2023 թվականին, երբ Քրիստոֆեր Նոլանը ներկայացրեց իր էպիկական «Օպենհայմեր»-ը, իսկ դրան զուգահեռ էկրան բարձրացավ «Բարբի»-ն, համաշխարհային կինոթատրոնները գրանցեցին վերջին տարիների ամենամեծ հանդիսատեսային ալիքը։ Այդ «բարբենհայմերային» էֆեկտը դարձավ հետհամավարակային շրջանի վերածննդի խորհրդանիշ։
Կկարողանա՞ արդյոք Նոլանի նոր նախագիծը՝ «Ոդիսական»-ը, ինչպես նաև 2026 թվականին նախատեսվող մյուս բլոքբաստերները, կրկնել այդ արդյունքը։ Հոլիվուդը մեծ հույսեր է կապում մի շարք երկար սպասված շարունակությունների և ֆրանշիզների հետ՝ Սարդ-մարդու մասին պատմող չորրորդ ֆիլմը՝ Թոմ Հոլանդի մասնակցությամբ, երկրորդ անիմացիոն ֆիլմը Մարիո եղբայրների մասին, «Սատանան կրում է Prada» ֆիլմի չափազանց սպասված շարունակությունը, չհաշված նաև սպասվող մեգապրոյեկտները՝ «Վրիժարուները. Դատաստանի օրը», «Դյունա. Մաս երրորդ»։
Միևնույն ժամանակ, մրցանակային սեզոնի հավակնորդների թվում արդեն հիշատակվում է «Համնեթ»-ը, որը կարող է դառնալ «Օսկարի» պայքարի լուրջ խաղացող։
2026 թվականը խոստանում է դառնալ պոտենցիալ հսկայական տարի կինոարդյունաբերության համար, որը դեռ շարունակում է զգալ քովիդյան համավարակի հետևանքները՝ արտադրական դադարներ, գործադուլներ, շուկայի վերաձևավորում և հանդիսատեսի վարքի փոփոխություն։
Ստորև ներկայացնում ենք այն ֆիլմերից մի քանիսը, որոնց արժե հատուկ ուշադրություն դարձնել 2026 թվականին։
1. «Մոլեգին հողմերի դարավանդ» (Wuthering Heights)
Կրքով, տագնապով և զսպված սեռական լարվածությամբ հագեցած առաջին թիզերներն արդեն «Մոլեգին հողմերի դարավանդ»-ը դարձրել են 2026 թվականի ամենաքննարկվող նախագծերից մեկը։
Ֆիլմի ռեժիսորը Էմերալդ Ֆեննելն է, որի նախորդ աշխատանքը՝ «Սոլթբըրն»-ը, բուռն քննարկումների առիթ դարձավ։ Նոր նախագծում նա կրկին համագործակցում է Ջեյքոբ Էլորդիի հետ, ով մարմնավորում է Հիթքլիֆին, իսկ Քեթիի դերում հանդես է գալիս Մարգո Ռոբին։
Էմիլի Բրոնտեի դասական վեպի նոր էկրանավորումը խոստանում է լինել ոչ միայն ռոմանտիկ դրամա, այլ մութ, էսթետիկորեն սադրիչ պատմություն՝ կրքի, սոցիալական արգելքների և ինքնաոչնչացման մասին։ Ֆեննելի ոճը հաշվի առնելով՝ կարելի է սպասել գեղարվեստական համարձակ լուծումների և ժամանակակից ընթերցման։
Թողարկում՝ 12 փետրվար (Հայաստան)
2. «Ճիչ 7» (Scream 7)
Սլեշեր ժանրի ամենաազդեցիկ ֆրանշիզներից մեկը վերադառնում է նոր շրջադարձով։ Բնօրինակ «Ճիչ»-ի և դրա առաջին շարունակությունների սցենարիստը՝ Քևին Ուիլյամսոնը, կրկին միացել է նախագծին՝ այս անգամ արդեն որպես ռեժիսոր և սցենարիստ։
