Արդարադատության նախարարությունը հանրային քննարկման է ներկայացրել «Հայաստանի ազգային արխիվ» ՊՈԱԿ-ի կինոֆոտոֆոնո փաստաթղթերի և ապահովագրական պատճենների մասնաճյուղի գործունեությունը դադարեցնելու մասին նախագիծը:
Նախագծով առաջարկվում է Հայաստանի կինոյի հիմնադրամին վերապահել կինոֆոտոֆոնո ոլորտի առանցքային բոլոր ծառայությունների, այդ թվում՝ կինոժառանգության վերականգնման, թվայնացման, պահպանման և արխիվային ծառայությունների մատուցումը՝ որպես «Կինեմատոգրաֆիայի մասին» օրենքի կիրարկումը ապահովող նեղ մասնագիտացված կազմակերպության, իսկ վերահսկողությունը փոխանցել տվյալ ոլորտը համակարգող Հայաստանի Հանրապետության կրթության, գիտության, մշակույթի և սպորտի նախարարությանը։
Նախագծում նախատեսվում է «Հայաստանի ազգային արխիվ» ՊՈԱԿ-ի Կինոֆոտոֆոնո փաստաթղթերի և ապահովագրական պատճենների մասնաճյուղի գույքը, տեսալսողական՝ կինոփաստաթղթերը, ֆոտոփաստաթղթերը, ֆոնոփաստաթղթերը և տեսափաստաթղթերը, հանձնել Հայաստանի կինոյի հիմնադրամին, ինչպես նաև «Հայաստանի ազգային արխիվ» ՊՈԱԿ-ից վերցնել և Հայաստանի կինոյի հիմնադրամին անհատույց օգտագործման իրավունքով ամրացնել Կինոֆոտոֆոնո փաստաթղթերի և ապահովագրական պատճենների մասնաճյուղի կողմից շահագործվող շենքերն ու շինությունները [որը գործում է Թբիլիսյան խճուղի, 25/15 շենքում — խմբ.] և հողատարածքները՝ 2018 թվականի հունվարի 1-ի դրությամբ վերագնահատված՝ 1 416 403 200 ՀՀ դրամ արժեքով։
Սահմանվում է, որ Հայաստանի կինոյի հիմնադրամը հանդիսանում է արխիվ՝ «Արխիվային գործի մասին» օրենքի 3-րդ հոդվածի 10-րդ կետի իմաստով, այն է՝ կինո-, ֆոտո-, ֆոնո-, տեսա- փաստաթղթերի համալրման, հաշվառման, պահպանության և օգտագործման, ինչպես նաև գիտական, մշակութային և Հայաստանի Հանրապետության օրենսդրությամբ սահմանված այլ գործունեություն իրականացնելու իմաստով։
Կառավարության ընդունած N 618-Ա որոշմամբ «Հայաստանի ազգային կինոկենտրոն» ՊՈԱԿ-ը վերակազմավորվել է Հայաստանի կինոյի հիմնադրամի: Վերջինս ստեղծվել է՝ հաշվի առնելով կինոոլորտի և կինոարտադրության իրավահարաբերությունների կարգավորման, այդ թվում՝ կինոռեեստրի, վարձույթի, ազգային ֆիլմի ստեղծման, տարածման ու պահպանման, համատեղ արտադրության ֆիլմերի ստեղծման և կարգավիճակի տրամադրման, կինոժառանգության վերականգնման ու թվայնացման գործառույթների անհրաժեշտությունը: Ուստի անհրաժեշտություն է առաջացել մեկ մարմնի մեջ միավորել կինոֆոտոֆոնո ոլորտին առնչվող գործունեության բոլոր տեսակները՝ ունենալով մեկ նեղ մասնագիտացված մարմին ոլորտին առնչվող գործունեության իրականացման համար։
Հիշեցնենք, որ Կինոֆոտոֆոնո փաստաթղթերի կենտրոնական պետական արխիվը (ԿՖՖՓ) ստեղծվել է ՀԽՍՀ ժողկոմխորհի որոշմամբ՝ 1943թ.: Արխիվը կոչված էր ի մի հավաքելու, պետական պահպանության վերցնելու և գիտական լայն շրջանառության մեջ դնելու հայ ժողովրդի պատմության հետ առնչվող արժեքավոր կինոֆոտոֆոնո փաստաթղթերը: ՀՀ կառավարության 1993թ. դեկտեմբերի 6-ի N 611 որոշմոմբ և ՀՀ մշակույթի նախարարի 1993թ. դեկտեմբերի 8-ի N 326 հրամանով արխիվը վերակազմակերպում է Հայաստանի ազգային ֆիլմադարանի: ՀՀ կառավարության 2005թ. օգոստոսի 4-ի N1237-ն որոշմոմբ ֆիլմադարանը վերակազմակերպվում է Հայաստանի ազգային արխիվի կինոֆոտոֆոնո փաստաթղթերի և ապահովագրական պատճեների մասնաճյուղի (ԿՖՖՓԱՊ): Մասնաճյուղում պահվում են հանրապետական արտադրության փաստավավերագրական ու գեղարվեստական ֆիլմեր, հատուկ թողարկումներ, կինոամսագրեր և տարեգրական բազմաթիվ կինոփաստաթղթեր: Արխիվում կենտրոնացված ամենավաղ թվագրման ֆիլմերից են «Ջոն Հորբորդի արշավախումբը Հայաստանում» (1920թ.) փաստավավերագրական, «Նամուս» (1925թ.), «Զարե» (1926թ.), «Շոր և Շորշոր» (1926թ.), «Չար ոգի» (1927թ.), «Խասփուշ» (1927թ.) և այլ համր գեղարվեստական ֆիլմեր:
Նախագծի վերաբերյալ հնարավոր է թողնել կարծիք, կամ առաջարկել լրամշակում:
