Հայ դերասան Սամվել Թադևոսյանը ժամանել է Ուզբեկստանի մայրաքաղաք Տաշքենդ՝ մասնակցելու հոկտեմբերի 23-24-ին անցկացվող Golden Globes Silk Road Tribute Gala միջազգային միջոցառմանը։ Հոկտեմբերի 24-ին կայանալիք հանդիսավոր արարողության ընթացքում դերասանին կհանձնվի Golden Globes Beacon Award մրցանակը։
Ինչպես Տաշքենդից հայտնում է KinoPress-ը, հոկտեմբերի 23-ին արդեն մեկնարկել են միջոցառման շրջանակում նախատեսված հանդիպումներն ու ընդունելությունները, որոնց մասնակցում են տարածաշրջանի կինոգործիչներ և միջազգային կինոարդյունաբերության ներկայացուցիչներ։
Golden Globes Beacon Award մրցանակը նախատեսված է Կենտրոնական Ասիայի և Կովկասի կինոյի ու հեռուստատեսության նոր սերնդի այն դերասանների համար, որոնց ստեղծագործական գործունեությունը նպաստում է տարածաշրջանի կինոարվեստի զարգացմանն ու ճանաչմանը։
Սամվել Թադևոսյանը լայն ճանաչում է ձեռք բերել Մհեր Մկրտչյանի «Կյանք ու կռիվ» ֆիլմում Տիգրանի դերակատարմամբ, որի համար արժանացել է Հայաստանի Հանրապետության պետական մրցանակի և Հայաստանի ազգային կինոակադեմիայի «Անահիտ» մրցանակի։ Նրա դերասանական աշխատանքը գնահատվել է նաև «Ոսկե ծիրան» միջազգային կինոփառատոնի հատուկ մրցանակով։
Դերասանի ստեղծագործական կենսագրության մեջ առանձնահատուկ տեղ են զբաղեցնում նաև միջազգային կինոնախագծերը։ Նա գլխավոր դեր է կատարել Լևոն Մինասյանի «Բրավո, վիրտուոզ» (Bravo, Virtuoso!) հայ-ֆրանս-բելգիական համատեղ արտադրության ֆիլմում՝ մարմնավորելով երիտասարդ երաժիշտ Ալիկին։
Թադևոսյանը նկարահանվել է նաև բելգիացի ռեժիսոր Ջեսիկա Վուդվորթի «Լուկա» (Luka, 2023) միջազգային համատեղ արտադրության ֆիլմում՝ Ջերալդին Չապլինի և այլ արտասահմանյան դերասանների հետ։ Ֆիլմի համաշխարհային պրեմիերան կայացել է Ռոտերդամի միջազգային կինոփառատոնում։
Տաշքենդում անցկացվող միջոցառմանը ներկա են նաև համաշխարհային կինոյի հայտնի ներկայացուցիչներ։ Նրանց թվում են երկու անգամ «Օսկարի» արժանացած դերասան Էդրիեն Բրոուդին և դերասանուհի Օլգա Կուրիլենկոն, որոնց KinoPress-ը հանդիպել է հոկտեմբերի 23-ի միջոցառումների ընթացքում։
Golden Globes Silk Road Tribute Gala-ն անցկացվում է առաջին անգամ։ Այս տարի կազմակերպիչները նախատեսում են մեծարել վեց կինոգործչի՝ Հայաստանից, Ուզբեկստանից, Ադրբեջանից, Վրաստանից և Ղազախստանից։ Միջոցառումն իրականացվում է Vivid Strategies ընկերության կողմից՝ Golden Globes-ի հետ համագործակցությամբ։
Մրցանակաբաշխության հիմնական արարողությունը տեղի կունենա հոկտեմբերի 24-ին։
