ՀՀ կրթության, գիտության, մշակույթի և սպորտի նախարարության փոխանցմամբ՝ Հայաստանի կինոյի հիմնադրամի պաշտոնական կայքի նոր խմբագրությունը կհրապարակվի մեկ ամսվա ընթացքում։ Այս մասին նախարարությունը նոյեմբերի 16-ին հայտնել է «ԿինոՊրես»-ին։
2024 թվականին Հիմնադրամի վերակազմավորումից անցել է ավելի քան երկու տարի, սակայն կառույցի պաշտոնական կայքում մինչ օրս ամբողջությամբ հասանելի չեն նրա կազմակերպական կառուցվածքի, աշխատակազմի և պատասխանատու անձանց վերաբերյալ հիմնական տեղեկությունները։ Միաժամանակ կայքում պարբերաբար հրապարակվում են Հիմնադրամի նախաձեռնությունների, հանդիպումների, միջոցառումների ու միջազգային գործունեության մասին ընտրված հաղորդագրություններ։ Այսպիսով՝ կառույցը կարողանում է ընտրվի լուսաբանել սեփական գործունեությունը, մինչդեռ հանրային հաշվետվողականության համար անհրաժեշտ տեղեկությունները շարունակում են մնալ թերի։
«Հայաստանի կինոյի հիմնադրամի պաշտոնական կայքը նոր խմբագրությամբ կհրապարակվի մեկ ամսվա ընթացքում», — նշված է նախարարության պատասխանում։
Նախարարությունը նաև հայտնել է, որ կայքը գտնվում է մշակման, տեխնիկական վերազինման և արդիականացման փուլում։ Ըստ գրության՝ աշխատանքների ավարտից հետո պետք է ապահովվի Հիմնադրամի կառավարման կառուցվածքի, ղեկավարության և աշխատակազմի վերաբերյալ տեղեկությունների մշտական հասանելիությունը։
Սակայն անպատասխան է մնացել այն հարցը, թե կոնկրետ ով է պատասխանատու Հիմնադրամի հանրային հաղորդակցության և տեղեկատվության հրապարակման համար։ Նախարարությունը սահմանափակվել է նշելով, որ պատասխանատուն «Հիմնադրամի հասարակայնության հետ կապերի բաժնի համապատասխան աշխատակիցն» է՝ չներկայացնելով նրա անունը, ազգանունը կամ պաշտոնը։
Միաժամանակ նույն գրության մեջ կայքի և սոցիալական ցանցերի պատասխանատուի հաստիքը նշված է որպես թափուր։ Պատասխանից պարզ չէ, թե ով է ներկայումս իրականացնում այդ գործառույթները և համակարգում մեկ ամսվա ընթացքում հրապարակման նախատեսված կայքի պատրաստման աշխատանքները։
Ավելին, նախարարությունը հայտնել է, որ հարցման առաջին յոթ կետերի պատասխանները տրամադրել է հենց Հայաստանի կինոյի հիմնադրամը։ Այդ պատասխաններում որպես հավելված նշվել են Հիմնադրամի հաստատված կառուցվածքը, հաստիքացուցակը և աշխատակազմի անվանական ցանկը, սակայն դրանք «ԿինոՊրես»-ին չեն տրամադրվել։
«ԿինոՊրես»-ը նախկինում ևս անդրադարձել է Հիմնադրամի կայքի տեղեկատվական բացերին և հարցումներ ուղղել նախարարությանը։ Կայքի ոչ լիարժեք աշխատանքը բացատրվել է շարունակվող մշակման ու արդիականացման գործընթացներով։ Այժմ նախարարության պատասխանում նշվել է կայքի նոր խմբագրության հրապարակման մեկամսյա ժամկետ։















