ԿԳՄՍ նախարար Ժաննա Անդրեասյանը ներկայացրել է 2027 թվականի պետական բյուջեի նախագիծը, որով «Կինեմատոգրաֆիայի ծրագրին» նախատեսվում է հատկացնել 1 մլրդ 97 մլն 635,9 հազար դրամ՝ 279 մլն դրամով կամ շուրջ 20,3%-ով պակաս, քան 2026 թվականի հաստատված բյուջեով։
Ներկայացնելով մշակույթի ոլորտի առաջնահերթությունները՝ նախարարը հատուկ անդրադարձել է նաև կինեմատոգրաֆիային և ոլորտի տնտեսական ներուժին։
«Կուզեի նաև անդրադառնալ կինեմատոգրաֆիայի ոլորտին, կինոյի ոլորտին, որը իրական ինդուստրիայի վերածվելու հնարավորություն ունի»,- ասել է Անդրեասյանը։
2026 թվականի հաստատված բյուջեով «Կինեմատոգրաֆիայի ծրագրի» ընդհանուր ֆինանսավորումը կազմում է 1 մլրդ 376 մլն 635,9 հազար դրամ։ 2027 թվականի նախագծում այն կազմում է 1 մլրդ 97 մլն 635,9 հազար դրամ։ Տարբերությունը 279 մլն դրամ է։
Ֆիլմերի արտադրության հիմնական հատկացումը չի փոխվում։ «Կինոնկարների արտադրություն» միջոցառման համար 2027 թվականին նախատեսված է 478 մլն 882 հազար դրամ՝ նույնքան, որքան 2026 թվականին։ Կինո-ֆոտո-ֆոնո հավաքածուի պահպանման ծառայություններին նախատեսվում է 81 մլն 59 հազար դրամ, իսկ կինոծրագրերի իրականացմանը՝ 204 մլն 515,2 հազար դրամ։ Այս երկու հատկացումները ևս պահպանվել են նախորդ տարվա մակարդակում։
Անդրեասյանը ներկայացման ընթացքում առանձնացրել է նաև կինոարտադրության ոլորտում ներդրումների մասնակի վերադարձի մեխանիզմը։
«Այս ուղղությամբ կարևոր գործիք է կինոարտադրության ներդրումների մասնակի վերադարձի մեխանիզմը, որն արդեն նպաստում է Հայաստանում նոր կինոնախագծերի իրականացմանը»,- նշել է նախարարը։
Նրա տեղեկացմամբ՝ ստացվել է 11 ֆիլմի հայտ, որոնցից հինգի համար արդեն իրականացվել է ավելի քան 100 մլն դրամի ներդրումների մասնակի վերադարձ։ Մյուս հայտերով փոխհատուցումները նախատեսվում է իրականացնել ընթացիկ տարում։ 2027 թվականի նախագծով այս ուղղության համար նախատեսված է 124 մլն 335 հազար դրամ՝ նույնքան, որքան 2026 թվականի հաստատված բյուջեով։
Միաժամանակ «Կինոարվեստի հանրահռչակում» միջոցառման ֆինանսավորումն ավելանում է 111 մլն դրամով։ 2026 թվականի 97 մլն 844,7 հազար դրամի փոխարեն 2027 թվականի նախագծով նախատեսված է 208 մլն 844,7 հազար դրամ։
2026 թվականի բյուջեի համեմատ 2027-ի նախագծում առանձին միջոցառումների շարքում այլևս ներառված չեն «Կինոքաղաքի ստեղծումը», որի համար նախատեսված էր 360 մլն դրամ, և «Դրամագլխի ձևավորումը»՝ 30 մլն դրամով։ Այս երկու միջոցառումների ընդհանուր ծավալը կազմել է 390 մլն դրամ։
ԿԳՄՍ նախարարության 2027 թվականի ամբողջ բյուջեն նախագծով կազմում է շուրջ 435,9 մլրդ դրամ։ Դրա ավելի քան 80%-ը՝ շուրջ 349,2 մլրդ դրամ, բաժին է ընկնում կրթական ծրագրերին։ Մշակույթի ոլորտի ծրագրերի ֆինանսավորումը կազմում է շուրջ 24 մլրդ դրամ կամ նախարարության ընդհանուր բյուջեի մոտ 5,5%-ը։
Գիտության ծրագրերին նախատեսված է շուրջ 30,7 մլրդ դրամ կամ ընդհանուր բյուջեի 7,1%-ը, սպորտին՝ 25,2 մլրդ դրամ կամ 5,8%-ը, երիտասարդական ծրագրերին՝ մոտ 3,3 մլրդ դրամ կամ 0,75%-ը։
Կինեմատոգրաֆիայի համար նախատեսված շուրջ 1,1 մլրդ դրամը կազմում է մշակութային ծրագրերի ֆինանսավորման մոտ 4,6%-ը և ԿԳՄՍ նախարարության ամբողջ բյուջեի շուրջ 0,25%-ը։
«ԿինոՊրես»-ը նախկինում հայտնել էր, որ 2026 թվականի կինեմատոգրաֆիայի բյուջեն նախագծման և վերջնական հաստատման փուլերում փոփոխվել էր։ Նախնական նախագծով նախատեսված շուրջ 884 մլն դրամը հաստատված բյուջեում հասել էր 1 մլրդ 376 մլն 635,9 հազար դրամի։ 2027 թվականի 1 մլրդ 97 մլն 635,9 հազար դրամը ևս այս պահին պետական բյուջեի նախագծով նախատեսված ցուցանիշն է։
