Փետրվարին մեկնարկելու է Եվրոպական կինոշուկան, որը անցկացվում է Բեռլինի միջազգային կինոփառատոնի՝ Բեռլինալեի շրջանակում: Միջոցառմանը Հայաստանը ներկայանալու է իր տաղավարով, որը կազմակերպելու է Հայաստանի կինոյի հիմնադրամը: Այս կապակցությամբ ՀՀ ԿԳՄՍ նախարարությունը հունվարի 21-ին կնքել է ՄՇԴ-6-2025 դրամաշնորհային պայմանագիրը:
Պայմանագրից հայտնի են դառնում Բեռլինի այցելության ակնկալվող արդյունքները, այն է՝ «Եվրոպական կինոշուկայում Հայաստանի ներկայացվածությունը կնպաստի հայկական կինոարվեստի միջազգային դիրքավորմանը, հայ-եվրոպական և այլ երկրների կինոարտադրողների միջև կապերի ստեղծմանը և ամրապնդմանը՝ խթանելով ոլորտի զարգացումը և հայ կինոյի միջազգային ճանաչելիությունը: Կզարգանան և կամրապնդվեն Հիմնադրամի միջազգային կապերը և գործունեությունը, ինչի արդյունքում կխթանվի հայ կինոժառանգության և ժամանակակից ֆիլմերի տարածումը և ճանաչելիությունը աշխարհում:»
Այս արդյունքին հասնելու համար Հայաստանի կինոյի հիմնադրամը նախանշել է հետևյալ նպատակները՝
- Հանդիսանալ որպես տեղեկատվական կենտրոն հայկական կինոարտադրանքով հետաքրքրված միջազգային հանրության համար:
- Տրամադրել աշխատանքային տարածք հանդիպումների և քննարկումների համար հայ պրոդյուսերներին, որտեղ նրանք կկարողանան բանակցություններ վարել և ներկայացնել իրենց կինոարտադրանքը:
- Ներկայացնել հայկական կինոարտադրանքը տպագրական և վիզուալ միջոցներով՝ կատալոգի տպագրություն, հոլովակների ցուցադրում:
- Ամրապնդել և ընդլայնել Հայաստանի կինոյի հիմնադրամի միջազգային կապերը: Աշխատել միջազգային կազմակերպությունների գործընկերների հետ՝ ընթացիկ և առաջիկա ծրագրերի քննարկման և հաստատման նպատակներով:
- Հանդիպումներ կազմակերպել միջազգային կինոֆոնդերի ներկայացուցիչների հետ՝ փորձի փոխանակման նպատակով:
- Ծանոթանալ Եվրոպական կինոշուկայում առկա կրթական ծրագրերի հետ՝ Հայաստանում ներդնելու նպատակով
- Կապ հաստատել Եվրոպական կինոշուկայում առկա դիստրիբյուտորական ընկերությունների հետ հնարավոր գործընկերության պայմաններին և մեխանիզմներին ծանոթանալու համար՝ դասական և ժամանակակից ֆիլմերը ներկայացնելու համար;
- Ամրապնդել համագործակցությունը կինոոլորտի այն կազմակերպությունների հետ, որոնց Հայաստանը անդամակցում է, դիտարկել նոր կազմակերպությունների անդամակցության հարցը:
Նպատակները իրագործելու համար Կինոյի հիմնադրամը ակնկալում է ունենալ հանդիպումներ Ռումինիաի, Մոլդովայի և Ֆրանսիայի կինոկենտրոնների հետ, նախատեսված են հանդիպումներ FIAF միջազգային կինոարխիվների ֆեդերացիայի, Մարտին Սկորսեզեի «Համաշխարային Ֆոնդի», Եվրիմաժի և մի շարք այլ կառույցների հետ, որոնց ցանկը ներկայացվում է ստորև՝