Գլխավոր դերերում կրկին հանդիսատեսին ծանոթ դեմքերն են՝ Քորթնի Քոքսը՝ լրագրող Գեյլ Ուեզերսի դերում, և Նիվ Քեմփբելը՝ Սիդնի Պրեսքոթի կերպարում։
Նոր ֆիլմում դիմակավորված մարդասպանը՝ Ուրվականի դեմքը, որս է սկսում Սիդնիի դստեր նկատմամբ՝ պատմությունը տեղափոխելով հաջորդ սերնդի մակարդակ։ Սա նշանակում է, որ «Ճիչ 7»-ը ոչ միայն նոստալգիկ վերադարձ է, այլ նաև ֆրանշիզի հնարավոր վերագործարկման փորձ՝ պահպանելով դասական լարվածությունն ու մետա-հումորը։
Թողարկում՝ 26 փետրվար (Հայաստան)
3. «Համնեթ» (Hamnet)
Մրցանակակիր գրող Մեգի Օ’Ֆարելի համանուն վեպի հիման վրա ստեղծված «Համնեթ»-ը պատմում է Ուիլյամ Շեքսպիրի (մարմնավորում է Փոլ Մեսքալը) և նրա կնոջ՝ Ագնեսի (Ջեսի Բաքլի) հարաբերությունների մասին։
Ֆիլմը կենտրոնանում է ընտանիքի վրա հասած ողբերգական իրադարձությունների վրա, որոնք, ըստ պատմության, մեծ ազդեցություն են ունեցել Շեքսպիրի ստեղծագործական ճանապարհի վրա և ոգեշնչել «Համլետ» ողբերգության ստեղծմանը։
Սա ոչ թե կենսագրական դասական դրամա է, այլ ինտիմ, զգայական պատմություն կորստի, սիրո և արվեստի ծննդի մասին՝ հավանական «Օսկարային» հավակնություններով։
Թողարկում՝ 5 մարտ (Հայաստան)
4. «Սուպեր Մարիո․ Գալակտիկական ֆիլմ» (The Super Mario Galaxy Movie)
Երեսուն տարի առաջ թողարկված կենդանի դերասաններով Super Mario Bros.-ը ձախողվեց վարձույթում։ Սակայն «Սուպեր մարիո եղբայրները կինոյում» անիմացիոն վերադարձը դարձավ համաշխարհային հիթ՝ հատելով մեկ միլիարդ դոլարի շեմը։
Այդ հաջողությունից հետո շարունակությունը գրեթե անխուսափելի էր։ Նոր ֆիլմը հիմնված է Super Mario Galaxy խաղի վրա, որտեղ Մարիոն ու Լուիջին ուղևորվում են տիեզերական արկածների՝ փրկելու արքայադուստր Փիչին։
Տիեզերական էսթետիկա, նոր աշխարհներ, գունագեղ վիզուալ լուծումներ և ընտանեկան հումոր․ «Սուպեր Մարիո․ Գալակտիկական ֆիլմ»-ը հավակնում է կրկնել առաջին մասի կոմերցիոն հաջողությունը և պահպանել անիմացիոն բլոքբաստերների շուկայի թափը։
Թողարկում՝ 1 ապրիլ (Հայաստան)
5. «Սատանան կրում է Prada 2» (The Devil Wears Prada 2)
Նորաձևության աշխարհի մասին ամենահայտնի ֆիլմերից մեկը վերադառնում է երկու տասնամյակ անց։ Բնօրինակ «Սատանան կրում է Prada»-ում Մերիլ Սթրիփի հեգնական հմայքը՝ Runway ամսագրի խմբագիր Միրանդա Փրիսթլիի դերում, և Էնն Հեթեուեյի խաղը՝ նորաձևության աշխարհում միամիտ նորեկ Էնդիի կերպարում, ֆիլմը դարձրեցին պարտադիր դիտման առարկա։
