Փառատոնը կազմակերպում է «Արմ Ֆիլմ Ինդուստրի Դևելոպմենտ» մշակութային հիմնադրամը՝ «Մեղրի՝ Համագործակցության մշակութային մայրաքաղաք 2026» ծրագրի շրջանակում։ Նախաձեռնությունն իրականացվում է ՀՀ կրթության, գիտության, մշակույթի և սպորտի նախարարության և ԱՊՀ մասնակից պետությունների հումանիտար համագործակցության միջպետական հիմնադրամի աջակցությամբ։
Փառատոնի նպատակը Համագործակցության երկրների երիտասարդ կինեմատոգրաֆիստների միջև մասնագիտական և ստեղծագործական կապերի զարգացումն է։ Կազմակերպիչների խոսքով՝ այն պետք է դառնա փորձի փոխանակման, նոր համագործակցությունների և ապագա համատեղ նախագծերի ձևավորման հարթակ։
Մրցութային ծրագրին կարող են ներկայացվել խաղարկային կարճամետրաժ ֆիլմեր։ Դիտարկվելու են 2024–2025 թվականներին արտադրված՝ մինչև 30 րոպե տևողությամբ ֆիլմեր։ Պարտադիր պայմաններից մեկն այն է, որ ֆիլմի արտադրության ավարտի պահին ռեժիսորի տարիքը լինի 18-35։ Ֆիլմը կարող է լինել ցանկացած լեզվով, սակայն հայտի դիտարկման համար անհրաժեշտ է ռուսերեն ենթագրերի առկայությունը։
Փառատոնի մրցութային ծրագիրը կներառի 30 կարճամետրաժ ֆիլմ։ Բացի մրցութային ցուցադրություններից, նախատեսվում են նաև հետահայաց ծրագրեր, պանելային քննարկումներ, ստեղծագործական հանդիպումներ, բացման և փակման արարողություններ, ինչպես նաև մշակութային միջոցառումներ Մեղրիում։
Փառատոնի կանոնակարգին ու հայտերի ներկայացման կարգին կարող եք ծանոթանալ «ԿինոՊրես»-ի Տելեգրամ ալիքում:
Մեղրին որպես փառատոնի անցկացման վայր ընտրվել է այն պատճառով, որ քաղաքը 2026 թվականին կրելու է Համագործակցության մշակութային մայրաքաղաքի կարգավիճակը։ Այդ հանգամանքը հնարավորություն է տալիս Հայաստանի հարավային քաղաքին ընդգրկվել միջազգային մշակութային օրակարգում և ուշադրություն հրավիրել իր տարածաշրջանային, պատմական ու մշակութային ներուժի վրա։
Այս առումով փառատոնը կարող է կարևոր լինել ոչ միայն երիտասարդ հեղինակների համար, այլև Հայաստանի կինոմշակութային կյանքի ապակենտրոնացման տեսանկյունից։ Մասնագիտական կինոիրադարձությունը դուրս է գալիս ավանդական երևանյան հարթակներից և տեղափոխվում Սյունիքի մարզ, ինչը կարող է նպաստել տեղական մշակութային կյանքի աշխուժացմանը։
Մասնակցության հայտերն ընդունվում են մինչև 2026 թվականի մայիսի 31-ը՝ Երևանի ժամանակով ժամը 23:59-ը։
