Ռուսաստանի Դաշնության Պետդումայի պատգամավորները լիագումար նիստում երկրորդ և երրորդ ընթերցմամբ ընդունել են օրենսդրության փոփոխություններ՝ վարձութային վկայականի տրամադրման պահանջները հստակեցնելու նպատակով։ Փաստաթուղթը առաջին ընթերցմամբ ընդունվել էր հունիսի 24-ին։
Օրենքը ընդլայնում է ֆիլմի վարձութային վկայականի տրամադրման մերժման հիմքերի ցանկը՝ սահմանելով, որ այդպիսի հիմք կարող է լինել ֆիլմում առկա նյութերը, որոնք վարկաբեկում են ռուսական ավանդական հոգևոր և բարոյական արժեքները և (կամ) քարոզում են դրանց ժխտումը։
Բացի այդ, ՌԴ մշակույթի նախարարությունը կստանա հնարավորություն փոփոխություններ կատարելու ավելի վաղ տրված վարձութային վկայականում՝ երեխաների շրջանում ֆիլմի տարածման արգելքի վերաբերյալ տեղեկատվությունը թարմացնելու նպատակով։
Նորամուծությունները սահմանում են նաև պահանջներ առցանց տեսալսողական բովանդակություն ցուցադրողների համար։ Տեսալսողական ծառայությունների և սոցիալական ցանցերի սեփականատերերը պարտավոր են «Ռոսկոմնադզոր»-ի պահանջով մեկ օրվա ընթացքում դադարեցնել ֆիլմի կամ սերիալի տարածումը, եթե այդ բովանդակության վերաբերյալ վարձութային վկայականը հետ է կանչվել կամ տրվել է եզրակացություն, որ այն պարունակում է նյութեր, որոնք վարկաբեկում են ռուսական ավանդական հոգևոր և բարոյական արժեքները։
Բացի այդ, սոցիալական ցանցերի սեփականատերերը պարտավոր կլինեն վերահսկել իրենց հարթակները՝ նման բովանդակությունը հայտնաբերելու և անհրաժեշտության դեպքում վերացնելու նպատակով։
Ընդ որում, ինչպես ավելի վաղ հաղորդվել էր, օրինագծից հանվել է պահանջը՝ պարտադիր վարձութային վկայականներ ստանալու առցանց կինոթատրոններում ցուցադրվող բովանդակության համար։
Հիշեցնենք, որ այժմ քննարկման է դրված «Կինեմատոգրաֆիայի մասին» Հայաստանի Հանրապետության օրենքի փոփոխությունների փաթեթը, որի շրջանակում առաջարկվում է վերանայել վկայանի՝ ֆիլմի շրջանառություն դնելու իրավունքը հաստատող փաստաթղթի կարգավիճակը և սահմանել, որ վարձութային վկայականը «Հայաստանի Հանրապետության տարածքում ֆիլմի տարածման և ցուցադրման համար պարտադիր հանդիսացող ազգային մարմնի կողմից տրամադրվող թույլտվություն» է։ Սրանով պահպանվում է Ռուսաստանի Դաշնության ձևաչափը։
