Հայաստանի կինոյի հիմնադրամի փոխտնօրեն Վարդան Աբովյանը «ԱՊՀ երկրների կինեմատոգրաֆիա: Ընդհանուր անցյալ, ինքնիշխան ներկա, բազմաբևեռ ապագա» Սանկտ-Պետերբուրգի միավորված մշակույթների միջազգային ֆորումի պանելային քննարկման ժամանակ առաջարկել է, որ ԱՊՀ երկրներից մեկի վարձութային վկայական ստացած ֆիլմերը միանգամից վարձույթ ստանան Համագործակցության ողջ տարածքում:
Նրա խոսքով՝ նման հնարավորությունը թույլ կտա մեծապես պարզեցնել ԱՊՀ երկրների ներսում ֆիլմերի տարածման գործընթացը, գրում է ՏԱՍՍ-ը:
«Մենք մշակել ենք համաձայնագիր, որը կոչվում է «Վարչական համագործակցություն ծառայությունների ոլորտում», որը կապված է ֆիլմերի և տեսաֆիլմերի արտադրության և տարածման, ինչպես նաև ցուցադրման ծառայությունների հետ<…>: Այն արդեն ԵԱՏՄ երկրների միջկառավարական պայմանագրերի կնքման փուլում է, բայց դա կարելի է տարածել նաև ԱՊՀ երկրների վրա։ Կա մի շատ կոնկրետ կետ, որը կապված է ֆիլմի վարձույթի, դիստրիբյուցիայի հետ՝ «ցանկացած ֆիլմ, որը վարձութի հնարավորություն է ստացել այդ պետություններից մեկում, վավեր է մնացած բոլոր պետությունների համար»: Սա մեծապես հեշտացնում է ԱՊՀ երկրների ներսում տարածման գործընթացը», — ասել է Աբովյանը:
Բացի այդ Վարդան Աբովյանը հիշեցրեց նաև ԱՊՀ երկրների կինոյի հիմնադրամ ստեղծելու նախաձեռնության մասին, որը կֆինանսավորի համատեղ կինոնախագծերը: Ըստ Աբովյանի, դա կլիներ գործուն միջոց ընդհանուր մշակութային տարածությանը աջակցելու համար:
Քննարկմանը մասնակցել են Հայաստանի կինոյի հիմնադրամի փոխտնօրեն Վարդան Աբովյանը, Ռուսաստանի Կինոյի հիմնադրամի գործադիր տնօրեն Ֆյոդոր Սոսնովը, Ադրբեջանի պետական ֆիլմաֆոնդի փոխտնօրեն Այազ Սալաևը, «Բելառուսֆիլմ» ազգային կինոստուդիայի գլխավոր տնօրեն Յուրի Ալեքսեյը, Ղրղզստանի Հանրապետության կինեմատոգրաֆիստների միության նախագահ Թաալայբեկ Կուլմենդեևը և Օղուզխանի անվան «Թուրքմենֆիլմ» միավորման ստեղծագործական հարցերով փոխնախագահ Սախիսալիխ Բայրամովը:
Սանկտ Պետերբուրգի միավորված մշակույթների 10-րդ միջազգային ֆորումը բացվել է սեպտեմբերի 11-ին և կշարունակվի մինչև սեպտեմբերի 14-ը: «ԱՊՀ երկրների կինեմատոգրաֆիա: Ընդհանուր անցյալ, ինքնիշխան ներկա, բազմաբևեռ ապագա» պանելային քննարկման ամբողջական տարբերակը կարող եք դիտել ԿինոՊրեսի YouTube էջում:
