Հայաստանի կինոգործիչների միությունը կրկին կոչ է արել վերանայել կինեմատոգրաֆիայիոլորտի ֆինանսավորման համար մրցույթների կազմակերպմանն ու անցկացմանը վերաբերող կարևոր փաստաթուղթը: Վերջերս հրապարակված իր հայտարարության մեջ միությունն ընդգծում է, որ քննարկման մասնակիցների կողմից արված առաջարկներից և դիտողություններից շատերը հաշվի չեն առնվել փաստաթղթի վերջնականացման ժամանակ:
Հայկական կինոյին վերաբերող որևէ փաստաթուղթ չի կարող չարտացոլել կինոգործիչները շահերը:
Դեռևս մարտ ամսին Հայաստանի կինոգործիչների միությունն իր մտահոգությունն էր հայտնել «Կինեմատոգրաֆիայի ոլորտին պետական ֆինանսավորում հատկացնելու նպատակով մրցույթների կազմակերպման և անցկացման կանոնակարգ» փաստաթղթի առնչությամբ, նշելով, որ կինոոլորտի մարդիկ՝ պրոդյուսերներ, ռեժիսորներ և այլն, որոնք ակտիվ մասնակցել են փաստաթղթի քննարկումներին և շահագրգիռ են որակյալ փաստաթուղթ ունենալու հարցում, որը կնպաստի կինոյի զարգացմանը, չպետք է ունենան կասկածներ, մտահոգություններ նման կարևոր փաստաթղթի քննարկումների և դրա ընդունման հետ կապված։
Օրերս փաստաթուղթը հրապարակվեց Հայաստանի կինոյի հիմնադրամի կողմից, որը, սակայն, չփարատեց կինոգործիչների մտահոգությունները։
Վերջիններիս կողմից արդարացիորեն նշվում է, որ փաստաթղթի քննարկման ժամանակ կինոգործիչների կողմից արված բազմաթիվ դիտողություններն ու առաջարկությունները չեն ներառված արդեն ընդունված փաստաթղթում։
Հայաստանի կինոգործիչների միությունը կրկին պնդում է, որ կինոոլորտին և դրա զարգացմանը վերաբերող բոլոր փաստաթղթերը պետք է լինեն բացառապես կինոոլորտի զարգացմանը նպաստող և պետք է ընդունված լինեն կինոոլորտի մարդկանց մեծ ներգրավվածությամբ և հնարավորինս փոխհամաձայնությամբ։
Ապրիլի 30-ին, Ժամը 13։00-ին, Հայաստանի կինոգործիչների միությունը Կինոյի տանը հրավիրում է պրոֆեսիոնալ կինոգործիչների գիլդիաների համատեղ հանդիպում՝ քննարկելու առկա խնդիրները:
Պրոֆեսիոնալ կինոգիլդիաների բոլոր անդամներին խնդրում ենք ներկա լինել հանդիպմանը։
Հարկ է նշել, որ Հայաստանի կինոգործիչների միությունը փաստաթղթի նախագծի վերաբերյալ իր մտահոգությունները հայտնել էր դեռևս մարտի 5-ին, երբ նախագիծը քննարկման փուլում էր: Այն ժամանակ Միության ներկայացուցիչները վստահություն հայտնեցին, որ կարևոր է ստեղծել որակյալ և ոլորտի համար օգտակար փաստաթուղթ՝ միաժամանակ քննարկմանը ներգրավելով բոլոր շահագրգիռ անձանց, ներառյալ պրոդյուսերներին, ռեժիսորներին և կինոարտադրության այլ մասնագետների:
Թեև կանոնակարգի հաստատումը «Կինեմատոգրաֆիայի մասին» օրենքով հանդիսանում էր ՀՀ կրթության, գիտության, մշակույթի և սպորտի նախարարության լիազորությունը, որի մշակման համար 2024 թվականի ամռանը նախարարությունը աշխատանքային խումբ էր ձևավորել՝ ապրիլի 18-ին Հայաստանի կինոյի հիմնադրամի տնօրենը N 57-Լ հրամանով հաստատեց մրցույթների անցկացման կանոնակարգը:
Այժմ, երբ փաստաթուղթը հրապարակվեց, հնչեցված առաջարկներից ու դիտողություններից շատերն անուշադրության են մատնվել։ Սա ոլորտի մասնագետների մոտ ստեղծում է այն զգացողությունը, որ իրենց կարծիքը պատշաճ կերպով չի հաշվի առնվել, ինչը լրացուցիչ մտահոգություններ է առաջացնում:
