Հիմնադրամի հրապարակած տվյալներով՝ ներկայացվել էր 90 հայտ, որոնցից մրցույթներում ընդգրկվել է 43-ը՝ 25 լիամետրաժ և 18 կարճամետրաժ նախագիծ։
















