Cartoon Movie–ն (մարտի 4-6-ը) կրկին միավորել է եվրոպական անիմացիայի արդյունաբերությունը՝ անիմացիոն ֆիլմերի փիչինգի և համարտադրության խոշորագույն միջոցառմանը Բորդոյում ամփոփել է արդյունքները:
Եվրիմաժի համատեղ արտադրության զարգացման մրցանակը (20.000 եվրո) շնորհվել է ռեժիսոր Տիգրան Առաքելյանի «Զակո» հայ-ֆրանսիական նախագծին և OnOff Studio ստուդիայիին: «Զակո» հայկական անիմացիոն լիամետրաժ նախագծի համարտադրողն է ֆրանսիական Sacrebleu Productions-ը, որը վերջերս արժանացել է «Օսկար» մրցանակի լատվիական «Հոսք» անիմացիոն համատեղ ֆիլմի համար:
OnOff ստուդիայի «Զակո» լիամետրաժ անիմացիոն ֆիլմը հիմնված է նկարիչ Տիգրան Մանգասարյանի համանուն գրաֆիկական նովելի վրա, որը նրա հոր՝ նկարիչ Սարգիս Մանգասարյանի կյանքի պատմությունն է։ Իրադարձությունները, որոնց միջով անցել է հայ նկարիչը, ապշեցնում են իրենց դրամատիզմով։ Երկրորդ համաշխարհային պատերազմի ժամանակ՝ գերեվարվելով և անցնելով Ռեյխի ճամբարներով, նա կարողանում է ողջ մնալ իր նկարչական տաղանդի շնորհիվ և ստիպված է լինում նկարել իր դահիճներին և իրենց կանանց:
Ուրախ ենք աջակցել մի նախագծի, որը լույս է սփռում եվրոպական պատմության քիչ հայտնի գլխի վրա՝ պատմելով պատերազմի հայ զոհի և նկարչի իրական պատմությունը: Այս վառ և զգացմունքային ճանապարհորդությունը կլրացվի նոր տեխնոլոգիաների ստեղծագործական օգտագործմամբ: Բացի երիտասարդ տաղանդներին հարգելուց, այս մրցանակը նաև ճանաչում է պրոդյուսերների նվիրվածությունը, ովքեր ցանկանում են զարգացնել անիմացիոն արդյունաբերությունը իրենց հասարակության մեջ,
ասվում է ժյուրիի պաշտոնական հայտարարության մեջ:
«Տարվա պրոդյուսեր» մրցանակը համատեղ շնորհվել է Dream Well Studio (Լատվիա), Sacrebleu Productions (Ֆրանսիա) և Take Five (Բելգիա) ստուդիաներին՝ Գինց Զիլբալոդիսի վերջին՝ «Հոսք» ֆիլմի վրա համատեղ աշխատանքի համար: Թիմը պատմություն կերտեց՝ Օսկարի 97-րդ մրցանակաբաշխության ժամանակ ստանալով «Օսկար» մրցանակ «Լավագույն անիմացիոն ֆիլմ» անվանակարգում: «Հոսք» ֆիլմը, որն առաջին անգամ ներկայացվել է Cartoon Movie-ում 2022 թվականին, ներկայացվել է Կաննի կինոփառատոնում, այնուհետև արժանացել է Անսի, Ոսկե գլոբուս, Եվրոպական կինոմրցանակաբաշխության և այլ մրցանակների:
Ինչպես տեղեկացնում է ՌեԱնիմանիա անիմացիոն փառատոնը՝ պրոդյուսերներ Սուսաննա Խաչատրյանը (OnOff Studio) և Ռոն Դայենսը (Sacrebleu Productions) առաջին համարտադրության հուշագիրը ստորագրել են 2023 թվականին՝ Անսի կինոփառատոնի ժամանակ:
2020 թվականին «Զակո»-ն Հայաստանի կինոյի հիմնադրամի (նախկին «Հայաստանի ազգային կինոկենտրոն») կողմից ստացել է 2,5 մլն. դրամ պետական աջակցություն նախագծի զարգացման փուլի համար:
Cartoon Movie-ի 27-րդ թողարկման շրջանակներում 40 երկրներից ավելի քան 830 ոլորտի մասնագետ է մասնակցել քվեարկությանը:
Ահա այս տարվա մրցանակակիրների ամբողջական ցանկը.
Տարվա պրոդյուսերներ
Dream Well Studio (Լատվիա), Sacrebleu Productions (Ֆրանսիա), Take Five (Բելգիա)՝ «Հոսք»
Տարվա վաճառքի գործակալ
Kinology (Ֆրանսիա)
Տարվա ռեժիսոր
Մարիա Թրենոր՝ ROCK BOTTOM (Իսպանիա)
Եվրիմաժի համատեղ արտադրության զարգացման մրցանակ
OnOff Studio (Հայաստան), Sacrebleu Productions (Ֆրանսիա)՝ «Զակո»