Քսան տարի անց երկուսն էլ վերադառնում են իրենց դերերին։ Թեև սյուժեի մանրամասները դեռ սահմանափակ են, արդեն հաստատվել է, որ հանդիսատեսի սիրելի կերպարները նույնպես կրկին կհայտնվեն էկրանին՝ Էմիլի Բլանթը Էմիլիի դերում և Սթենլի Տուչին՝ Նայջելի կերպարում։
Արդյոք նորաձևության աշխարհը փոխվե՞լ է թվային դարաշրջանում։ Կվերադառնա՞ արդյոք Միրանդայի սառնասիրտ իշխանությունը նույն ուժով։ «Սատանան կրում է Prada 2»-ը խոստանում է դառնալ ոչ միայն նոստալգիկ վերադարձ, այլ նաև սերունդների բախման և մեդիաաշխարհի վերափոխման պատմություն։
Թողարկում՝ 30 ապրիլ (Հայաստան)
6. «Մանդալորցին և Գրոգուն» (Star Wars: The Mandalorian and Grogu)
Երեք եթերաշրջանների ընթացքում Մանդալորցին դարձավ «Աստղային պատերազմներ» տիեզերքի ամենահաջող հեռուստատեսային սփին-օֆը՝ վերածելով Գրոգուին փոփ մշակույթի ֆենոմենի։
Այժմ ստեղծողները փորձում են այդ հաջողությունը տեղափոխել մեծ էկրան։ «Մանդալորցին և Գրոգուն» կլինի առաջին լիամետրաժ ֆիլմը ֆրանշիզում 2019 թվականի «Աստղային պատերազմներ։ Սքայուոքերի վերելքը» ֆիլմից հետո՝ փորձելով վերակենդանացնել սագայի կինոթատրոնային դիրքերը։
Գլխավոր հերոսների՝ Դին Ջարինի և Գրոգուի արկածներին կմիանա նաև Սիգուրնի Ուիվերը, ինչը նախագծին հավելյալ ինտրիգ է հաղորդում։
Ֆիլմը կարևոր փորձություն է «Աստղային պատերազմներ» բրենդի համար․ արդյոք սերիալային հաջողությունը կկարողանա՞ փոխակերպվել խոշոր կինոթատրոնային եկամուտների։
Թողարկում՝ 21 մայիս (Հայաստան)
7. «Բացահայտման օր» (Disclosure Day)
Նոր նախագիծը Սթիվեն Սփիլբերգից արդեն հասցրել է դառնալ 2026-ի ամենախորհրդավոր պրեմիերաներից մեկը։ Նույնիսկ երկուվայրկյանանոց թիզեր-թրեյլերը գրեթե ոչինչ չի բացահայտում սյուժեի մասին։
Սակայն հոլովակի ուղերձը հստակ է․ մարդկությունը կանգնած է բացահայտման առաջ։ Սլոգանը հարց է ուղղում հանդիսատեսին. «Եթե իմանայիք, որ մենք միայնակ չենք, եթե ինչ-որ մեկը դա ցույց տար ձեզ, ապացուցեր՝ կվախենայի՞ք»։
Թեմատիկորեն ֆիլմը ակնարկում է այլմոլորակայինների գոյության հանրային ճանաչման մասին՝ հիշեցնելով Սփիլբերգի վաղ շրջանի գիտաֆանտաստիկ ժառանգությունը, բայց, դատելով մթնոլորտից, ավելի մութ և փիլիսոփայական շեշտադրումներով։
«Բացահայտման օր»-ը կարող է դառնալ թե՛ բլոքբաստերային իրադարձություն, թե՛ գաղափարական գիտաֆանտաստիկ դրամա՝ հարցադրելով ոչ միայն «արդյոք նրանք գոյություն ունեն», այլ «արդյոք մենք պատրաստ ենք այդ ճշմարտությանը»։
Թողարկում՝ 11 հունիս (Հայաստան)
8. «Խաղալիքների պատմություն 5» (Toy Story 5)
2020-ականները հեշտ չէին Pixar ստուդիայի համար։ Իրենց իսկ սահմանած բարձր չափանիշներով մի քանի նախագծեր չարդարացրին սպասումները՝ ներառյալ «Ես կարմրում եմ», «Էլիո» ու «Բազ Լայթեր» սպին-օֆը։
