2025 թվականի մարտի 14-ին Վատիկանում տեղի ունեցավ բացառիկ իրադարձություն. «Parole Aperte» մշակութային ծրագրի շրջանակում ցուցադրվեց հայկական «ՍԻԳՄԱ» ֆիլմը: Այս ծրագիրը, որը նվիրված է 2025 թվականի հոբելյանին, ընդգծում է արվեստի և մշակույթի համաշխարհային երկխոսության կարևորությունը:
«ՍԻԳՄԱ» ֆիլմը, որը ստեղծվել է LETME Production կինոընկերության կողմից, բարձրացնում է պատերազմի և հավատքի թեմաները: Ռեժիսոր Արամ Մանուկյանի այս կարճամետրաժ ֆիլմը անդրադառնում է պատերազմի մեջ գտնվող մարդու բարոյական երկընտրանքներին և կյանքի ծիսական խորհրդանշաններին:
Այս ցուցադրությունը դարձավ հայ կինոյի միջազգային ճանաչման ևս մեկ քայլ: «ՍԻԳՄԱ» ֆիլմը ոչ միայն Վատիկանում ցուցադրվեց, այլև արժանացավ մշակութային վաստակի համար նախատեսված «Parole Aperte» մրցանակին: Մրցանակի արժանացան ֆիլմի ռեժիսոր, Ֆիլմարտադրողների համահայկական ֆեդերացիայի անդամ Արամ Մանուկյանը և համապրոդյուսեր Մարչելո Զեպպին՝ Մոնտեկատինիի միջազգային կինոփառատոնի (MISFF) նախագահն ու գեղարվեստական ղեկավարը:
Միջոցառման ընթացքում ողջույնի խոսքեր հղեցին Վատիկանի բարձրաստիճան անձինք, այդ թվում՝ Նորին գերազանցություն մոնսենյոր Անջելո Վինչենցո Զանին, ով կարևորեց նման մշակութային նախաձեռնությունների դերը մշակույթի զարգացման և միջազգայնացման տեսանկյունից: Միջոցառման գեղարվեստական ղեկավար պրոֆեսոր Ջենարո Կոլանջելոն նշեց, որ նման նախագծերը նպաստում են ոչ միայն արվեստի տարածմանը, այլև մշակութային երկխոսությանը։
«ՍԻԳՄԱ» ֆիլմը ներկայացվել էր նաև Մոնտեկատինիի միջազգային կինոփառատոնին 2024 թվականի աշնանը, որտեղ կայացավ դրա պաշտոնական համաշխարհային պրեմիերան: Այնուհետև ֆիլմը ներկայացվեց Վատիկանում:
Միջոցառման կազմակերպման գործում իրենց աջակցությունն են ցուցաբերել Մայր Աթոռ Սուրբ Էջմիածինը, Վատիկանում Սուրբ Էջմիածնի պաշտոնական ներկայացուցիչը, Հայաստանի Հանրապետության կրթության, գիտության, մշակույթի և սպորտի նախարարությունը, Հայաստանի Հանրապետության արտաքին գործերի նախարարությունը, ինչպես նաև Հայաստանի դեսպանությունները Իտալիայում և Վատիկանում:
