Երևանի «Ոսկե ծիրան» միջազգային կինոփառատոնի GAIFF Pro կրթական-արտադրական հարթակն այս տարի տեղի կունենա փառատոնի շրջանակում՝ հուլիսի 14-19-ը: GAIFF Pro-ի համարտադրության շուկան այս տարի ներառում է 17 ընտրված նախագծեր՝ 12-ը զարգացման փուլում և 5-ը՝ աշխատանքային մոնտաժային փուլում: Աշխատանքները ներկայացված են ավելի քան 10 երկրից՝ Հայաստան, Իրան, Վրաստան, Բրազիլիա, Արգենտինա, Եգիպտոս և Սաուդյան Արաբիա: Համարտադրողների թվում են նաև Ֆրանսիան, Գերմանիան, Լիտվան, Կանադան և ԱՄՆ-ն:
Short Cuts Nest–ի երրորդ թողարկումը՝ նվիրված հայկական կարճամետրաժ ֆիլմերի զարգացմանը, նպատակ ունի խթան հանդիսանալ տեղական կարճամետրաժ կինոյի որակի բարելավման համար և նպաստել նոր հեղինակների ի հայտ գալուն: Վեց ընտրված թիմերը կմասնակցեն անհատական աշխատարանների և կներկայացնեն իրենց նախագծերը Կինոկետ ընկերության կողմից սահմանված տեխնիկական սարքավորումների մրցանակի համար:
Այս տարվա GAIFF Pro-ի ընտրությունը խիստ մրցակցային էր: Ընտրական գործընթացն իրականացվել է անկախ ընթերցողների՝ միջազգային առաջատար մասնագետների կողմից:
TorinoFilmLab-ի ComedyLab-ի գիտական ղեկավար, Cannes Makers-ի ստեղծագործական խորհրդատու, Venice Biennale College-ի վիզուալ խորհրդատու, Talents Sarajevo-ի փորձագետ Ալեք Ֆոն Բարգենը, FESTIVAL SCOPE PRO-ի և FESTIVAL SCOPE-ի համահիմնադիր, Sarajevo Film Festival-ի ծրագրավորող Ալեսանդրո Ռայան, ֆիլմերի քաղաքականության հարցերով խորհրդատու, Եվրիմաժում Հունաստանի ներկայացուցիչ Էլենի Ճանդրինուն 2025 թվականի արտադրական հարթակի հատուկ հյուրերն ու ժյուրիի անդամներն են:
Առաջին անգամ տարածաշրջանում, GAIFF Pro-ն Filmmkaers Europe-ի հետ կներկայացնի քասթինգի խորացված աշխատարան, որը կղեկավարի Եվրոպայի ամենապահանջված քասթինգ տնօրեններից մեկը՝ Մաուրիլիո Մանգանոն: Նա համագործակցել է ռեժիսորների հետ, ինչպիսիք են Ջո Ռայթը, Պաբլո Լարաինը, Լուկա Գուադանինոն, Անջելինա Ջոլին և այլք: Մանգանոն երեք օր կաշխատի 16 ընտրված դերասանների հետ՝ Հայաստանից, Վրաստանից և Իրանից, կիսվելով իր փորձով և գործիքներ և հմտություններ սովորեցնելով՝ միջազգային քասթինգների հաջող մասնակցության համար:
Denkungsart GmbH-ի գլխավոր տնօրեն և Filmmakers Europe հարթակի հիմնադիր Դավիդ Ցիցլսպերգերը կներկայացնի արդյունաբերության թվայնացման և նորարարության ներուժը՝ տեղական մասնագետներին համաշխարհային շուկայի հետ կապելու համար:
GAIFF Pro-ի հյուրերից է Square Eyes վաճառքի ընկերության հիմնադիր Վաուտեր Յանսենը, որը հայտնի է համարձակ, հեղինակային կարճ և լիամետրաժ ֆիլմերի տարածմամբ: Մինչ այդ նա եղել է Go Short փառատոնի ծրագրավորման ղեկավարը 10 տարի: Որպես Locarno Open Doors-ի և First Cut Lab-ի փորձագետ՝ Վաուտերը կներկայացնի կարճամետրաժների փառատոնային և տարածման ռազմավարությունների մասին:
Հայաստանի օպերատորների գիլդիան՝ համագործակցելով արտադրական հարթակի և IMAGO-ի հետ, այս տարի կազմակերպում է եռօրյա բաց վարպետության դասընթացներ՝ նախատեսված բոլոր հավատարմագրված մասնագետների համար՝ միավորելով ոլորտի առաջատար անուններին (Ֆեդոն Պապամիքայել, Եվգենիա Ալեքսանդրովա, Ֆրեդ Քելեմեն):