Այդ պատճառով ստուդիան հույսը դնում է իր ամենահաջող ֆրանշիզի վրա։ «Խաղալիքների պատմություն 5»-ը վերադարձնում է լեգենդար հերոսներին՝ Վուդիին և Բազին։ Վուդիի ձայնավորումն կրկին իրականացնում է Թոմ Հենքսը, իսկ Բազ Լայթյերին՝ Թիմ Ալենը։
Ֆիլմը պետք է ոչ միայն շարունակություն լինի, այլ նաև փորձ՝ վերականգնելու Pixar-ի անիմացիոն հեղինակությունը մեծ էկրանին։ Հիմնական հարցը մնում է նույնը․ արդյո՞ք հանդիսատեսը դեռ պատրաստ է վերադառնալ այդ խաղալիքների աշխարհ։
Թողարկում՝ 18 հունիս (Հայաստան)
9. «Սուպերգըրլ» (Supergirl)
Միլի Ալքոքի կարճ հայտնվելը «Սուպերմեն» ֆիլմում դարձավ ամենահիշվող պահերից մեկը։ Այժմ հերոսուհին ստանում է իր սեփական լիամետրաժ նախագիծը։
Նոր «Սուպերգըրլ»-ում սյուժեն, ըստ նախնական տեղեկությունների, կարող է կենտրոնանալ «միջաստղային էպիկական ճանապարհորդության» վրա՝ վրեժի և արդարության որոնման թեմայով։ Սակայն թրեյլերը հուշում է, որ ֆիլմը ոչ միայն տիեզերական մարտերի մասին է։ Հերոսուհու անհատականությունը նույնքան կարևոր դեր ունի․ նա էկրանին միաժամանակ պայքարում է չարագործների դեմ, կոտրում կարծրատիպերը և նույնիսկ պարում։
DC-ի նոր փուլում «Սուպերգըրլ»-ը կարող է դառնալ ոչ միայն սուպերհերոսական արկած, այլ նաև կերպարային պատմություն՝ ուժի, ինքնության և ազատության մասին։
Թողարկում՝ 25 հունիս (Հայաստան)
10. «Մոանա» (Moana)
Առաջին անիմացիոն Moana-ն դարձավ գլոբալ հիթ, իսկ դրա շարունակությունը՝ Moana 2-ը, նույնիսկ գերազանցեց սպասումները՝ վարձույթում հատելով միլիարդ դոլարի սահմանը։
Այժմ Walt Disney Pictures-ը ներկայացնում է պատմության կենդանի դերասաններով տարբերակը։ Ֆիլմը կրկին պատմում է երիտասարդ Մոանայի մասին, որը լքում է իր կղզային տունը՝ հույսով փրկելու իր ժողովրդին։
Սա հերթական փորձությունն է Disney-ի live-action ռազմավարության համար։ Հաշվի առնելով ֆրանշիզի նախորդ հաջողությունները՝ «Մոանա»-ի այս տարբերակի վրա դրված են մեծ կոմերցիոն և բրենդային սպասումներ։ Կարո՞ղ է արդյոք անիմացիոն մոգությունը նույն ուժով աշխատել իրական դերասաններով ձևաչափում։
Թողարկում՝ 9 հուլիս (Հայաստան)
11. «Ոդիսական» (The Odyssey)
Օսկարակիր ռեժիսոր Քրիստոֆեր Նոլանը սովորաբար չի սիրում, երբ հանդիսատեսը նախապես շատ բան է իմանում իր ֆիլմերի սյուժեից։ Սակայն արդեն հայտնի է, որ նոր նախագիծը հիմնված է Հոմերոսի հին հունական էպոսի վրա։