World Cinema Fund — համաշխարային կինոֆոնդի հետ՝ որպես նորաստեղծ Ֆոնդ ծանոթանալ գերմանական ֆոնդի աշխատանքների ձևաչափերին` փորձի փոխանակման նպատակով, քննարկել համագործակցության հնարավորությունները: Գերմանական Կինոֆոնդը կենտրոնացած է Լատինական Ամերիկայի, Կարիբյան և Խաղաղօվկիանոսյան տարածաշրջանի,Աֆրիկայի, Մերձավոր Արևելքի, Կենտրոնական և Հարավարևելյան Ասիայի, Կովկասի ֆիլմերի արտադրության և տարածման վրա:
Ռումինիայի ազգային կինոկենտրոնի ներկայացուցիչների/տնօրենի հետ` քննարկել կինո ոլորտում պոտենցիալ համագործակցության եզրերը:
Մոլդովայի ազգային կինոկենտրոնի ներկայացուցիչների/տնօրենի հետ` քննարկել կինո ոլորտում պոտենցիալ համագործակցության եզրերը:
Սալոնիկի միջազգային կինոփառատոնի ներկայացուցիչների/տնօրենի հետ` քննարկել հայկական դասական ֆիլմի/ֆիլմերի հատուկ ցուցադրություն կազմակերպելու հնարավորությունը 2025-2026 թթ. համար:
FIAF միջազգային կինոարխիվների ֆեդերացիայի ներկայացուցչի հետ` քննարկել համագործակցության եզրերը, հաշվի առնելով, որ Հայաստանի կինոյի հիմնադրամը նախատեսում է ընդլայնել իր ֆիլմերի վերականգնման գործունեությունը:
BEGIN AGAIN FILMS իսպանական դիստրիբուտորական կազմակերության հետ` հայկական ֆիլմերի իսպանալեզու երկրներում տարածման հնարավորությունը քննարկելու:
Իսպանական Սինեմիստիկա կինոփառատոնի ներկայացուցչի հետ` հայկական ֆիլմերի իսպանալեզու երկրներում տարածման հնարավորությունը քննարկելու:
Նախատեսվում են նաև հանդիպումներ կինոշուկայում ներկա դիստրիբուտորական կազմակերությունների հետ:
Ֆրանսիայի Կինոկենտրոնի (CNC) հետ` քննարկել Ֆրանսիայի Կինոկենտրոնի (CNC) և Հայաստանի կինոյի հիմնադրամի միջև ստորագրված Ֆրանսիա-Հայաստան գործողությունների ծրագրի 11 կետերի իրականացման հնարավորությունները` 2025-2026թթ. ընթացքում:
Եվրիմաժի հետ` քննարկել Եվրիմաժ մշակութային հիմնադրամի հետ 2025թ.-ին Հայաստանի կինոյի հիմնադրամի և Եվրիմաժի ընթացիկ համագործակցությունը:
Եվրոպական աուդիովիզուալ օբսերվատորիայի ներկայացուցչի հետ՝ հաշվի առնելով կառույցի վերակազմավորումը և կինոյի մասին
օրենքի ընդունումը քննարկել ավելի լայնածավալ համագործակցության հնարավորությունները:
Ուկրաինայի կինոինստիտուտի ներկայացուցչի հետ՝ քննարկել 2025թ. ընթացքում Ս. Փարաջանովի հոբելյանին նվիրված իրականացվելիք միջոցառումներին համատեղ մասնակցության հնարավորությունները:
Բրիտանական «Կինոկլասիկա»-ի հետ’ քննարկել «Կլասիկի» սթրիմինգային հարթակում, ինչպես նաև կազմակերպության հետ համագործակցող Լոնդոնի Leeds Cinema Hall և the Lumiere Cinema Hall կինոթատրոններում հայկական դասական և ժամանակակից ֆիլմերի նոր ցուցադրությունների հնարավորությունը:
Մարտին Սկորսեզեի «Համաշխարային Ֆոնդի» (Film Foundation) ներկայացուցչի հետ՝ քննարկել 2025թ. Բոլոնիա քաղաքում կայանալիք II Cinema Ritrovato արխիվային ֆիլմերի կինոփառատոնին հայկական դասական ֆիլմի/ֆիլմերի ցուցադրության հնարավորությունը:
