Հայաստանում մեկնարկել է «ԵվրասիաԴոկ 2026» վավերագրական ֆիլմերի նախագծերի զարգացման աշխատարանի հայտերի ընդունումը։ Ծրագիրը նպատակ ունի աջակցել վավերագրական կինոյի նոր նախագծերի զարգացմանը և դրանց միջազգային առաջխաղացմանը:
Վերջին տարիներին հայկական վավերագրական կինոն ավելի ակտիվ ներկայություն է գրանցում միջազգային փառատոններում, և նման կրթական ծրագրերը դարձել են այն կարևոր հարթակներից մեկը, որտեղ ձևավորվում են ապագա նախագծերը։ «ԵվրասիաԴոկ»-ը հենց այդպիսի նախաձեռնություններից է, որը միավորում է երիտասարդ հեղինակներին և փորձառու մասնագետներին։
Աշխատարանից դեպի միջազգային փառատոններ
2011 թվականից իրականացվող աշխատարանի շրջանակում զարգացած մի շարք նախագծեր հետագայում արժանացել են միջազգային ճանաչման։ Այդ ֆիլմերից են, օրինակ՝ Շողակաթ Վարդանյանի «1489»-ը, որը մրցանակ է ստացել Ամստերդամի IDFA կինոփառատոնում, Հովհաննես Իշխանյանի «Սիրունիկն ու փաստաբանը», ինչպես նաև Թամարա Ստեփանյանի «Կանանց գյուղը»։
Այս փորձը ցույց է տալիս, որ նման աշխատարանները ոչ միայն կրթական, այլև արդյունաբերական նշանակություն ունեն՝ դառնալով հայկական նախագծերի միջազգային ճանապարհի առաջին փուլերից մեկը։
Ինչ է նախատեսում ծրագիրը
«ԵվրասիաԴոկ 2026»-ը նախատեսված է լիամետրաժ վավերագրական ֆիլմերի հեղինակների համար։ Ապրիլից հունիս անցկացվող 12-օրյա ինտենսիվ ծրագրի ընթացքում մասնակիցները կաշխատեն իրենց նախագծերի սցենարական կառուցվածքի, գաղափարական ձևակերպման և միջազգային ներկայացման համար անհրաժեշտ նախագծային փաթեթի վրա։
Ծրագրի ավարտին նախատեսվում է նախագծերի փիթչինգը, որի ընթացքում լավագույն նախագծերը կարող են ստանալ դրամական և մասնագիտական աջակցություն։
Բացի այդ, կազմակերպիչները նախատեսում են նաև նախագծերի անգլերեն փաթեթների պատրաստում և խորհրդատվություն միջազգային մասնագետների հետ։
Ովքեր են դասընթացավարները
Աշխատարանը կվարեն միջազգային փորձ ունեցող կինոգործիչներ, այդ թվում՝ ռեժիսոր և պրոդյուսեր Սիլվա Խնկանոսյանը («Nothing to be Afraid
Of», «Far from Michigan»), որի ֆիլմերը ցուցադրվել են DOK Leipzig և Ռոտերդամի միջազգային կինոփառատոնում, ինչպես նաև ռեժիսոր, պրոդյուսեր և սցենարի հեղինակ Նաիրի Հախվերդին («Ավլելով Երևանը»)։
Ինչպես մասնակցել
Աշխատարանին դիմելու վերջնաժամկետը 2026 թվականի մարտի 25-ն է։
Մինչ այդ կազմակերպիչները նախատեսում են տեղեկատվական հանդիպումներ, որոնց ընթացքում հետաքրքրված հեղինակները կարող են ավելի մանրամասն ծանոթանալ ծրագրին և հարցեր ուղղել կազմակերպիչներին։
Ծրագիրն իրականացվում է «ԱՓ» կրթամշակութային ՀԿ-ի կողմից՝ ԱրմԴոկ վավերագրողների հայկական ասոցիացիայի հետ համագործակցությամբ։
Նախաձեռնությունը իրականացվում է ՀՀ կրթության, գիտության, մշակույթի և սպորտի նախարարության, Հայաստանում Ֆրանսիական ինստիտուտի և «DocMonde» կազմակերպության աջակցությամբ։