Ֆիլմը պատմում է Ոդիսևսի (դերում՝ Մեթ Դեյմոն) երկար և վտանգավոր վերադարձի մասին տուն՝ Տրոյական պատերազմից հետո։ Դասական արկած, աստվածների միջամտություն, ծովային փորձություններ և գոյատևման պայքար՝ Նոլանի էպիկական մասշտաբով։
«Ոդիսական»-ը հավակնում է դառնալ տարվա գլխավոր կինոթատրոնային իրադարձություններից մեկը՝ համադրելով հեղինակային կինեմատոգրաֆիան և լայնամասշտաբ բլոքբաստերային ձևաչափը։ Հարցը միայն մեկն է՝ կկարողանա՞ արդյոք այս նախագիծը կրկնել «Օպենհայմերի» էֆեկտը և կրկին հավաքել բազմամիլիոնանոց հանդիսատես։
Թողարկում՝ 16 հուլիս (Հայաստան)
12. «Սարդ-մարդ․ Բոլորովին նոր օր» (Spider-Man: Brand New Day)
Նախորդ ֆիլմի՝ «Սարդ-Մարդ. Տունդարձի ճանապարհ չկա» ավարտին Դոկտոր Սթրենջի հմայքը ստիպեց ամբողջ աշխարհին մոռանալ, որ Փիթեր Փարքերը (դերում՝ Թոմ Հոլանդ) երբևէ եղել է Սարդ-մարդ, և նույնիսկ մոռանալ հենց Փարքերի գոյության մասին։
Այս հանգամանքը նոր ֆիլմի հիմքն է։ «Բոլորովին նոր օր»-ը, ամենայն հավանականությամբ, կկենտրոնանա հերոսի կյանքի ամենամենակ փուլերից մեկի վրա՝ առանց ընկերների, առանց սիրելիի և առանց ճանաչման։ Սա հնարավորություն է վերադառնալու կերպարի արմատներին՝ երիտասարդ սուպերհերոս, ով ստիպված է ինքնուրույն կրել պատասխանատվության բեռը։
Ֆիլմը կարող է դառնալ Marvel-ի համար կարևոր վերամեկնարկ՝ ավելի անձնական, մութ և ներքին կոնֆլիկտներով լի պատմությամբ, որը զուգահեռ կպահպանի բլոքբաստերային մասշտաբը։
Թողարկում՝ 30 հուլիս (Հայաստան)
13. «Քաղցած խաղեր․ Հնձքի արշալույս» (The Hunger Games: Sunrise on the Reaping)
Նոր ֆիլմի գործողությունները տեղի են ունենում առաջին «Քաղցած խաղեր»-ից քառորդ դար առաջ և կենտրոնանում են երիտասարդ Հեյմիչ Աբերնատիի վրա՝ ապագա մենթորի, ով հետագայում կդառնա Քիթնիսի ուղեցույցը։
Այս պրիքվելը պատմում է 50-րդ «Քաղցած խաղերի» մասին՝ առավել դաժան և քաղաքականապես լարված մրցաշար, որը ձևավորել է Հեյմիչի աշխարհայացքն ու ցինիկ հումորը։ Ֆրանշիզի երկրպագուների համար լրացուցիչ ինտրիգ է ստեղծում այն տեղեկությունը, որ Ջենիֆեր Լոուրենսը և Ջոշ Հաթչերսոնը կարող են հանդես գալ կամեոներով՝ վերադառնալով Քիթնիսի և Փիթայի կերպարներին։
Սա հնարավորություն է խորացնելու Պանեմի պատմությունը և վերակենդանացնելու երբեմնի մեգահաջող դիստոպիական ֆրանշիզը՝ նոր սերնդի հանդիսատեսի համար։
Թողարկում՝ 20 նոյեմբեր (ԱՄՆ)
14. «Ծանոթություն ծնողների հետ 4» (Focker-in-Law)
Չորրորդ մասը շարունակելու է այն պատմությունը, որը սկսվեց «Ծանոթություն ծնողների հետ» ֆիլմով և դարձավ 2000-ականների ամենահայտնի կատակերգական ֆրանշիզներից մեկը։