Հնդկաստանի միջազգային կինոփառատոն և Ֆիլմ Բազաարի հետ՝ Հնդկաստանի Տեղեկատվության և հեռարձակման նախարարություն կինոյի աջակցման գրասենյակի ներկայացուցիչների հետ՝ քննարկել 2025թ. Հնդկաստանի միջազգային կինոփառատոնում (IFFI) Հայաստանը ներկայացնելու
որպես «Գործընկեր երկիր» առաջարկը և «Ֆիլմ Բազաար» կինոշուկային հնարավոր մասնակցությունը:
Հանդիպումների գերակշռող մաս են կազմում կինոժառանգության պահպանումով և տարածումով զբաղվող կազմակերպությունները: Միաժամանակ հայտում նշվում է, որ նախատեսվում է առնվազն 8 հանդիպում:
Ինչպես նշվում է դրամաշնորհային հայտում՝ 2025թ. Հայաստանի կինոյի հիմնադրամը նախատեսում է մասնակցել Եվրոպական կինոշուկային իրականացնելով ստույգ ռազմավարական նպատակներ. 2025թ. հայաստանյան պատվիրակությունը նախատեսում է ներկայանանալ Եվրոպական կինոշուկային «Ստեղծիր քո ֆիլմը Հայաստանում» (Create your film in Armenia) նախնական խորագրով, որը նպատակ ունի Հայաստանը ներկայացնել որպես հարմար և գրավիչ նկարահանման վայր: Հայաստանը կարող է օգտվել այս հնարավորությունից` գրավելով միջազգային պրոդյուսերների և ռեժիսորների ուշադրությունը, որոնք փնտրում են նոր, գեղատեսիլ և տեխնիկապես պատրաստ նկարահանման վայրեր:»
Արդյոք սա նշանակում է, որ Հայաստանի կինոյի հիմնադրամը նախատեսում է քայլեր ձեռնարկել և ներկայացնել դեռ չընդունված «Ներդրումների մասնակի վերադարձ»-ի ծրագիրը: Հնարավոր է մեզ սպասում է անակնկալ և Եվրոպական կինոշուկայի բացման օրը Հայաստանի կառավարությունը կընդունի համապատասխան կարգավորող նորմատիվ ակտը:
Պայմանագրից պարզ է դառնում նաև պատվիրակության բովանդակությունը՝ կինոշուկայում աշխատանքները կղեկավարի Հայաստանի կինոյի հիմնադրամի տնօրենը, պատվիրակության կազմում կաշխատեն միջազգային կապերի բաժնի ղեկավարը, Եվրիմաժի հայաստանյան ներկայացուցիչը, տաղավարի պատասխանատուն, տաղավարի աշխատողը և տեսալուսանկարիչը:
Հիմնադրամը տաղավարը գովազդելու համար կինոշուկայի կազմակերպիչներին պատվիրելու է գովազդային պաստառներ (2 հատ) Marriott Hotel- ում, Gropius Bau-ում: Սա կինոշուկայի երկրու խոշոր և հիմնական անցկացման վայրերն են: Gropius Bau-ում կինոշուկան գործում է 2006, իսկ Marriott հյուրանոցում 2009 թվականից:
Հայկական տաղավարը զբաղեցնելու է 12 ք.մ, որտեղ նաև կազմակերպվելու է հյուրասիրություն: Տպագտվելու է 2024-2025 թթ. հայկական կինոինդուստրիան նկարագրող կատալոգը, որը նաև հասանելի կլինի կինոշուկայի այցելուներին օնլայն ձևաչափով:
Այս տարվա Եվրոպական կինոշուկայի տաղավարի համար ՀՀ կրթության, գիտության, մշակույթի և սպորտի նախարարությունը հատկացրել է 4 մլն. 905 հզր. 5 դրամ:
Եվրոպական կինոշուկան անցկացվելու է փետրվարի 13-19-ը:
