Պաշտոնապես՝ դանիացի դերասան Մադս Միկելսենը («Որս», «Դոկտոր Սթրենջ») կխաղա «Գերբնական գազաններ» ֆրանշիզայում չար հրաշագործ՝ Գրինդելվոլդի դերը: Warner Bros. պաշտոնական հայտարարության համաձայն դերասանը կփոխարինի Ջոնի Դեփին, որին ընկերությունը խնդրել է հեռանալ նախագծից:
Այն մասին, որ Միկելսենը կարող է փոխարինել Դեփին հայտնի է դարձել վերջինիս հեռանալու մասին հայտարարությունից անմիջապես հետո: Սակայն Մադսն ավելի ուշ հերքել է այդ տեղեկությունը՝ հայտարարելով, որ ստուդիայից ոչ մի առաջարկ չի ստացվել:
Հիշեցնենք, որ Ջոնի Դեփը հանդես է եկել դատարանում The Sun պարբերականի դեմ 2018 թվականի նյութի պատճառով, որտեղ ասվում էր, որ նա ծեծել է իր նախկին կնոջը՝ Էմբեր Հերդին: Նոյեմբերի 2-ին Լոնդոնի Գերագույն դատարանը մերժել է նրա հայցը, և դատավորը հաստատել է, որ բռնության 14 նկարագրված դեպքերից 12-ը ճշմարիտ են: Դրանից անմիջապես հետո դերասանը պատմել է ֆրանշիզայից հեռանալու մասին:
Չնայած Դեփը հասցրել է խաղալ իր դերը ընդամենը մեկ տեսարանում, Warner-ը նրան կվճարի ամբողջական հոնորարը, որը կազմում է մի քանի միլիոն դոլար:
«Գերբնական գազանների» երրորդ մասը կթողարկվի 2022 թվականի հուլիսի 15-ին։
