Մոնթե Մելքոնյանի մասին պատմող «Մոնթե» ֆիլմի պրեմիերան կկայանա 2026 թվականի նոյեմբերի 25-ին։ Այս մասին հայտնել է Genetic Production-ի հիմնադիր, ֆիլմի մտահղացման հեղինակ և գլխավոր պրոդյուսեր Նոնո Սարգսյանը։
Ֆիլմը նվիրված է Հայաստանի ազգային հերոս, Արցախի հերոս, Արցախյան առաջին պատերազմի հրամանատարներից Մոնթե Մելքոնյանին։ Նախագծի ստեղծման աշխատանքները սկսվել են Մոնթե Մելքոնյանի կնոջ՝ Սեդա Մելքոնյանի և եղբոր՝ Մարգար Մելքոնյանի համաձայնությունը ստանալուց հետո։
Սարգսյանի խոսքով՝ Մոնթե Մելքոնյանի մասին ֆիլմ նկարահանելու գաղափարը ձևավորվել էր դեռ «Վազգեն. Վերջին Սպարապետ» ֆիլմի ստեղծման ընթացքում։ Genetic Production-ը ևս ստեղծվել է նման նախագծերը շարունակական դարձնելու նպատակով, իսկ «Մոնթե»-ն նախատեսվել էր որպես այդ շարքի երկրորդ ֆիլմ։
«Վազգեն․ Վերջին Սպարապետը» ֆիլմը 2025 թվականին դարձել էր հայկական կինովարձույթի առաջատարը։ «ԿինոՊրես»-ի՝ կինոթատրոնների տվյալների հիման վրա կազմված ամփոփման համաձայն՝ ֆիլմը Հայաստանում հավաքել էր շուրջ 422 մլն դրամ և ունեցել 176 385 հանդիսատես։ Տվյալները չեն ներառում մարզային հավաքների թվերը:
Ֆիլմի ռեժիսորը Սուրեն Սաֆարյանն է, օպերատորը՝ Սուրեն Թադևոսյանը։ Մոնթե Մելքոնյանի կերպարը մարմնավորում է դերասան Վլադիմիր Մսրյանը։ Գլխավոր դերակատարի ընտրությունն իրականացվել է քասթինգի միջոցով։
Նկարահանումների ընթացքում ստեղծագործական խումբը բախվել է նաև պատերազմական տեսարանների կազմակերպման խնդրին։ Սարգսյանի խոսքով՝ նկարահանումների մեկնարկից առաջ ՀՀ պաշտպանության նախարարությունը հրաժարվել է աջակցել այդ տեսարանների իրականացմանը։ Արդյունքում անհրաժեշտ ռազմական ռեկվիզիտի մի մասը պատրաստվել է հատուկ ֆիլմի համար, իսկ նկարահանումներն իրականացվել են այլ անձանց և մասնագետների աջակցությամբ։
Գլխավոր պրոդյուսերը նաև հայտնել է, որ «Մոնթե»-ն հովանավորներ չունի և նկարահանվել է իր անձնական միջոցներով։ Ֆիլմի արտադրական բյուջեի կոնկրետ չափը չի հրապարակվել։
Նրա խոսքով՝ նախագիծը կոմերցիոն նպատակ չի հետապնդում։ Ֆիլմի ստեղծման հիմնական նպատակը Մոնթե Մելքոնյանի պատմության պահպանումն ու այն հաջորդ սերունդներին կինոյի միջոցով փոխանցելն է։
Հայաստանյան պրեմիերայից հետո նախատեսվում է ֆիլմը ներկայացնել նաև արտերկրում։ Նոնո Սարգսյանի խոսքով՝ հաջորդ պրեմիերան նախատեսվում է անցկացնել Միացյալ Նահանգներում, այնուհետև՝ Եվրոպայում։ Արտասահմանյան ցուցադրությունների կոնկրետ քաղաքներն ու ամսաթվերը դեռ չեն հրապարակվել։
