2025 թվականի հուլիսի 28-ին Հայաստանի կինոյի հիմնադրամում կայացել է կինեմատոգրաֆիայի ոլորտում ընթացակարգային բարեփոխումների նպատակով ձևավորված մասնագիտական խմբի առաջին նիստը։ Խումբը ստեղծվել է հիմնադրամի տնօրենի՝ Դավիթ Բանուչյանի հրամանով՝ «Կինեմատոգրաֆիայի մասին» ՀՀ օրենքում նախատեսվող փոփոխությունների շուրջ ոլորտի մասնագետների հետ համատեղ քննարկումներ իրականացնելու նպատակով։
«Ֆիլմարտադրողների Համահայկական Ֆեդերացիա» ՀԿ-ն, որի ներկայացուցիչը՝ Հովհաննես Գալստյանը, մասնակցում է աշխատանքային խմբի աշխատանքներին, հանդես է եկել հաղորդագրությամբ՝ արձագանքելով նիստին հաջորդած քննարկումներին ու հրապարակումներին։
Ֆեդերացիան իր մտահոգությունն է հայտնել «նիստի ընթացքում որոշ մասնակիցների ագրեսիվ վարքի, ապա, նիստին հաջորդած հրապարակումներում, իբր թափանցիկության քողածածկույթի տակ, խմբի աշխատանքներին միջամտելու փորձերի կապակցությամբ»։
Հաղորդագրության մեջ ասվում է, որ որոշ կինոգործիչներ «ութ տարի շարունակ չեն նկատել կինոյի ոլորտում տեղի ունեցող խայտառակ ապօրինությունները» և այսօր անսպասելիորեն հանդես են գալիս որպես «օրինականության և հաշվետվողականության ռահվիրաներ»։
Միևնույն ժամանակ, Ֆեդերացիան վերահաստատել է իր դիրքորոշումը բարեփոխումների գործընթացի նկատմամբ՝ նշելով․ «Սատարում ենք Կինոյի հիմնադրամին և կողմ ենք վարվող բարեփոխումների ընթացքին, քանի դեռ դրանք հակասության մեջ չեն մտել Հիմնադրամի իսկ կողմից որդեգրած՝ ոլորտի առողջացման քաղաքականությանը»։
ՖԱՀՖ-ը միաժամանակ ընդգծում է, որ անընդունելի է համարում ««Կինեմատոգրաֆիայի մասին» ՀՀ օրենքում՝ կինոընկերությունների իրավունքների սահմանափակման, «Ազգային ֆիլմի» չափորոշիչների պակասեցման, Հիմնադրամին ֆիլմեր արտադրելու լիազորություններով օժտելու դրույթները»։
Ֆեդերացիան նաև դիմել է ՀՀ կրթության, գիտության, մշակույթի և սպորտի նախարարությանը և Հայաստանի կինոյի հիմնադրամին՝ պահանջելով «հստակ գնահատական՝ «Հայաստանի ազգային կինոկենտրոն» ՊՈԱԿ կառավարման ժամանակահատվածում տեղի ունեցած ապօրինությունների վերաբերյալ» և կոչ է արել ապահովել «իրավական գործընթացների թափանցիկ լուսաբանումը»։
Հաղորդագրության եզրափակիչ հատվածում նշվում է, որ ՖԱՀՖ-ը կինոոլորտի առողջացման միակ արդյունավետ ուղին համարում է «բաց քննարկումների միջոցով, միմիանց շահերը չանտեսելու և հայկական կինոյի զարգացման գերակայությունը հիմք ընդունելով առաջ շարժվելու ընթացքը»։
Հիշեցնենք, որ հուլիսի 28-ին Հայաստանի կինոյի հիմնադրամում կայացած մասնագիտական խմբի առաջին նիստից հետո հիմնադրամը հրապարակեց հաղորդագրություն հանդիպման մասին, սակայն դրան հաջորդեցին կինոգործիչների հայտարարությունները, որոնցում նրանք հայտնեցին իրենց անհամաձայնությունը ներկայացված օրենսդրական փոփոխություններին և ընդգծեցին, որ հիմնադրամը իր հրապարակման մեջ չի անդրադարձել հնչած հակափաստարկներին։
