«Արմ Ֆիլմ Ինդուստրի Դևելոպմենտ» մշակութային հիմնադրամի նախաձեռնությամբ 2026 թվականի հունիսի 25–29-ը Երևանում կկայանա Երևանի կարճամետրաժ ֆիլմերի 9-րդ միջազգային կինոփառատոնը, որը պաշտոնապես հայտարարել է հայտերի ընդունման մեկնարկի մասին։
Փառատոնը նպատակ ունի բացահայտել երիտասարդ կինոռեժիսորների ներուժը, նպաստել նրանց մասնագիտական զարգացմանը և խթանել տարբեր երկրների երիտասարդ կինեմատոգրաֆիստների միջև ստեղծագործական և գործընկերային կապերի ամրապնդումը։ Ծրագրի առանցքում է նոր կինոսերնդի ձևավորումը և երիտասարդ հեղինակների աջակցությունը՝ նրանց ինտեգրումը ժամանակակից կինոյի գործընթացներին հեշտացնելու համար՝ հայ և օտարերկրյա կինոգործիչների միջև փորձի փոխանակման միջոցով։
Փառատոնի կառուցվածքը ներառում է ազգային և միջազգային մրցութային ծրագրեր։ Միջոցառումների շրջանակում նախատեսվում են վարպետության դասեր, ստեղծագործական հանդիպումներ, դիտում–քննարկումներ, շնորհանդեսներ և մասնագիտական այլ ձևաչափեր։
ԿինոՊրեսը հանդիսանում է փառատոնի պաշտոնական տեղեկատվական գործընկերը և կլուսաբանի փառատոնի ընթացքը, ծրագրերն ու մասնագիտական միջոցառումները։
Հայտերի ընդունումը իրականացվում է FilmFreeway հարթակի միջոցով։
Վերջնաժամկետը՝ 26 փետրվարի, 2026 թ.
