Նոյեմբերի 14–15-ին անցկացված Երևանի կինոարդյունաբերության ֆորումի ավարտին ներկայացված «Final Declaration» ամփոփիչ հռչակագրով առաջարկվում է Երևանում հիմնել Արվեստի և մշակութային տնտեսության համաշխարհային ֆորում (World Forum for Arts and Cultural Economy)։ Այն դիտարկվում է որպես միջազգային համագործակցության, մշակութային ներդրումների, ստեղծարար արդյունաբերությունների և կոնկրետ նախագծերի զարգացման հարթակ։
«Հայկական կինոն՝ միջազգային ինտեգրման ճանապարհին» խորագրով համաժողովը կազմակերպել էին Հայ մշակույթի և արվեստի միջազգային համակարգման խորհուրդը (ICA) և Հայաստանի կինոյի հիմնադրամը՝ ՀՀ ԿԳՄՍ նախարարության աջակցությամբ։ Կազմակերպիչների նոյեմբերի 18-ի հաղորդագրության համաձայն՝ համաժողովի բանախոսներն ու պաշտոնական հյուրերը սահմանել են Հայաստանի կինոոլորտի ռազմավարական առաջնահերթությունները։
«Կարևոր է հասկանալ՝ ինչն է աշխատում, ինչը պետք է փոխել, ինչպես գտնել համատեղ լուծումներ», — ըստ կազմակերպիչների՝ բացման խոսքում նշել է Հայաստանի կինոյի հիմնադրամի տնօրեն Դավիթ Բանուչյանը։

Հռչակագրի տեքստում հայկական կինոն ներկայացվում է որպես արվեստը, մշակույթը և ստեղծարար արդյունաբերությունները միավորող ավելի լայն միջազգային շարժման մեկնակետ։ Փաստաթղթում կարևորվում են Հայաստանի մշակութային ժառանգության պահպանումը, գեղարվեստական ստեղծագործության և նորարարությունների խթանումը, ինչպես նաև Հայաստանի, Սփյուռքի և միջազգային գործընկերների համագործակցությունը՝ մշակութային հաստատությունների, քաղաքացիական հասարակության և ներդրողների մասնակցությամբ։
Առաջ է քաշվում նաև Հայաստանը արվեստի, մշակույթի և նորարարության միջազգային խաչմերուկ դարձնելու գաղափարը՝ ստեղծագործության միջոցով տարբեր քաղաքակրթությունների միջև կապեր հաստատելու նպատակով։
Համաժողովի նախապես հրապարակված ծրագրով նախատեսված էր նաև Հայաստանի կինոարդյունաբերության զարգացման 2026–2030 թվականների ճանապարհային քարտեզին նվիրված եզրափակիչ քննարկում։ Սակայն նոյեմբերի 16-ին ԿԳՄՍ նախարարությունը հայտնել է, որ համաժողովի արդյունքների հիման վրա ռազմավարական առաջարկությունների փաթեթը դեռ պետք է մշակվի և ներկայացվի ոլորտի շահագրգիռ կողմերին ու պետական կառույցներին։















