SHARM Holding-ը և Mitoyan Production-ը հայտարարել են «Նոր Մեր բակը» գեղարվեստական ֆիլմի ստեղծման մասին։ Նոր նախագիծը ներկայացվում է «Մեր բակը» երաժշտական կատակերգության առաջին մասի ստեղծումից 30 տարի անց։
Ֆիլմի ռեժիսորը Դավիթ Բաբախանյանն է, որը նաև 1996 թվականին ստեղծված առաջին «Մեր բակի» սցենարիստներից էր։ Նոր ֆիլմի դերասանական կազմում ընդգրկված են Թամարա Պետրոսյանը, Վաչե Երիցյանը, A. Chilla-ն, Գրիգոր Դանիելյանը, Մարջան Ավետիսյանը, Ալեքսանդր Արզումանյանը և Լիլիթ Թոխատյանը։
Ֆիլմի սյուժեի, նկարահանումների ընթացքի և պրեմիերայի ժամկետների մասին տեղեկություններ առայժմ չեն հրապարակվել։
«Մեր բակը» ֆիլմաշարի պատմությունը սկսվել է 1996 թվականին, երբ SHARM ընկերությունը Հայաստանի հանրային հեռուստատեսության ամանորյա ծրագրի շրջանակում ստեղծել է երևանյան բակի բնակիչների առօրյայի մասին երաժշտական կատակերգություն։ Միքայել Դովլաթյանի ռեժիսորական աշխատանքն առաջին անգամ ցուցադրվել է 1997 թվականի Ամանորի գիշերը։ Հետագայում թողարկվել են ֆիլմաշարի երկրորդ և երրորդ մասերը՝ համապատասխանաբար 1998 և 2006 թվականներին։
Ֆիլմաշարի վերջին շարունակությունը՝ «Մեր բակը 25 տարի անց» լիամետրաժ կինոնկարը, էկրան է բարձրացել 2021 թվականի նոյեմբերի 4-ին։ Արշո Հարությունյանի ռեժիսորական աշխատանքը ստեղծվել էր Հանրային հեռուստաընկերության, SHARM Holding-ի և Mitoyan Production-ի համագործակցությամբ։
