2025թ․ հուլիսի 28-ին Հայաստանի կինոյի հիմնադրամում տեղի է ունեցել կինեմատոգրաֆիայի ոլորտում իրավակարգավորումների և ընթացակարգային բարեփոխումների վերաբերյալ մասնագիտական խմբի առաջին նիստը, որի աշխատանքներին մասնակցել են նաև Հայաստանի կինոգործիչների միության նախաձեռնությամբ ձևավորված ոլորտային կազմակերպությունների ներկայացուցիչներ։
Հայաստանի կինոյի հիմնադրամը հանդիպումից հետո հրապարակեց հաղորդագրություն՝ ներկայացնելով քննարկման մեկնարկը։ Սակայն դրան հաջորդեց մասնագիտական խմբի մի շարք անդամների՝ ոլորտը ներկայացնող գիլդիաների ու ասոցիացիաների ղեկավարների համատեղ հայտարարությունը, որտեղ ընդգծվում է, որ հանդիպման ընթացքում իրենք հստակ արտահայտել են նախագծված օրենսդրական փոփոխությունների անընդունելիությունը։
«Մենք ներկայացրել ենք կինոհամայնքի անհամաձայնության պատճառները: Հույս ունենք, որ այսուհետ հրապարակված տեղեկատվությունները կլինեն ամբողջական և ճշգրիտ կարտացոլեն քննարկման բովանդակությունը, ներառյալ՝ հնչած անհամաձայնությունները»,- նշված է հայտարարության մեջ։
Արտյոմ Բաղդասարյան՝ Հայաստանի կինոռեժիսորների և կինոպրոդյուսերների գիլդիայի նախագահ
Արմինե Անդա՝ Հայաստանի անիմացիայի գիլդիայի նախագահ
Տիգրան Առաքելյան՝ Հայաստանի անիմացիոն ընկերությունների ասոցիացիայի նախագահ
Րաֆֆի Մովսիսյան՝ կինոգետ, կինոռեժիսոր, պրոդյուսեր
Զառա Ջյան՝ կինոռեժիսոր, պրոդյուսեր
Կարինե Սիմոնյան՝ կինոպրոդյուսեր
Թամարա Ստեփանյան՝ կինոռեժիսոր
Հայաստանի կինոգործիչների միությունն իր հերթին վերահաստատել է իր հանձնառությունը՝ հետևելու բոլոր ընթացող գործընթացներին՝ հաշվի առնելով հայկական կինոյի զարգացման շահերը։
«Հայաստանի կինոգործիչների միությունը լինելով շահագրգիռ հայկական կինոյի զարգացմամբ, և լինելով այն տեսակետին, որ բոլոր փոփոխությունները՝ օրենսդրական, թե այլ կարգի, պետք է միտված լինեն հայկական կինոյի զարգացմանը, ուշադիր է լինելու ընթացող գործընթացների նկատմամբ։ Հուսանք, որ դրանք կլինեն կառուցողական և պայմանավորված հայկական կինոյի զարգացման շահերով։»,- նշված է միության տարածած հաղորդագրությունում։
Կինոգործիչները ակնկալում են թափանցիկ և հավասարակշռված գործընթաց, որն իսկապես կծառայի հայկական կինոյի երկարաժամկետ զարգացմանը։