Գլխավոր դերերում կրկին կհայտնվեն՝ Բեն Սթիլլերը, Ռոբերտ Դե Նիրոն, Թերի Պոլոն, Բլայթ Դանները և Օուեն Ուիլսոնը։
Դեռ պարզ չէ՝ կհայտնվեն արդյոք նախորդ մասերում Սթիլլերի ծնողներին մարմնավորած Դասթին Հոֆմանը և Բարբրա Սթրեյզանդը։ Սակայն արդեն հաստատվել է նոր անուններից մեկը՝ Արիանա Գրանդեն, ինչը կարող է թարմ շունչ հաղորդել դասական ընտանեկան քաոսին։
«Ծանոթություն ծնողների հետ 4»-ը հենվում է նոստալգիայի և սերունդների բախման վրա՝ փորձելով արդիականացնել հին հակասությունները նոր սոցիալական իրականության պայմաններում։
Թողարկում՝ 25 նոյեմբեր (ԱՄՆ)
15. «Վրիժառուները․ Դատաստանի օր» (Avengers: Doomsday)
Մի ժամանակ անպարտելի համարվող Marvel Studios-ի կինեմատոգրաֆիական տիեզերքը վերջին տարիներին բախվել է անկայուն շրջանի։ Մի քանի նախագծեր չարդարացրին սպասումները, և այժմ ստուդիան մեծ հույսեր է կապում «Վրիժառուները․ Դատաստանի օր»-ի հետ։
Ֆիլմում վերադառնում է Ռոբերտ Դաունի կրտսերը, սակայն անսպասելի կերպով՝ չարագործ Դոկտոր Դումի դերում։ Այս քայլը կարող է դառնալ Marvel-ի ամենահամարձակ ստեղծագործական շրջադարձերից մեկը։
Նախագիծը խոստանում է հսկայական դերասանական անսամբլ՝ ներառյալ «Իքս մարդիկ»-ի թիմի ներկայացուցիչներին, ինչը բացում է լայնամասշտաբ քրոսովերի դուռը և կարող է վերակենդանացնել հանդիսատեսի հետաքրքրությունը ամբողջ տիեզերքի նկատմամբ։
«Դատաստանի օր»-ը Marvel-ի համար պարզապես հերթական բլոքբաստեր չէ, այլ վստահության վերականգնման փորձ՝ թե՛ երկրպագուների, թե՛ վարձույթային շուկայի աչքում։
Թողարկում՝ 17 դեկտեմբեր (Հայաստան)
16. «Դյունա․ Մաս երրորդ» (Dune: Part Three)
Էպիկական տիեզերական սագայի երրորդ մասը շարունակում է Դենի Վիլնյովի մեծածավալ նախագծերի շարքը։ Ըստ հաղորդումների՝ ֆիլմը հիմնված կլինի Ֆրենկ Հերբերտի երկրորդ վեպի՝ «Դյունա․ Մեսիա»-ի վրա։
Գլխավոր դերակատարները՝ Թիմոթի Շալամեն ու Զենդայան, կվերադառնան իրենց դերերին, իսկ դերասանական կազմին կմիանա նոր անուն՝ Ռոբերտ Պատինսոնը։
Երրորդ մասը կարող է ավելի քաղաքական և մռայլ երանգ ստանալ՝ խորանալով իշխանության, մեսիական կերպարի բարդությունների և պատմական ճակատագրի թեմաների մեջ։ Եթե առաջին երկու ֆիլմերը ամրապնդեցին «Դյունա»-ի բլոքբաստերային հեղինակությունը, ապա եզրափակիչ մասը կարող է այն վերածել ժամանակակից գիտաֆանտաստիկայի դասականի։
Հետաքրքիր է նաև, որ այս նախագծից հետո Վիլնյովի հաջորդ քայլը կլինի նոր ֆիլմը Ջեյմս Բոնդի մասին, ինչը ևս մեկ անգամ ընդգծում է նրա կարգավիճակը որպես ժամանակակից խոշոր ֆրանշիզների գլխավոր ռեժիսորներից մեկը։
Թողարկում՝ 17 դեկտեմբեր (Հայաստան)
