Մոսկվայի միջազգային կինոփառատոնի շրջանակում այս օրերին ընթանում է անվանի հայ կինոռեժիսոր Հարություն Խաչատրյանի ֆիլմերի հետահայաց ցուցադրությունը։ Այս նախաձեռնությունը նվիրված է վարպետի 70-ամյակին և կրում է խորհրդանշական անվանում՝ «Հայաստան․ Հարություն Խաչատրյանի վավերագրական որմնանկարները»։
Ցուցադրության շրջանակում փառատոնի այցելուները հնարավորություն ունեն դիտելու Խաչատրյանի նշանավոր աշխատանքները՝ «Կոնդ», «Սահման», «Վերադարձ Ավետյաց երկիր», «Սպիտակ քաղաք», «Պոետի վերադարձը», «Վավերագրողը» և «Նկարչի երեք գերեզմանները» ֆիլմերը։ Յուրաքանչյուր ֆիլմ անդրադարձ է ժամանակի, հիշողության և ինքնության խորքային շերտերին՝ ներկայացված վավերագրական կինոյի խաչատրյանական տաղանդով։
Փառատոնի պաշտոնական ծրագրում մշակութաբան, Մշակութաբանության Նոր ինստիտուտի տնօրեն Նինա Կոչելյաևան ընդգծում է․ «Հայ ռեժիսոր, վավերագրող Հարություն Խաչատրյանի անունն այլևս համաշխարհային կինոյի պատմության մեջ է, և նրա ծննդյան 70-ամյակին նվիրված ծրագիրը հարգանքի տուրք է վարպետի կինեմատոգրաֆիկ տաղանդին»։
Մոսկվայի միջազգային կինոփառատոնը անցկացվում է ապրիլի 17-ից 24-ը:
