Ֆիլմարտադրողների Համահայկական Ֆեդերացիան (ՖԱՀՖ) սեպտեմբերի 4-11-ը մասնակցում է Վենետիկի 83-րդ միջազգային կինոփառատոնի շրջանակում անցկացվող Venice Production Bridge արդյունաբերական ծրագրին։ Ֆեդերացիան Վենետիկում ներկայացնում է երկու նախաձեռնություն՝ «Սինեմա Ալյանս» ծրագիրը և «Վերա» կինոնախագիծը։
«Սինեմա Ալյանսը» ՖԱՀՖ հովանու ներքո ձևավորված կինոարտադրության ոլորտի ընկերությունների և մասնագետների ցանց է, որի նպատակը միջազգային նկարահանող խմբերին Հայաստանում անհրաժեշտ արտադրական ծառայությունների հասանելիությունն ապահովելն է մեկ միասնական հարթակի միջոցով։ Նախաձեռնությունը ներառում է կինոարտադրության տարբեր փուլերի ծառայություններ՝ նկարահանման վայրերի ընտրությունից մինչև հետարտադրություն։ Վենետիկում ծրագիրը ներկայացվում է նաև Venice Film Production Market-ի մասնակիցներին։
ՖԱՀՖ-ի երկրորդ ներկայացվող նախագիծը «Վերա» ֆիլմն է՝ Էստոնիայի, Հայաստանի, Լեհաստանի, Բելգիայի և ԱՄԷ-ի համատեղ արտադրությունը։ Նախագծի հիմքում Արցախի շրջափակման 207-րդ օրը Մարտակերտում զուգահեռ զարգացող երկու իրադարձություններ են։ Ֆիլմի ստեղծագործական կազմում ընդգրկված են էստոնացի և հայ մասնագետներ, իսկ հետարտադրությունը նախատեսվում է իրականացնել Լեհաստանում։ Ըստ ՖԱՀՖ-ի՝ նախագիծը ներկայում մոտեցել է նկարահանման փուլին։
Վենետիկում Ֆեդերացիայի ներկայացուցիչները մասնակցում են նաև կինոարդյունաբերության մասնագիտական միջոցառումներին և հանդիպումներին։ Սեպտեմբերի 5-ի ծրագրում ներառված է Եվրոպական պրոդյուսերների ակումբի՝ EPC-ի ընդունելությունը, իսկ սեպտեմբերի 7-ին նախատեսված է մասնակցություն կինոհանձնաժողովների խթանման ծրագրերին նվիրված մասնագիտական քննարկմանը։
Սեպտեմբերի 8-ին ՖԱՀՖ միջազգային կապերի պատասխանատու Անի Գալստյանը նախատեսում է հարցազրույց տալ իտալական FRED՝ Film Radio Entertainment & Dialogue հարթակին։
Ֆեդերացիայի հաղորդմամբ՝ Վենետիկում նախատեսված է շուրջ 30 հանդիպում միջազգային կինոարդյունաբերության և կինոհանձնաժողովների ներկայացուցիչների հետ։ Այցի ընթացքում ձեռք բերված պայմանավորվածությունների և արդյունքների մասին ՖԱՀՖ-ը նախատեսում է զեկուցել աշնանը Երևանում կայանալիք իր պլենար ժողովի ընթացքում։
