Հայաստանի Հանրապետության արդարադատության նախարարությունը տեղեկացրել է «ԿինոՊրես»-ին, որ «Հայաստանի ազգային արխիվ» ՊՈԱԿ-ի Կինոֆոտոֆոնո փաստաթղթերի և ապահովագրական պատճենների մասնաճյուղի գործունեությունը դադարեցնելու և դրա գործառույթները Հայաստանի կինոյի հիմնադրամին փոխանցելու վերաբերյալ կառավարության որոշման նախագիծը դեռևս գտնվում է քննարկման և ուսումնասիրության փուլում և չի ներկայացվել կառավարության հաստատմանը։
Հիշեցնենք, որ նախագիծը հանրային քննարկման էր ներկայացվել դեռևս 2025 թվականի հունվարի 23-ին, իսկ քննարկումները շարունակվել էին մինչև փետրվարի 7-ը։ Սակայն դրանից անցել է գրեթե մեկ տարի, և մինչ օրս փաստաթուղթը չի ստացել վերջնական ընթացք կամ հստակ ժամանակացույց։
Արդարադատության նախարարության պարզաբանմամբ՝ հանրային քննարկման ընթացքում ներկայացվել են տարբեր դիտարկումներ և առաջարկություններ, ինչի արդյունքում առաջացել է առանձին հարցերի լրացուցիչ ուսումնասիրության և նախագծում հնարավոր խմբագրումներ կատարելու անհրաժեշտություն։ Այդ հանգամանքով է պայմանավորված նախագծի չներկայացումը կառավարության հաստատմանը։
Քննարկման շրջանակում ներկայացված կարծիքները հիմնականում վերաբերում էին կինոժառանգության պահպանման արդյունավետությանը, մասնաճյուղի ֆոնդի արժեքին, կառավարման մոդելի նպատակահարմարությանը, ինչպես նաև գործող օրենսդրության հետ նախագծի փոխկապակցվածությանը։ Մի շարք մեկնաբանություններում բարձրացվել էին նաև իրավական հստակեցումների և ձևակերպումների անհրաժեշտության հարցեր։
Ֆինանսավորման մասով նախարարությունը հայտնել է, որ նախագծի չավարտված կարգավիճակի պայմաններում այս փուլում միանշանակ ձևակերպումներ նպատակահարմար չեն համարվում։ Միևնույն ժամանակ նշվում է, որ ընթացիկ քննարկումների համատեքստում նախատեսվում է մասնաճյուղի բյուջեի փոխանցումը Հայաստանի կինոյի հիմնադրամին, սակայն այդ դրույթը դեռևս չունի վերջնական իրավական ամրագրում։
Այսպիսով, կինոֆոտոֆոնո արխիվի կառավարման, իրավական կարգավիճակի և ֆինանսավորման վերաբերյալ հարցը մեկ տարի անց շարունակում է մնալ բաց, իսկ համապատասխան նախագիծը՝ չհաստատված։
