Հայաստանում Մհեր Մկրտչյանի «Արարատ 73» (ռուսական անվանում «Ոսկե դուբլ») ֆիլմի մեկնարկը տեղի ունեցավ փետրվարի 5-ին։ Բացման օրը՝ հինգշաբթի, ֆիլմը հավաքեց 1 409 500 դրամ, իսկ դահլիճներ այցելեց 461 հանդիսատես։ Մեկնարկային ցուցանիշները կարելի է գնահատել որպես չափավոր՝ հաշվի առնելով աշխատանքային օրվա գործոնը և սահմանափակ գովազդը։
Առաջին ուիքենդի ընթացքում ֆիլմը ցուցադրվեց 8 կինոթատրոնում և հավաքեց 9 487 825 դրամ, ներգրավելով 3477 դիտող։ Սա վկայում է, որ ուիքենդի օրերին հետաքրքրությունը որոշ չափով աճել է, սակայն ցուցանիշները չեն հասել լայն կոմերցիոն հաջողության մակարդակի։
Երկրորդ ուիքենդի հասույթը կազմել է 8 499 400 դրամ, ինչը ցույց է տալիս համեմատաբար կայուն պահպանում՝ առանց կտրուկ աճի կամ անկման։ Ընդհանուր առմամբ ֆիլմի դրամարկղային մուտքերը հասել են մոտ 24,8 միլիոն դրամի, իսկ հանդիսատեսի թիվը հատել է 10 հազարի շեմը։
Այս թվերը թույլ են տալիս արձանագրել, որ «Արարատ 73» Հայաստանում ունեցել է չափավոր, սակայն ոչ զանգվածային դիտողականություն։ Ֆիլմը պահպանել է կայուն ներկայություն վարձույթում, սակայն չի դարձել լայն հանրային իրադարձություն կամ բարձր դրամարկղային հաջողություն։
«Արարատ 73» ֆիլմի արտադրական բյուջեն կազմել է շուրջ 130 միլիոն ռուսական ռուբլի (մոտ 640 միլիոն դրամ)։ Այդ գումարից 30 միլիոն ռուբլին տրամադրվել է Ռուսաստանի մշակույթի նախարարության կողմից՝ որպես պետական աջակցություն։ Ֆիլմը պաշտոնապես ճանաչվել է Ռուսաստանի ազգային կինոնախագիծ և ներառվել պետական ֆինանսավորման համակարգում։
Ռուսաստանում ֆիլմի ընդհանուր դրամարկղային մուտքերը ներկայում կազմում են մոտ 22 միլիոն ռուբլի, ինչը զգալիորեն զիջում է արտադրական բյուջեին։ Նույնիսկ հաշվի առնելով, որ կինոթատրոնային եկամուտները միակ ֆինանսական աղբյուրը չեն (հեռուստատեսային իրավունքներ, թվային հարթակներ և այլ վաճառքներ), ներկայիս ցուցանիշները չեն խոսում կոմերցիոն հաջողության մասին լայն վարձույթի պայմաններում։
